Read Pashto Bible (Yusufzai) — د پښتو مقدس کتاب تاريخ دويم 24 Bible Online

تاريخ دويم 24 - Pashto Bible (Yusufzai) — د پښتو مقدس کتاب bible

تاريخ دويم 24

¹يوآس د اوو کالو په عُمر کښې د يهوداه بادشاه شو او څلوېښت کاله يې په يروشلم باندې بادشاهى وکړه. د هغۀ مور د بير سبع د ښار ضِبياه وه.

²تر څو پورې چې يهويدع اِمام ژوندے وو نو هغۀ هم هغه کار کولو چې مالِک خُدائ ورباندې خوشحالېدو.

³يهويدع د يوآس بادشاه دپاره دوه ښځې خوښې کړې او د هغوئ زامن او لوڼه پېدا شول.

⁴کله چې يوآس بادشاه وو نو هغۀ دا فېصله وکړه چې د مالِک خُدائ د کور مرمت دې وشى.

⁵هغۀ اِمامانو او ليويانو له حُکم ورکړو چې د يهوداه ښارونو ته لاړ شى او د ټولو خلقو نه دومره پېسې راغونډې کړى چې د مالِک خُدائ په کور کښې کالنے مرمت ورباندې وکړى. هغۀ ورته ووئيل چې دا کار سمدستى وکړئ، خو ليويانو دا کار سمدستى ونۀ کړو،

⁶نو هغۀ د هغوئ مشر يهويدع راوغوښتلو او تپوس يې ترې نه وکړو، ”تاسو دې ته پام ولې نۀ کولو چې ليويانو د يهوداه او يروشلم نه هغه محصُول راغوڼدولو کوم چې د مالِک خُدائ خِدمت کوُونکى موسىٰ د خلقو نه غوښتے وو چې دا محصُول د مالِک خُدائ د حضُور د خېمې دپاره ورکړى؟“

⁷د عتلياه يعنې د هغه بدکارې ښځې منونکو د مالِک خُدائ کور نه د ډېر وخت نه غله کوله او ټول مقدس څيزُونه يې هم د بعل په عِبادت کښې اِستعمالول.

⁸بادشاه ليويانو له حُکم ورکړو چې د چندې دپاره يو صندوق جوړ کړى او د مالِک خُدائ د کور په دروازه کښې يې کېږدى.

⁹هغۀ په ټول يروشلم او يهوداه کښې هر يو کس له دا خبر ورولېږلو چې مالِک خُدائ له هغه محصُول راوړى کوم چې په وړومبى ځل د خُدائ پاک خِدمت کوُونکى موسىٰ په صحرا کښې راغونډ کړے وو.

¹⁰په دې باندې خلق او د هغوئ مشران خوشحاله شول او خپلې د محصُول پېسې يې راوړې او صندوق يې ډک کړو.

¹¹ليويانو به هره ورځ هغه صندوق شاهى آفسر له وړلو کوم آفسر چې د دې ذِمه وار وو. کله به هم چې دا ډک وو، نو شاهى منشى او د مشر اِمام کس به پېسې راويستلې او صندوق به يې واپس خپل ځائ ته وړلو. نو داسې هغوئ ډېرې پسې راغونډې کړې.

¹²بادشاه او يهويدع به پېسې هغه چا له ورکولې کوم چې د مالِک خُدائ د کور مشران وُو او هغوئ د کاڼو ګِلکاران، ترکاڼان او اوسپنې استاذان د مرمت دپاره په مزدورۍ ونيول.

¹³هغوئ ټولو سخت محنت کولو او د مالِک خُدائ کور يې خپل اصلى حالت ته بيا راوستلو، هم هغه شان مضبوط لکه څنګه چې مخکښې وو.

¹⁴کله چې مرمت ختم شو، نو هغه پاتې شوى سرۀ زر او سپين زر بادشاه او يهويدع له ورکړے شول، چې هغوئ دا د مالِک خُدائ د کور د جامونو او نور سامان جوړولو دپاره اِستعمال کړل. <h>د يوآس د مالِک خُدائ نه اوړېدل</h> چې تر څو پورې يهويدع ژوندے وو، نو نذرانې به مسلسل د مالِک خُدائ په کور کښې پېش کېدلې.

