Read Pashto Bible (Yusufzai) — د پښتو مقدس کتاب عزرا 4 Bible Online

عزرا 4 - Pashto Bible (Yusufzai) — د پښتو مقدس کتاب bible

عزرا 4

¹د يهوداه او بنيامين د خلقو دشمنان د دې نه خبر شول چې کوم خلق د جلاوطنۍ نه راواپس شوى دى او هغوئ د مالِک خُدائ د بنى اِسرائيلو د خُدائ پاک کور بيا جوړوى.

²نو هغوئ د زربابل او د ډلو مشرانو سره مِلاوېدو له راغلل او ورته يې ووئيل، ”د مالِک خُدائ په کور جوړولو کښې به مونږ هم درسره ملګرى شو. مونږ هم د هغه خُدائ پاک عِبادت کوُو د کوم چې تاسو کوئ، د اسور بادشاه اسرحدون د وخت نه مونږ هغۀ ته قربانۍ پېش کوُو چا چې مونږ دلته د اوسېدو دپاره راولېږلو.“

³نو زربابل، يشوَع او د ډلو مشرانو هغوئ ته ووئيل، ”مونږ له د مالِک خُدائ زمونږ د خُدائ پاک په کور جوړولو کښې ستاسو د مدد هيڅ ضرورت نشته. مونږ به دا په خپله جوړوُو هم هغه شان چې څنګه د فارس بادشاه خورس حُکم راکړے دے.“

⁴او چې کوم خلق په هغه مُلک کښې اوسېدل نو هغوئ دا کوشش کولو چې يهُوديان بې‌حوصلې کړى او د مالِک خُدائ د کور جوړولو نه يې ويروى.

⁵هغوئ د فارس د حکومت آفسرانو له د دې دپاره رشوت هم ورکولو چې د هغوئ خِلاف کار وکړى. هغوئ د فارس بادشاه خورس په ټوله بادشاهۍ کښې داسې کول او هغوئ د فارس بادشاه دارا د بادشاهۍ شروع کېدو پورې دا کار نۀ پرېښودو.

⁶د اخسويرس بادشاه د بادشاهۍ په شروع کښې، د يهوداه او يروشلم خلقو دشمنانو د هغوئ خِلاف يو ليکلے شوے اِلزام راوړو.

⁷د فارس بادشاه ارتخششتا، بِشلام، مِتردات، طابئيل او د هغوئ ملګرو يو ځل بيا بادشاه ته يو خط وليکلو. هغه خط په ارامى ژبه کښې ليکلے شوے وو او بيا د بادشاه دپاره ترجمه کړے شو.

⁸رحُوم حُکمران او د صُوبې منشى شِمسى هم د يروشلم په باره کښې ارتخششتا ته دا خط وليکلو:

⁹”د حُکمران رحُوم، د صُوبې منشى شِمسى، د هغوئ د ملګرو، قاضيانو او د نورو ټولو آفسرانو نه، کوم چې د عيلام په مُلک کښې د ارک، بابل او د سوسه سړى دى،

¹⁰سره د هغه نورو خلقو کوم چې عظيم او عزتمند اسور بنى پال د خپلو کورونو نه بوتلل او د سامريه په ښار کښې او د فرات نمرپرېواتۀ طرف ته صُوبه کښې په نورو ځايُونو کښې دېره يې کړل.“

¹¹په خط کښې داسې ليکلے شوى وُو: ”د فرات سيند نمرپرېواتۀ په طرف د هغۀ د خِدمتګارانو نه، ارتخششتا بادشاه ته.

¹²بادشاه سلامت! مونږ تا خبرول غواړُو چې هغه يهُوديان کوم ستا د نورو علاقو نه راغلى دى هغوئ په يروشلم کښې دېره شوى دى او هغه خراب او سرکشه ښار بيا جوړوى، هغوئ د دېوالونو بيا جوړول شروع کړى دى او ډېر زر به يې تيار کړى.

¹³بادشاه سلامت! که دا ښار بيا جوړ شى او د دې دېوالونه سر ته ورسېږى، نو خلق به محصُول، جزيه او پېسې ورکول بند کړى او ستا شاهى محصُول به کم شى.

¹⁴نو بادشاه سلامت! مونږ ستا وفادار يُو او مونږ نۀ غواړُو چې د بادشاه دې داسې بې‌عزتى وشى، نو دا ځکه مونږ بادشاه له دا خبر ورلېږلے دے،

¹⁵چې تۀ دا حُکم ورکړه چې هغه تاريخ دې ولټولے شى کوم چې ستا پلار نيکۀ ليکلے وو. نو بيا به تا ته پته ولګى چې دا ښار همېشه د بغاوت نه ډک وى او د پخوانى وختُونو نه دې بادشاهانو او د صُوبو حُکمرانانو له تکليف ورکړے د‌ے. د دې په خلقو باندې حکومت کول همېشه مشکل وُو. نو په دې وجه دا ښار تباه شوے وو.

¹⁶نو په دې وجه زمونږ دا يقين دے که دا ښار بيا جوړ شى او د دې دېوالونه مکمل شى، نو بادشاه سلامت! د فرات نمرپرېواتۀ طرف ته صُوبه به ستا د قابو نه بهر شى.“

¹⁷نو بادشاه دا جواب ورولېږلو: ”رحُوم حُکمران، د صُوبې منشى شِمسى او د هغوئ هغه ملګرو ته چې کوم په سامريه کښې اوسېږى او د فرات سيند نمرپرېواتۀ ټولو خلقو ته، سلامونه!

¹⁸کوم خط چې تاسو رالېږلے دے هغه لوستلے شوے دے او زما په وړاندې ترجمه شوے دے.

¹⁹ما حُکم وکړو چې تفتيش دې وکړے شى او دا خبره معلومه کړے شوې ده چې يروشلم بې‌شکه د پخوانه د بادشاهانو خِلاف بغاوت کولو او دا د باغيانو او سرکشه خلقو نه ډک وو.

²⁰هلته طاقتورو بادشاهانو بادشاهى کړې ده او د فرات سيند نمرپرېواتۀ طرف ته په ټوله صُوبه يې حکومت کړے دے او جزيه، محصُول او پېسې يې راټولولې.

²¹نو په دې وجه تۀ به فرمان جارى کړې چې تر څو پورې ما بل حُکم نۀ وى درکړے نو هغه خلق دې د ښار په جوړولو باندې کار بند کړى.

²²دا کار سمدستې وکړئ چې داسې زما فائدې ته نور تاوان ونۀ رسېږى.“

²³نو څنګه چې د ارتخششتا خط رحُوم، شِمسى او د هغوئ ملګرو ته ولوستلے شو، نو هغوئ يروشلم ته تېز لاړل او يهُوديان يې دې ته مجبور کړل چې د ښار بيا جوړل بند کړى.

²⁴نو د خُدائ پاک په کور باندې کار بند وو او د فارس بادشاه دارا د بادشاهۍ تر دويم کال پورې کار ځنډولے شوے وو.