Read Pashto Bible (Yusufzai) — د پښتو مقدس کتاب تاريخ دويم 30 Bible Online

تاريخ دويم 30 - Pashto Bible (Yusufzai) — د پښتو مقدس کتاب bible

تاريخ دويم 30

¹۱‏-۳ نو خلقو په صحيح وخت يعنې په وړومبۍ مياشت کښې د فسحې اختر ونۀ کړو، ځکه چې ټولو اِمامانو ځانونه نۀ وُو پاک کړى او ټول خلق په يروشلم کښې نۀ وُو راغونډ شوى. نو بادشاه، د هغۀ آفسران او د يروشلم خلق دې ته راضى شول چې اختر په دويمه مياشت کښې وکړى او بادشاه د يهوداه او بنى اِسرائيلو ټول خلق راوغوښتل. هغۀ د اِفرائيم او منسى قبيلو ته خاص اهميت ورکړو او هغوئ ته يې د دې دعوت خطُونه ولېږل چې په يروشلم کښې د مالِک خُدائ کور ته راشئ چې بنى اِسرائيلو د مالِک خُدائ د درناوى دپاره د فسحې اختر وکړُو.

⁴نو دا خبره بادشاه او نورو خلقو ته ښۀ ښکاره شوه،

⁵نو هغوئ په شمال کښې د دان نه واخله په جنوب کښې د بير سبع پورې ټولو بنى اِسرائيلو له دعوت ورکړو، چې په يروشلم کښې په دومره لوئ شمېر کښې راغونډ شى چې مخکښې نۀ وى راغونډ شوى او د قانون په مطابق د فسحې اختر وکړى.

⁶نو پېغام وړُونکى د بادشاه او د هغۀ د آفسرانو په حُکم د دې دعوت سره ټول يهوداه او بنى اِسرائيلو ته لاړل، ”اے بنى اِسرائيلو، تاسو د اسور بادشاهانو نه بچ شوى يئ چې کله هغوئ مُلک قبضه کړے وو. نو اوس مالِک خُدائ ته راوګرځئ، کوم چې د اِبراهيم، اِسحاق او يعقوب خُدائ پاک دے او هغه به تاسو ته راوګرځى.

⁷د خپل پلار نيکۀ او د خپلوانو په شان مۀ جوړېږئ څوک چې د مالِک خُدائ د هغوئ د خُدائ پاک وفادار نۀ وُو. لکه څنګه چې تاسو ته پته ده چې هغوئ له سخته سزا ورکړه.

⁸د هغوئ په شان ضدى مۀ جوړېږئ، خو د مالِک خُدائ تابعدارى کوئ. په يروشلم کښې د مالِک خُدائ کور له راځئ، کوم چې مالِک خُدائ ستاسو خُدائ پاک د همېشه دپاره مقدس کړے دے او د هغۀ عِبادت کوئ نو داسې به د هغۀ د سخت قهر نه خلاص شئ.

⁹که تاسو مالِک خُدائ ته راوګرځېږئ، نو چا چې ستاسو خپلوان اغوا کړى دى نو هغوئ به ستاسو په خپلوانو باندې رحم وکړى او هغوئ به خپلو کورونو ته بيا راولى. مالِک خُدائ، خُدائ پاک رحمان او رحيم دے او که تاسو هغۀ ته راوګرځېږئ، نو هغه به تاسو قبول کړى.“

¹⁰پېغام‌وړُونکى په شمال کښې د زبولون قبيلې پورې د اِفرائيم او منسى قبيلو په علاقې کښې هر يو ښار ته لاړل، خو خلقو په هغوئ پورې خاندل او ټوقې يې ورپورې کولې.

¹¹خو بيا هم د آشر، منسى او د زبولون قبيلو څۀ خلقو عاجزى ښکاره کړه او يروشلم ته لاړل.

¹²خُدائ پاک د يهوداه خلق هم د دې دپاره متحد کړل چې د هغۀ په مرضۍ باندې روان شى او د بادشاه او د هغۀ د آفسرانو حُکمونه ومنى.

¹³په دويمه مياشت کښې د خلقو يو لوئ شمېر په يروشلم کښې راغونډ شو چې د پتېرې روټۍ اختر وکړى.

