Read Pashto Bible (Yusufzai) — د پښتو مقدس کتاب عزرا 5 Bible Online

عزرا 5 - Pashto Bible (Yusufzai) — د پښتو مقدس کتاب bible

عزرا 5

¹په هغه وخت کښې دوه پېغمبران حجى او د عدو زوئ زکرياه وُو. هغوئ په يهوداه او يروشلم کښې اوسېدونکو يهُوديانو له د بنى اِسرائيلو هغه خُدائ پاک په نوم باندې پېشګوئې ورکوله چې کوم د هغوئ دپاسه وو.

²کله چې د شلتى‌اېل زوئ زربابل او د يهوصدق زوئ يشوَع د هغوئ پېغام واورېدو، نو هغوئ په يروشلم کښې د خُدائ پاک د کور بيا جوړول شروع کړل او د خُدائ پاک هغه دوه پېغمبران د هغوئ سره وُو او د هغوئ مدد يې کولو.

³نو د نمرپرېواتۀ طرف ته فرات حُکمران تتنى، شتر بوزنى او د هغوئ ملګرى آفسران سمدستى يروشلم ته راغلل او وې وئيل، ”تا له دا حُکم څوک درکوى چې دا کور بيا جوړ کړه او سر ته يې ورسوه؟“

⁴هغوئ د هغه ټولو سړو د نومونو تپوس هم وکړو کومو چې د دې په جوړولو کښې مدد کولو.

⁵خو په يهُودى مشرانو باندې د خُدائ پاک نظر وو او د فارس آفسرانو دا فېصله وکړه چې تر هغې پورې به يو کار هم نۀ کوى چې تر څو يې دارا بادشاه له خط نۀ وى لېږلے او جواب يې نۀ وى راغلے.

⁶هغوئ بادشاه له دا خبر ورولېږلو:

⁷”دارا بادشاه ته ډېرډېرسلامونه.

⁸بادشاه سلامت! تا ته دې پته وى چې مونږ د يهوداه صُوبې ته ورغلو او ومو ليدل چې د عظيم خُدائ پاک کور د لويو کاڼو او په دېوالونو کښې د لرګو د ستنو سره بيا جوړېږى. کار د ډېر احتياط سره کولے شى او ډير ښۀ روان دے.

⁹مونږ بيا د خلقو د مشرانو نه تپوس وکړو چې مونږ ته ووائى چې هغوئ له دا اِختيار چا ورکړ‌ے دے چې د خُدائ پاک کور بيا جوړ کړى او سر ته يې ورسوى.

¹⁰مونږ د هغوئ د نومونو تپوس هم وکړو نو چې داسې مونږ تا خبر کړُو چې د دې کار مشران څوک دى.

¹¹هغوئ مونږ له جواب راکړو چې مونږ د آسمان او زمکې د خُدائ پاک خِدمتګار يُو او مونږ هغه کور جوړوُو کوم چې په اصل کښې ډېره موده مخکښې د بنى اِسرائيلو يو تکړه بادشاه جوړ کړے وو او سر ته يې رسولے وو.

¹²خو زمونږ پلار نيکۀ د آسمان خُدائ پاک غصه کړو نو په دې وجه هغوئ يې د بابل بادشاه نبوکدنضر ته پرېښودل، چا چې دا کور وران کړو او خلق يې بابل ته جلاوطن کړل.

¹³خو بيا چې کله خورس بادشاه د بابل بادشاه شو نو د هغۀ د بادشاهۍ په وړومبى کال، خورس دا حُکم وکړو چې د خُدائ پاک کور دې بيا جوړ شى.

¹⁴هغۀ د خُدائ پاک په کور کښې د سرو زرو او سپينو زرو لوښى بيا کېښودل کوم چې نبوکدنضر د خُدائ پاک د کور نه اوړى وُو چې هغه کور په يروشلم کښې وو او په بابل کښې يې په عِبادتخانه کښې ايښى وُو. خورس دا لوښى د يو سړى په حواله کړل چې د هغۀ نوم شيسبضر وو، کوم چې د يهوداه حُکمران مقرر کړے شوے وو.

¹⁵بادشاه هغۀ ته ووئيل چې دا يوسى او په يروشلم کښې يې د خُدائ پاک کور ته واپس کړى او هغه کور په هغه ځائ باندې بيا جوړ کړى چې چرته مخکښې وو.

¹⁶نو شيسبضر راغلو او د دې بُنياد يې کېښودو، د دې جوړېدل د هغه وخت نه واخله تر ننه پورې جارى وُو، خو د خُدائ پاک کور تر اوسه پورې مکمل شوے نۀ دے.

¹⁷نو بادشاه سلامت! که ستا خوښه وى نو د بابل شاهى تاريخ دې ولټولے شى نو دا به معلوم شى چې خورس په يروشلم کښې د خُدائ پاک د کور د بيا جوړولو حُکم ورکړے وو او که نه او بيا مونږ خبر کړه چې په دې معامله کښې ستا خوښه څۀ ده.“