Read Pashto Bible (Yusufzai) — د پښتو مقدس کتاب نحمياه 12 Bible Online

نحمياه 12 - Pashto Bible (Yusufzai) — د پښتو مقدس کتاب bible

نحمياه 12

¹دا د هغه اِمامانو او ليويانو تفصيل دے کوم چې د شلتى زوئ زربابل او د مشر اِمام يشوَع سره د جلاوطنۍ نه راواپس شول:

²۲‏-۷ اِمامان دا وُو: شراياه، يرمياه، عزرا، امرياه، ملوک، حطوش، سکانياه، رحُوم، مريموت، عدو، جِنتو، ابياه، ميامين، معدياه، بِلجاه، سمعياه، يويريب، يدعياه، سلو، عموق، خلقياه او يدعياه. د يشوَع په وخت کښې دا سړى د خپلو ملګرو او د اِمامانو مشران وُو.

⁸ليويان: دا کسان د شکر ګزارۍ حمد‌و‌ثناء مشران وُو: يشوَع، بِنوئى، قدمى اېل، سربياه، يهوداه او متنياه.

⁹دې کسانو ورسره آواز نيولو: بقبوقياه، عُنى او د هغوئ ملګرو ليويانو.

¹⁰يشوَع د يويقيم پلار وو، يويقيم د اِلياسب پلار وو، اِلياسب د يويدع پلار وو،

¹¹يويدع د يُونتن پلار وو، او يُونتن د يدوع پلار وو.

¹²۱۲‏-۲۱ کله چې يويقيم مشر اِمام وو، نو دا اِمامان د اِمامانو د ډلې مشران وُو: د شراياه ډلې اِمام مراياه، د يرمياه ډلې اِمام حنانياه، د عزرا ډلې اِمام مسلام، د امرياه ډلې اِمام يهوحنان، د مُلکُو ډلې اِمام يُونتن، د شبنياه ډلې اِمام يوسف، د حارِم ډلې اِمام عدنا، د مريموت ډلې اِمام حلقى، د عدو ډلې اِمام زکرياه، د جِنتون ډلې اِمام مسلام، د ابياه ډلې اِمام زکرى، د مينامين ډلې يو اِمام هم وو. د معدياه ډلې اِمام فِلطى، د بِلجاه ډلې اِمام سموع، د سمعياه ډلې اِمام يُونتن، د يويريب ډلې اِمام متنياه، د يدعياه ډلې اِمام عُزى، د سلى ډلې اِمام قلى، د عموق ډلې اِمام عيبر، د خلقياه ډلې اِمام حسبياه، د يدعياه ډلې اِمام نتانى ايل.

²²کله چې اِلياسب، يويدع، يُونتن او يدوعد مشران اِمامان وو نو د ليويانو د مشرانو فهرست تيار شو او هم داسې د فارس بادشاه دارا په زمانه کښې او د اِمامانو د کورَنو د مشرانو حِساب کِتاب ساتلے شوے وو.

²³د اِلياسب نمسى د يُونتن وخت پورې د ليويانو د کورَنو مشرانو حِساب کِتاب د تاريخ په کِتاب کښې ليکلےشوُو.

²⁴دا د ليويانو د کورَنو مشران دى: حسبياه، سربياه، يشوَع، بِنوئى، قدمى ايل. په هغه وخت کښې به دوو ډلو يو بل ته مخامخ نمبر په نمبر د خُدائ پاک ثناء صِفت وئيلو او د هغۀ شکر به يې ادا کولو. دا به يې د هغه اصُولو په مطابق کول کوم چې د خُدائ پاک خِدمت کوُونکى داؤد بادشاه ورته ښودلى وُو.

²⁵د خُدائ پاک د کور دا څوکيداران د خُدائ پاک د کور د دروازو سره د ګودامونو مشران وُو: متنياه، بقبوقياه، عبدياه، مسلام، طلمون او عقوب.

²⁶دا خلق د يوصدق نمسى او د يشوَع زوئ يويقيم په وخت کښې هلته اوسېدل او د نحمياه حُکمران په وخت کښې او د عزرا په وخت کښې چې اِمام او د شريعت عالِم وو.

