Read Pashto Bible (Yusufzai) — د پښتو مقدس کتاب تاريخ دويم 25 Bible Online

تاريخ دويم 25 - Pashto Bible (Yusufzai) — د پښتو مقدس کتاب bible

تاريخ دويم 25

¹امصياه د پينځۀويشتو کالو په عُمر کښې بادشاه شو او يو کم دېرش کاله يې په يروشلم باندې حکومت وکړو. د هغۀ مور د يروشلم يهوعدان وه.

²هغۀ هغه هر کار کولو چې په څۀ باندې مالِک خُدائ رضا کېدو خو د زړۀ د اِخلاصه يې نۀ کول.

³کله چې د هغۀ بادشاهى مضبوطه شوه، نو هغۀ هغه آفسران ووژل چا چې د هغۀ پلار وژلے وو.

⁴خو هغۀ د هغوئ بچى ونۀ وژل او په هغه څۀ يې عمل وکړو چې مالِک خُدائ د موسىٰ په شريعت کښې د هغې حُکم کړے وو، ”مور پلار دې د هغه جرمونو په وجه نۀ شى وژلے کوم چې د هغوئ بچو کړى وى او بچى دې د هغه جرمونو په وجه نۀ شى وژلے کوم چې د هغوئ مور پلار کړى وى، يو کس دې صِرف د هغه جرم په وجه وژلے شى چې هغۀ په خپله کړے وى.“

⁵امصياه بادشاه د يهوداه او د بنيامين د قبيلو ټول سړى د خپلو خپلوکورَنو په مطابق په فوجى ډلو کښې را يو ځائ کړل او د زرو کسانو د ډلو او د سلو کسانو د ډلو دپاره يې فوجى مشران مقرر کړل. په دې کښې هغه ټول سړى شامِل وُو چې عُمر يې شل کاله يا د دې نه زيات وو، چې ټول درې لاکه وُو. هغوئ خوښ کړے شوى فوجيان وُو، د جنګ دپاره تيار وُو او د نېزو او ډالونو په اِستعمالولو کښې تکړه وُو.

⁶د دې نه علاوه، هغۀ د بنى اِسرائيلو نه يو لاکھ فوجيان تقريباً د درې زره او څلور سوه کيلو د سپينو زرو په قيمت باندې په مزدورۍ ونيول.

⁷خو يو پېغمبر بادشاه له ورَغلو او ورته يې ووئيل، ”د بنى اِسرائيلو دا فوجيان د ځان سره مۀ بوځه. مالِک خُدائ د شمالى بادشاهۍ د دې فوجيانو مل نۀ دے.

⁸کېدے شى ستا خيال دا وى چې د هغو په وجه به تاسو په جنګ کښې تکړه شئ، خو دا د خُدائ پاک کار دے چې هغه دا طاقت لرى چې چا له فتح يا شکست ورکړى. خُدائ پاک به ستاسو د دښمانو په وجه تاسو له شکست درکړى.“

⁹امصياه د پېغمبر نه تپوس وکړو، ”خو د هغه ټولو سپينو زرو به څۀ کېږى چې ما په مزدورۍ کښې ورکړى دى؟“ هغه پېغمبر ورته ووئيل، ”مالِک خُدائ تا له د هغې نه زيات درکولے شى!“

¹⁰نو امصياه هغه د مزدورۍ فوجيان واپس ولېږل او ورته يې ووئيل چې کورونو ته لاړ شئ. نو هغوئ کورونو ته لاړل او د يهوداه خلقو ته سخت غصه وُو.

¹¹امصياه خپل ځان بيا تکړه کړو او د مالګې مېدان ته يې خپل لښکر روان کړو. هغوئ هلته جنګ وکړو او لس زره ادومى فوجيان يې ووژل

¹²او نور لس زره يې ونيول. هغوئ قېديان د سِلح په ښار کښې د کمر سر ته وخېژول او راوې غورزول، نو داسې هغوئ لاندې په ګټو کښې مړۀ شول.

¹³په دې دوران کښې د مزدورۍ کوم فوجيان چې امصياه کورونو ته ليګلى وُو نو هغوئ د سامريه او بيت‌حورون په مينځ کښې د يهوداه په يو څو ښارونو حمله وکړه. هغوئ درې زره کسان ووژل او ډېر مال غنيمت يې يوړو.

