Read Pashto Bible (Yusufzai) — د پښتو مقدس کتاب تاريخ دويم 27 Bible Online

تاريخ دويم 27 - Pashto Bible (Yusufzai) — د پښتو مقدس کتاب bible

تاريخ دويم 27

¹يوتام د پينځۀ ويشتو کالو په عُمر کښې بادشاه شو او هغۀ شپاړس کاله په يروشلم باندې بادشاهى وکړه. د هغۀ مور يروسه د صدوق لور وه.

²هغۀ د خپل پلار په شان هم هغه کار کولو چې په کوم باندې مالِک خُدائ خوشحالېدو، خو د خپل پلار په شان هغۀ داسې ګناه ونۀ کړه لکه چې د هغۀ پلار د مالِک خُدائ کور ته ننوتلے وو. خو خلقو دا ګناه بيا بيا کوله.

³هغه يوتام وو چې هغۀ د مالِک خُدائ د کور پاسنۍ دروازه جوړه کړه او د يروشلم په هغه علاقه کښې يې د ښار د دېوال ډېر مرمت هم وکړو چې د هغه علاقې نوم عوفل وو.

⁴د يهوداه په غرونو کښې هغۀ ښارونه جوړ کړل او په ځنګلو کښې يې قلعې او برجونه جوړ کړل.

⁵هغۀ د عمون بادشاه او د هغۀ د لښکر خِلاف جنګ وکړو او هغوئ له يې شکست ورکړو. بيا هغۀ عمونيان دې ته مجبور کړل چې درې کاله به هر کال دا محصُول ورکوى: درې زره او څلور سوه کيلو سپين زر، يو زر ټنه غنم او يو زر ټنه اوربشې.

⁶د يوتام بادشاهى مضبوطېده ځکه چې هغۀ په وفادارۍ سره د مالِک خُدائ د خپل خُدائ پاک فرمانبردارى کوله.

⁷د يوتام د بادشاهۍ نورې واقعې، د هغۀ جنګونه او د هغۀ نور کارونه، دا هر څۀ د بنى اِسرائيلو او د يهوداه په تاريخ کښې ليکلے شوى دى.

⁸يوتام د پينځۀويشتو کالو وو چې هغه بادشاه شو او هغۀ په يروشلم باندې شپاړس کاله بادشاهى وکړه.

⁹يوتام مړ شو او د داؤد په ښار کښې ښخ شو او د هغۀ زوئ احاز د هغۀ نه پس بادشاه جوړ شو.