Read Pashto Bible (Yusufzai) — د پښتو مقدس کتاب تاريخ دويم 9 Bible Online

تاريخ دويم 9 - Pashto Bible (Yusufzai) — د پښتو مقدس کتاب bible

تاريخ دويم 9

¹د شيبا مُلک مَلِکه د سليمان شهرت نه خبر شوه او هغه يروشلم ته راغله چې په مشکلو سوالونو د هغۀ اِمتحان واخلى. هغې د ځان سره يوه لويه ډله راوستله او داسې اُوښان يې هم راوستل چې په مصالحو، قيمتى کاڼو او په لوئ مِقدار کښې په سرو زرو باندې بار وُو. هغه سليمان له راغله او چې د هغې په ذهن کښې څۀ هم وُو نو د سليمان سره يې د هغې په باره کښې خبرې وکړې.

²سليمان هغې له د ټولو سوالونو جوابونه ورکړل. د هغۀ دپاره داسې يو سوال هم مشکل نۀ وو چې د هغې وضاحت يې ورته نۀ شو کولے.

³د شيبا مَلِکه د سليمان په حِکمت باندې پوهه شوه او چې هغۀ کوم محل جوړ کړے وو هغه يې وليدو.

⁴د هغۀ په دسترخوان چې کوم خوراک پروت وو، د هغۀ د آفسرانو د اوسېدو کوټې، د هغۀ د محل د نوکرانو اِنتظام او د هغوئ لِباس، د هغۀ ساقيان د هغوئ لِباس او هغه سوزېدونکې نذرانې يې وليدې چې هغۀ د خُدائ پاک په کور کښې پېش کولې. نو په دې هر څۀ حقه حېرانه شوه.

⁵نو هغې بادشاه ته ووئيل، ”ما چې په خپل مُلک کښې ستا او ستا د حِکمت په باره کښې څۀ اورېدلى دى هغه رښتيا دى!

⁶هغوئ چې ما ته څۀ وئيل نو ما په هغې باندې تر هغې پورې يقين نۀ کولو چې راغلم او په خپله مې وليدل. زۀ ستا د نيم حِکمت هم خبره نۀ وم. چې خلق څۀ وائى تۀ د هغې نه هم ډېر زيات هوښيار يې.

⁷هغوئ څومره بختور دى چې څوک ستا خِدمت کوى، هغوئ هر وخت ستا په حضُور کښې وى او د دې حقدار دى چې ستا د حِکمت خبرې واورى!

⁸د مالِک خُدائ ستا د خُدائ پاک ثناء صِفت دې وى! هغۀ دا ښکاره کړې ده چې هغه ستا نه څومره خوشحاله دے چې تۀ يې بادشاه جوړ کړے يې چې د هغۀ په نوم باندې حکومت وکړې. ځکه چې هغه د خپلو خلقو يعنې بنى اِسرائيلو سره مينه کوى او د همېشه دپاره د هغوئ حِفاظت کول غواړى، هغۀ تۀ د هغوئ بادشاه جوړ کړے يې چې صحيح فيصلې وکړې او اِنصاف وکړې.“

⁹هغې چې کومې تُحفې راوړې وې نو هغه يې سليمان بادشاه ته پېش کړې: د څلورو زرو کيلو نه زيات سرۀ زر او په يو لوئ مِقدار کښې مصالحې او قيمتى کاڼى. د هغې نه نورې ښې مصالحې نۀ وې کومې چې مَلِکه شيبا سليمان بادشاه له ورکړې.

¹⁰د حيرام بادشاه او د سليمان بادشاه سړو چې د اوفير نه سرۀ زر راوړل نو هغوئ د صُندل لرګى او کالى هم راوړل.

¹¹سليمان دا لرګے د خُدائ پاک د کور او د خپل محل د پوړو جوړلو دپاره اِستعمال کړو او موسيقارانو له يې ترې نه بينجو او ربابونه جوړ کړل. د يهوداه په مُلک کښې د دې نه مخکښې د دې په شان هيڅ هم نۀ وُو ليدلے شوى.

¹²مَلِکه شيبا چې څۀ هم غوښتل نو سليمان بادشاه هغه ورکړل. دا د هغې نه علاوه وُو چې د هغه تُحفو په بدل کښې يې ورکړل کومې چې هغې راوړې وې. بيا هغه او د هغې ډله واپس خپل مُلک ته لاړل.

