Read Pashto Bible (Yusufzai) — د پښتو مقدس کتاب تاريخ دويم 34 Bible Online

تاريخ دويم 34 - Pashto Bible (Yusufzai) — د پښتو مقدس کتاب bible

تاريخ دويم 34

¹يوسياه د اتو کالو وو چې هغه بادشاه جوړ شو او يو دېرش کاله يې په يروشلم بادشاهى وکړه.

²هغۀ هم هغه کار کولو چې په څۀ باندې مالِک خُدائ خوشحالېدو، هغۀ د خپل پلار نيکۀ داؤد په نقش قدم باندې روان وو او هغه د خُدائ پاک د قانون نه اخوا دېخوا نۀ اوړېدو.

³د يوسياه د بادشاهۍ په اتم کال، چې په کوم وخت کښې هغه لا وړُوکے وو، نو هغۀ د خپل پلار نيکۀ داؤد خُدائ پاک عِبادت شروع کړو. څلور کاله وروستو هغۀ د غېرو قومونو د عِبادت د ځايُونو، د اشيرې بُت نښې او د نورو ټولو بُتانو تباه کول شروع کړل.

⁴د هغۀ د ښودنې لاندې هغه قربان‌ګاه ټوټې ټوټې کړے شوه چرته چې د بعل عِبادت کېدو او د دې سره نزدې د خوشبويۍ قربان‌ګاه راوغورزولے شوې. هغوئ د اشيرې بُتانو او د نورو ټولو بُتانو نه خاورې جوړې کړې او هغه خاورې يې د هغه خلقو په قبرونو باندې وشيندلې چا چې دې ته قربانۍ پېش کړې وې.

⁵هغۀ د بُت پرستو اِمامانو هډُوکى په هغه قربان‌ګاه باندې وسوزول چرته چې هغوئ عِبادت کړے وو. د دې هر څۀ کولو په وجه هغۀ يهوداه او يروشلم بيا پاک کړل.

⁶هغۀ په ښارونو کښې او د منسى، اِفرائيم او شمعون او په شمال کښې د نفتالى پورې هم دغه شان کار وکړو.

⁷د شمالى بادشاهۍ په ټوله علاقه کښې هغۀ قربان‌ګاه او د اشيرې بُت نښې ټوټې ټوټې کړې او بُتان يې خاورې کړل او د خوشبويۍ ټولې قربان‌ګاه يې ټوټې ټوټې کړې. بيا هغه يروشلم ته راواپس شو.

⁸د هغۀ د بادشاهۍ په اتلسم کال، د هغې نه پس چې کله هغۀ د غېرو قومونو د عِبادت نه مالِک خُدائ کور او هغه مُلک پاک کړے وو، نو يوسياه بادشاه دا درې سړى ولېږل چې د مالِک خُدائ، خُدائ پاک کور مرمت کړى: د اصلياه زوئ سافن، معسياه، چې د يروشلم حُکمران وو او د يوآخز زوئ يوآخ چې مشر آفسر وو.

⁹کومې پېسې چې ليوى څوکيدارانو د مالِک خُدائ کور کښې راغونډې کړې وې هغه يې مشر اِمام خلقياه له ورکړې. دا د اِفرائيم او منسى او د شمالى ټولې بادشاهۍ نه او د يهوداه، بنيامين او د يروشلم د خلقو نه راغونډې شوې وې.

¹⁰بيا دا پېسې هغه دريو سړو ته حواله شوې چې د مالِک خُدائ د کور د مرمت مشران وُو او هغوئ دا پېسې دې مزدورانو له ورکړې

¹¹يعنې ترکاڼانو او ګِلکارانو له چې جوړ شوى کاڼى او لرګى واخلى او د هغه عمارت په مرمت کښې اِستعمال شى چې د يهوداه بادشاهانو پرېښے وو چې خراب شى.

¹²کومو خلقو چې دا کار کولو هغه ټول محنتى وُو. د هغوئ مشرى دې څلورو ليويانو کوله: د مرارى د ډلې يحت او عبدياه او د قُهات د ډلې زکرياه او مسلام. ليويان تکړه موسيقاران وُو.

¹³نور ليويان د سامان د وړلو راوړلو او د مختلفو کارونو د کاريګرو مشران وُو او نورو به حِساب کِتاب ساتلو او څوکيدارى به يې کوله.

¹⁴کله چې د ګودام نه پېسې ويستلې شوې نو په دې دوران کښې خلقياه د مالِک خُدائ د شريعت کِتاب وموندلو، هغه شريعت چې خُدائ پاک موسىٰ له ورکړے وو.

¹⁵هغۀ سافن منشى ته ووئيل، ”ما دلته د مالِک خُدائ په کور کښې د شريعت کِتاب موندلے دے.“ هغۀ سافن له کِتاب ورکړو،

¹⁶او سافن هغه کِتاب بادشاه له يوړو. سافن ورته ووئيل، ”تا چې د څۀ حُکم کړے وو نو مونږ هغه هر څۀ کړى دى.