¹⁴هغوئ هغه ټولې قربان‌ګاه واخستلې کومې چې په يروشلم کښې د نذرانو د پېش کولو او د خوشبويۍ د سوزولو دپاره اِستعمالېدلې او د قِدرون په وادۍ کښې يې وغورزولې.

¹⁵او د هغه مياشتې په څوارلسمه ورځ هغوئ د فسحې اختر د قربانۍ دپاره ګډُورى حلال کړل. کوم اِمامان او ليويان چې پاک نۀ وُو نو هغوئ دومره وشرمېدل چې خپل ځانونه يې مالِک خُدائ ته وقف کړل، نو داسې هغوئ د مالِک خُدائ په کور کښې سوزېدونکې نذرانې پېش کولے شوې.

¹⁶هغوئ د خُدائ پاک د خِدمتګار موسىٰ د شريعت په مطابق د مالِک خُدائ په کور کښې په خپلو ځايُونو باندې ودرېدل. ليويانو د قربانۍ وينه اِمامانو له ورکړه، چې هغوئ دا په قربان‌ګاه باندې وشيندله.

¹⁷په دغه مجمه کښې ډېر خلق په اودس کښې نۀ وو، نو په دې وجه هغوئ د فسحې اختر ګډُورى نۀ شول حلالولے، نو ليويانو د هغوئ دپاره حلال کړل او هغه ګډُورى يې مالِک خُدائ ته وقف کړل.

¹⁸د دې نه علاوه، هغه ډېر کسان کوم چې د اِفرائيم، منسى، يساکار او زبولون د قبيلو نه راغلى وُو نو هغوئ د پاکوالى رسم نۀ وو ادا کړے، نو هغوئ په غلطه طريقه باندې د فسحې اختر کولو. حزقياه بادشاه د هغوئ دپاره دا دعا وکړه،

¹⁹”اے مالِکه خُدايه، زمونږ د پلار نيکۀ خُدايه پاکه! د خپل رحم په وجه هغه کسان معاف کړه چې هغوئ د زړۀ د اِخلاصه ستا عِبادت کوى، اګر چې هغوئ پاک هم نۀ دى.“

²⁰مالِک خُدائ د حزقياه دعا واورېدله، هغۀ هغه خلق معاف کړل او هغوئ ته يې څۀ نقصان ونۀ رسولو.

²¹کوم خلق چې په يروشلم کښې راغونډ شوى وُو نو هغوئ د لوئې خوشحالۍ سره اووۀ ورځې د پتيرې روټۍ اختر کولو او ليويانو او اِمامانو هره ورځ د جذبې سره د مالِک خُدائ ثناء صِفت ووئيلو.

²²حزقياه د ليويانو دا صِفت وکړو ځکه چې هغوئ د مالِک خُدائ په عِبادت کښې تکړه وُو. <h>دويم ځل خوشحالى کول</h> د هغه اوو ورځو نه پس په کومو کښې چې هغوئ د مالِک خُدائ په ثناء صِفت کښې قربانۍ پېش کړې وې، چې کوم د هغوئ د پلار نيکۀ خُدائ پاک دے،

²³هغوئ ټولو دا فېصله وکړه چې اووۀ ورځې به نور اختر کوى. نو هغوئ د خوشحالۍ سره اختر وکړو.

²⁴حزقياه بادشاه يو زر غوَيى او اووۀ زره ګډان خلقو له ورکړل چې حلال يې کړى او وې خورى او آفسرانو هغوئ له يو زر نور غوَيى او لس زره ګډان ورکړل. نو داسې د ډيرو اِمامانو د پاکوالى رسم ادا شو.

²⁵نو دا ټول خوشحاله وُو، د يهوداه خلق، اِمامان، ليويان، هغه خلق چې کوم د شمالى طرف نه راغلى وُو او هغه مسافر کوم چې په بنى اِسرائيلو او يهوداه کښې پاخۀ دېره شوى وُو.

²⁶د يروشلم ښار د خوشحالۍ نه ډک وو، ځکه چې د داؤد زوئ سليمان د وخت نه پس هيڅ کله هم داسې نۀ وُو شوى.

²⁷اِمامانو او ليويانو د خلقو دپاره د مالِک خُدائ برکت وغوښتلو. خُدائ پاک په آسمان کښې په خپل کور کښې د هغوئ دعاګانې واورېدلې او قبولې يې کړې.