¹³سليمان ته هر کال تقريباً درويشت زره کيلو سرۀ زر مِلاوېدل،

¹⁴د دې نه علاوه تاجِرانو او سوداګرو به هغۀ له محصُول هم ورکولو. د عربو بادشاهانو او د بنى اِسرائيلو د ضِلعو حُکمرانانو به هم هغۀ له سرۀ زر او سپين زر راوړل.

¹⁵سليمان دوه سوه لوئ ډالونه جوړ کړل، چې هر يو تقريباً په اوو کيلو ټکېدلے شوو سرو زرو باندې پټ وو،

¹⁶درې سوه يې واړۀ ډالونه جوړ کړل، چې هر يو تقريباً په دريو کيلو ټکېدلے شوو سرو زرو باندې پټ وو. هغۀ دا ټول د لبنان د ځنګل په محل کښې کېښودلى وُو.

¹⁷بادشاه يو لوئ تخت هم جوړ کړے وو چې يوه حِصه يې د هاتى په غاښُونو باندې پټه وه او باقى په سوچه سرو زرو باندې پټ وو.

¹⁸د دې تخت شپږ پوړۍ وې چې بره ورختلې وې او يو د پښو کېښودلو چوکۍ ورسره تړلے شوې وه چې په سرو زرو باندې پټ وو. د تخت په هر طرف باندې بازوګان وُو او په هر طرف باندې د ولاړو زمرو بُتان وُو.

¹⁹په پوړو باندې د دولسو زمرو بُتان وُو، چې شپږ يو طرف ته وُو او شپږ بل طرف ته وُو. په بله يوه بادشاهۍ کښې هيڅ کله هم داسې تخت موجود نۀ وو.

²⁰د سليمان ټولې پيالۍ د سرو زرو نه جوړې وې او د لبنان د ځنګل د دربار ټول لوښى د سوچه سرو زرو وُو. د سليمان په وخت کښې سپين زر اهم نۀ شول ګڼلے.

²¹بادشاه د تجارت دپاره سمندرى جهازُونه لرل دا جهازُونه د حيرام بادشاه سړو چلول. هر درې کاله پس به د هغۀ جهازُونه راواپس کېدل چې سرۀ زر، سپين زر، د هاتى غاښُونه، شادوګان او طاوسان يې راوړل.

²²سليمان بادشاه په دنيا کښې د نورو ټولو بادشاهانو نه زيات هوښيار او مالدار وو.

²³خُدائ پاک چې هغۀ له کوم حِکمت ورکړے وو د هغې د اورېدو دپاره به ټولو بادشاهانو د هغۀ سره مشوره کوله.

²⁴سليمان له به هر يو ميلمه دا تُحفې راوړلې: د سرو زرو او سپينو زرو څيزُونه، چُوغې، وسلحې، مصالحې، اسونه او کچر. هغوئ تر کالونو پورى داسې کول.

²⁵د سليمان بادشاه د خپلو جنګى ګاډو او اسونو دپاره څلور زره د ودرېدو ځايُونه هم وُو او دولس زره يې اسونه وُو. څۀ يې په يروشلم کښې ساتلى وُو او باقى نور يې په مختلفو ښارونو کښې مقرر کړى وُو.

²⁶هغه د فرات سيند د علاقې نه واخله د فلستيانو مُلک او د مِصرى سرحد پورې د ټولو بادشاهانو نه عظيم بادشاه وو.

²⁷د هغۀ د بادشاهۍ په دوران کښې سپين زر په يروشلم کښې د کاڼو په شان عام وُو او دِيار د يهوداه د غرونو په لمن کښې د عام چِنار په شان ډېر تېر وُو.

²⁸سليمان د مِصر او د نورو ډېرو مُلکونو نه اسونه راوستل.

²⁹د سليمان د اول نه واخله تر آخره پورې باقى پاتې تاريخ د ناتن پېغمبر په تاريخ کښې، د شيلو د اخياه په پېشګويۍ کښې او د عدو پېغمبر په پېشګويۍ کښې ليکلے شوى دى، چې هغه د يربعام زوئ د نباط په حقله هم خبرې کوى.

³⁰سليمان په ټولو بنى اِسرائيلو باندې په يروشلم کښې څلوېښت کاله بادشاهى وکړه.

³¹هغه مړ شو او د داؤد په ښار کښې ښخ شو او د هغۀ زوئ يربعام د هغۀ نه پس بادشاه جوړ شو.