¹⁵کله چې يهويدع د يو سل او دېرشو کالو ښۀ پوخ عُمر ته ورسېدو، نو هغه مړ شو.

¹⁶هغه د داؤد په شاهى اديره کښې ښخ شو ځکه چې هغۀ په بنى اِسرائيلو کښې د خُدائ پاک او د هغۀ د کور ډېر خِدمت کړے وو.

¹⁷خو چې کله يهويدع مړ شو، نو د يهوداه مشرانو يوآس بادشاه دې ته جوړ کړو چې هغوئ ته غوږ ونيسى.

¹⁸نو خلقو د مالِک خُدائ په کور کښې د هغۀ عِبادت پرېښودو، دا هغه ځائ وو چرته چې د هغوئ پلار نيکۀ عِبادت کولو او د دې په ځائ يې د بُتانو او د اشيرې بُت د نښو عِبادت شروع کړو. د دې ګناهونو د جرم په وجه هغوئ په يهوداه او يروشلم باندې د مالِک خُدائ غصه راوستله.

¹⁹مالِک خُدائ هغوئ له پېغمبران ورولېږل چې هغۀ ته ورګرځى، پېغمبرانو به هغوئ له خبردارے ورکولو خو خلقو ورته غوږ ونۀ نيولو.

²⁰بيا د خُدائ پاک روح د يهويدع اِمام په زوئ زکرياه باندې راغلو. هغه په يو اُوچت ځائ باندې ودرېدو او آواز يې وکړو، ”مالِک خُدائ، خُدائ پاک دا تپوس کوى چې تاسو د هغۀ د حُکمونو نافرمانى ولې کوئ او په خپل ځان باندې تباهى ولې راولئ! تاسو هغه پرېښودو، نو په دې وجه هغۀ تاسو هم پرېښودئ!“

²¹يوآس بادشاه د زکرياه خِلاف په يو سازش کښې ملګرتيا وکړه او د بادشاه په حُکم يې د مالِک خُدائ د کور په دربار کښې زکرياه سنګسار کړو.

²²بادشاه هغه د وفادارۍ خِدمت هېر کړو چې د زکرياه پلار يهويدع د هغۀ دپاره کړے وو او هغۀ زکرياه ووژلو. کله چې زکرياه مړ کېدو، نو هغۀ چغه ووهله، ”مالِک خُدائ دې زما په حال نظر وکړى او زما بدل دې تا نه واخلى!“

²³کله چې په هغه کال خزان راغلو، نو د شام لښکر په يهوداه او يروشلم باندې حمله وکړه او ټول مشران يې ووژل او ټول مال غنيمت يې د دمشق بادشاه له يوړو.

²⁴اګر چې شامى لښکر وړُوکے وو، خو مالِک خُدائ د هغوئ مدد وکړو چې د يهوداه دومره لوئ لښکر له شکست ورکړى ځکه چې د يهوداه خلقو مالِک خُدائ د هغوئ د پلار نيکۀ خُدائ پاک پرېښے وو. نو داسې يوآس بادشاه ته سزا مِلاو شوه.

²⁵کله چې شامى لښکر واپس لاړو نو يوآس سخت زخمى پاتې وو، نو وروستو بيا د هغۀ دوو آفسرانو د هغۀ خِلاف منصُوبه جوړه کړه او هغه يې په خپل کټ کښې ووژلو د دې دپاره چې د يهويدع اِمام د زوئ قتل بدله ترې نه واخلى. هغه د داؤد په ښار کښې ښخ شو، خو په شاهى اديره کښې ښخ نۀ شو.

²⁶د هغۀ خِلاف چې چا منصُوبه جوړه کړې وه هغه يو زاباد وو، چې هغه د يوې عمونى ښځې زوئ وو چې د هغې نوم سماعت وو او بل يهوزبد وو چې دې د يوې موآبۍ ښځې زوئ وو چې د هغې نوم سِمريت وو.

²⁷د بادشاهانو د کِتاب په تفسير کښې د يوآس د زامنو قيصې، هغه پېشګويۍ چې د هغۀ خِلاف شوې وې او د مالِک خُدائ د کور حِساب کِتاب شامِل دے. د هغۀ زوئ امصياه د هغۀ نه پس بادشاه جوړ شو.