¹⁷کومې پېسې چې د مالِک خُدائ په کور کښې ايښودے شوې وې مونږ هغه کاريګرانو او د هغوئ مشرانو ته حواله کړې دى.“

¹⁸بيا هغۀ ووئيل، ”هغه کِتاب دلته زما سره دے چې خلقياه ما له راکړے دے.“ او هغۀ بادشاه ته د دې تلاوت وکړو.

¹⁹کله چې بادشاه هغه کِتاب واورېدو، نو هغۀ د خفګان نه خپلې جامې وشلولې.

²⁰او هغۀ خلقياه، د سافن زوئ اخى قام، د ميکاياه زوئ عبدون، د دربار منشى سافن او د بادشاه مدد کوُونکى عساياه له دا حُکم ورکړو،

²¹”لاړ شئ او د مالِک خُدائ سره زما او د هغه خلقو دپاره مشوره وکړئ چې هغه به بيا هم په بنى اِسرائيلو او يهوداه کښې پاتې کېږى. د دې کِتاب تعليمات معلوم کړئ. مالِک خُدائ مونږ ته غصه دے ځکه چې زمونږ پلار نيکۀ د مالِک خُدائ کلام نۀ دے منلے او هغه کار يې نۀ دے کړے چې د کوم په باره کښې دا کِتاب وائى چې خامخا دې وکړے شى.“

²²د بادشاه په حُکم، خلقياه او نور لاړل چې د يوې ښځې سره مشوره وکړى چې نوم يې خُلده وو، دا پېغمبره د يروشلم په نوې حِصه کښې اوسېده. د هغې خاوند سلوم، د توقهت زوئ او د خسره نمسے وو، سلوم د مالِک خُدائ د کور د چُوغو مشر وو. چې څۀ شوى وُو نو هغوئ ورته هغه بيان وکړو،

²³او هغې ورته ووئيل چې واپس بادشاه له لاړ شئ او ورته ووايئ

²⁴چې د مالِک خُدائ نه دا پېغام راغلے دے، ”زۀ يروشلم او د دې په ټولو خلقو باندې آفت راولم چې په کښې به هغه ټول لعنتُونه وى چې په هغه کِتاب کښې ليکلےشوى دى کوم چې بادشاه ته بيان شو.

²⁵هغوئ زۀ رد کړے يم او نورو معبودانو ته يې نذرانې پېش کړې دى او دوئ چې دا هر څۀ کړى دى د هغې په وجه يې زما غصه راپارولې ده. زما غصه د يروشلم خِلاف را اُوچته شوې ده او دا به کمه نۀ شى.

²⁶خو د يهوداه هغه بادشاه له واپس ورشه چا چې د مالِک خُدائ سره د مشورې دپاره رالېږلے يې او هغۀ ته ووايه چې، ”مالِک خُدائ د بنى اِسرائيلو خُدائ پاک د هغه پېغام په باره کښې داسې وائى چې تا اوس اوس واورېدو،

²⁷او تۀ پښېمانه شوے يې او زما په وړاندې دې خپل ځان عاجز کړے دے، جامې دې شلولې دى او ژړلى دې دى، دا په هغه وخت کښې چې تا واورېدل چې ما د يروشلم او د دې خلقو له د سزا ورکولو څۀ بيان کړے دے. نو په دې وجه ما ستا سوال اورېدلے دے،

²⁸او زۀ چې يروشلم له کومه سزا ورکوم هغه به تر هغه وخت پورې نۀ راځى چې تر څو تۀ مړ شوے نۀ يې. او زۀ به تا پرېږدم چې په سلامتۍ سره مړ شې.“ نو هغه سړى د دې پېغام سره يوسياه بادشاه ته راواپس شول.

²⁹يوسياه بادشاه د يهوداه او يروشلم ټول مشران راغونډ کړل،

³⁰او هغوئ په يو ځائ د مالِک خُدائ کور ته لاړل، چې اِمامان او ليويان او ټول خلق، مالداره او غريبانان په کښې شامِل وُو. بادشاه د هغوئ ټولو په مخکښې د تړون هغه کِتاب تلاوت وکړو، کوم چې د مالِک خُدائ په کور کښې موندلے شوے وو.

³¹هغه د شاهى ستنې سره ولاړ وو او د مالِک خُدائ سره يې يو تړون وکړو چې د هغۀ تابعدارى به کوى او د زړۀ د اخلاصه د هغۀ قانون او حُکمونه به منى او هغه مطالبې به پوره کوى کومې چې د دې تړون سره تړلې دى، هم هغه شان چې څنګه په هغه کِتاب کښې ليکلے شوې دى.

³²هغۀ د بنيامين خلق او د يروشلم خلق هم هغه تړون ته مجبور کړل. نو د يروشلم خلقو د تړون هغه مطالبې ومنلې کوم تړون چې هغوئ د خپل پلار نيکۀ خُدائ پاک سره کړے وو.

³³نو يوسياه بادشاه هغه ټول ناکاره بُتان تباه کړل کوم چې په هغه علاقه کښې وُو کومه چې د بنى اِسرائيلو وه او چې تر څو پورې هغه ژوندے وو، نو هغوئ د مالِک خُدائ د هغوئ د پلار نيکۀ خُدائ پاک نه نۀ اوړېدل.