Read Pashto Bible (Yusufzai) — د پښتو مقدس کتاب تاريخ دويم 3 Bible Online

تاريخ دويم 3 - Pashto Bible (Yusufzai) — د پښتو مقدس کتاب bible

تاريخ دويم 3

¹نو سليمان په يروشلم کښې د مورياه په غر باندې د مالِک خُدائ د کور جوړول شروع کړل، چرته چې مالِک خُدائ د هغۀ پلار داؤد ته راڅرګند شوے وو. د مالِک خُدائ کور د اُرنان يبوسى په درمند باندې جوړ شو، کوم ځائ چې داؤد خوښ کړے وو.

²او د دې جوړېدل د هغۀ د بادشاهۍ د څلورم کال د دويمې مياشتې په دويمه ورځ شروع شو.

³سليمان چې د خُدائ پاک د کور کوم بُنياد کېښودو هغه تقريباً دېرش ګزه اُوږد او تقريباً لس ګزه پلن وو.

⁴د ننوتلو کوټه د کور د پوره پلنوالى هومره يعنې تقريباً لس ګزه وه او تقريباً شپېته ګزه اُوچته وه. د کوټې دننه دېوالونه او چت په سوچه سرو زرو باندې پټ وو.

⁵په لويه کوټه باندې د دِيار د لرګى تختې لګولے شوې وې چې په سوچه سرو زرو باندې پټې وې، چې په دې باندې د کهجورو د ونو ګلکارى شوې وه او د زنځيرونو نمونې ورباندې جوړې شوې وې.

⁶بادشاه د خُدائ پاک کور د قيمتى کاڼو او د پروائم د مُلک د سرو زرو سره ښائسته کړو.

⁷هغۀ د کور د دېوالونو، د تختو او دروازو پټولو دپاره سرۀ زر اِستعمال کړل، کاريګرو په دېوالونو باندې د وزرو والا مخلوق نقشې هم جوړې کړې،

⁸دننۍ کوټې نوم زيات مقدس ځائ وو، چې تقريباً لس ګزه اُوږده او لس ګزه پلنه وه، چې د کور د پوره پلنوالى هومره وه. د زيات مقدس ځائ د دېوالونو پټولو دپاره د شلو ټنو نه زيات سرۀ زر اِستعمال شوى وُو،

⁹تقريباً نيم سېر سرۀ زر د مېخُونو د جوړولو دپاره اِستعمال شوى وُو او د برنو کوټو دېوالونه هم په سرو زرو باندې پټ وُو.

¹⁰بادشاه خپلو کاريګرو له دا حُکم هم ورکړو چې د وزرو والا مخلوق د اوسپنې نه جوړ کړئ، په سرو زرو يې پټ کړئ او په زيات مقدس ځائ کښې يې کېږدئ،

¹¹۱۱‏-۱۳ هلته دا څنګ په څنګ دروازې ته مخامخ ودرولے شوى وُو. د هر يو دوه وزر وُو، چې هر يو تقريباً دوه نيم ګزه پلن وو، وزر يې داسې خوارۀ وُو چې د کوټې په مينځ کښې د يو بل سره مِلاوېدل او په بل طرف باندې د کوټې دېوال ته رسېدلى وُو، چې پوره پلنوالے يې تقريباً لس ګزه وو.

¹⁴د زيات مقدس ځائ يوه پرده د مهينې لټې نه جوړه وه، چې د آسمانى، بانجانى او سور رنګ د وزرو والا مخلوق د شکلونو کار ورباندې شوے وو.

¹⁵بادشاه دوه ستنې جوړې کړې چې هره يوه تقريباً اوولس ګزه لوړه وه او د خُدائ پاک د کور په مخکښې يې ولګولې. د هرې ستنې دپاسه تقريباً درې ګزه لوړ تاجونه وُو.

¹⁶د ستنو سرونه د زنځيرونو د کَړو په شکلونو او په سلو انارونو باندې ښائسته کړے شوى وُو.

¹⁷ستنې د خُدائ پاک د کور د ننوتلو په طرفُونو باندې لګولے شوې وې: د جنوب په طرف باندې چې کومه ستنه لګولے شوې وه د هغې نوم يکين وو او چې په شمالى طرف باندې وه د هغې نوم بوعز وو.