¹⁴کله چې امصياه ادوميانو له د شکست ورکولو نه پس راوګرځېدو، نو هغۀ د هغوئ بُتان د ځان سره راوړل، دا يې ودرول، د هغې عِبادت يې وکړو او خوشبويۍ يې ورته وسوزولې.

¹⁵په دې باندې مالِک خُدائ غصه شو، نو هغۀ امصياه له يو پېغمبر ورولېږلو. پېغمبر ورته ووئيل، ”تا د هغه پردو معبودانو عِبادت ولې کړے دے چې هغوئ ستا د لاس نه خپل خلق هم نۀ شول بچ کولے؟“

¹⁶نو امصياه ورته ووئيل، ”د کله نه تۀ مونږ د بادشاه مشير مقرر کړے يې؟ خولهٔ دې بنده کړه، ګنى ووبه دې وژنم!“ پېغمبر خبرې بندې کړې خو دا يې ووئيل، ”اوس ما ته پته ولګېده چې خُدائ پاک ستا د تباه کولو فېصله کړې ده دا ځکه چې تا دا هر څۀ وکړل او زما نصيحت ته دې پام نۀ دے کړے.“

¹⁷د يهوداه بادشاه امصياه او د هغۀ مشيرانو د بنى اِسرائيلو خِلاف منصُوبه جوړه کړه. بيا هغۀ د بنى اِسرائيلو بادشاه يهوآس ته يو پېغام ولېږلو، څوک چې د يهوآخز زوئ او د ياهُو نمسے وو، چې جنګ له راوړاندې شه.

¹⁸يهوآس امصياه له دا پېغام ولېږلو، ”يو ځل د لبنان په غرونو کښې د ازغو بوټى د دِيار ونې له دا پېغام ولېږلو، زما زوئ له ستا لور راکړه چې وادۀ يې کړى. نو بيا يو ځنګلى ځناور هلته تېرېدو او د ازغو په بوټى يې پښې کېښودې.

¹⁹نو امصياه، ادوميانو له دې اوس شکست ورکړے دے او مغروره شوے يې. خو زۀ تا له مشوره درکوم چې په خپل کور کښې کښېنه. داسې بلا ولې راپاروې چې هغه ستا او ستا په خلقو باندې صِرف تباهى راولى؟“

²⁰خو امصياه ورته غوږ نۀ نيولو. خُدائ پاک غوښتل چې امصياه شکست وخورى، ځکه چې هغۀ د ادومى بُتانو عِبادت کړے وو.

²¹نو د بنى اِسرائيلو بادشاه يهوآس د يهوداه بادشاه امصياه خِلاف جنګ له لاړو. هغوئ په يهوداه کښې د بيت شمس سره يو بل ته مخامخ شول،

²²د يهوداه لښکر د بنى اِسرائيلو نه شکست خوړو او فوجيان خپلو کورونو ته وتښتېدل.

²³يهوآس امصياه ونيولو او يروشلم ته يې بوتلو. هلته هغۀ د اِفرائيم د دروازې نه واخله د ګوټ د دروازې پورې دېوال راوغورزولو، چې تقريباً دوه سوه او شل ګزه فاصله وه.

²⁴هغۀ د مالِک خُدائ د کور ټول سرۀ زر او سپين زر د مالِ غنيمت په توګه سامريه ته يوړل، د مالِک خُدائ د کور هغه سامان چې د عوبيد ادوم اولاد د هغې حِفاظت کولو او د محل خزانې يې يوړې. هغۀ د ځان سره قېديان هم بوتلل.

²⁵د يهوداه بادشاه امصياه د بنى اِسرائيلو د بادشاه يهوآس د مرګ نه پس پينځلس کاله ژوندے وو.

²⁶امصياه چې نور هر څۀ هم کړى دى د هغۀ د بادشاهۍ د شروع نه واخله تر آخره پورې هغه د بنى اِسرائيلو او يهوداه د بادشاهانو په تاريخ کښې ليکلے شوى دى.

²⁷د هغه وخت نه واخله چې کله هغۀ د مالِک خُدائ خِلاف بغاوت وکړو، په يروشلم کښې دشمنانو د هغۀ خِلاف يوه منصُوبه جوړوله. په آخر کښې هغه د لکيس ښار ته وتښتېدو، خو د هغۀ دشمنان په هغۀ پسې وُو او هلته يې ووژلو.

²⁸د هغۀ لاش په يو اس باندې يروشلم ته راوړلے شو او هغه د داؤد ښار په شاهى اديره کښې ښخ کړے شو.