²⁷کله چې د يروشلم د ښار دېوال وقف کېدلو، نو ليويان د هغه ټولو ځايونو نه راوستلے شول چرته چې هغوئ اوسېدل، هغوئ د دې دپاره راوستلے شول چې د وقف کېدو په جشن کښې د شکر ګزارۍ د سندرو سره او د چمټو او بينجو د موسيقۍ سره شريک شى.

²⁸د ليويانو کورَنو سندرغاړى د هغه علاقې نه راغونډ شول چرته چې هغوئ اوسېدل. هغوئ د يروشلم ګېرچاپېره علاقې نه او د نطوفه نه ګېرچاپېره د وړو ښارونو نه،

²⁹او د بيت جِلجال، جبعه او عزماوت نه راغلل.

³⁰ليويانو او اِمامانو د خپلو ځانونو، خلقو، د دروازو او د ښار د دېوال دپاره د پاکوالى رسم ادا کړو.

³¹ما د دېوال دپاسه د يهوداه مشران راغونډ کړل او هغوئ مې د دوو لويو ډلو مشران مقرر کړل چې د ښار نه ګېرچاپېره روان شى او د خُدائ پاک شکر ادا کوى. اوله ډله د دېوال دپاسه ښى طرف ته د ډېران دروازې طرف ته لاړه.

³²هوسعياه د سندرغاړو نه وروستو روان شو، چې د يهوداه نيم مشران ورپسې وُو.

³³۳۳‏-۳۵ دا اِمامان ورپسې روان شول چې بيګلې يې غږولې: عزرياه، عزرا، مسلام، يهوداه، بنيامين، سمعياه او يرمياه. ورپسې زکرياه زوئ د يُونتن زوئ د سمعياه زوئ د متنياه زوئ د ميکاياه زوئ د زکور زوئ د آسف راغلۀ.

³⁶په هغه پسې د هغۀ د ډلې نور کسان وُو. سمعياه، عزراېل، مِللى، جِللى، ماعى، نتانى ايل، يهوداه او حنانى. هغوئ ټولو د موسيقۍ هغه شان څيزُونه روان کړى وُو کوم چې د خُدائ پاک خِدمت کوُونکى داؤد بادشاه غږول. عزرا عالِم د دې جلوس نه وړاندې روان وو.

³⁷د فوارې د دروازې سره هغوئ په هغه پوړو باندې وختل کومې چې د داؤد ښار ته تلې وې، د داؤد د محل نه تېر شول او د ښار نَمرخاتۀ طرف ته د اوبو دروازې سره دېوال ته واپس شول.

³⁸د هغه کسانو بله ډله کومو چې شکريه ادا کوله د دېوال د سر سره ګڅ طرف ته لاړل او نيم خلق زما سره ورپسې روان وُو. مونږ د تنور د مينارې نه تېر شوُو او پلن دېوال ته لاړُو،

³⁹او د هغه ځائ نه مونږ د اِفرائيم دروازې نه، يسانه دروازې نه، د کبانو دروازې نه، د حنن مينارې او د سلو مينارې نه روان وُو او د ګډو دروازې ته لاړُو. او مونږ خپل تګ د خُدائ پاک د کور دروازې سره نزدې بس کړو.

⁴⁰هغه دواړه ډلو کومو چې د خُدائ پاک شکر ادا کولو هغه د خُدائ پاک د کور علاقې ته ورسېدلې. زۀ هم د مشرانو نميى ډلې سره وم،

⁴¹زما په ډله کښې دا اِمامان شامِل وُو، چې هغوئ بيګلې غږولې: اِلياقيم، معسياه، مينامين، ميکاياه، اليوعينى، زکرياه او حنانياه وُو،

⁴²او په هغوئ پسې معسياه، سمعياه، اِلعازار، عُزى، يهوحنان، مُلکياه، عيلام او ايصر روان وُو. د دې حمد ويُونکو مشرى ازرخياه کوله او په اُوچت آواز يې سندرې وئيلې.

⁴³په هغه ورځ باندې ډېرې نذرانې پېش کړے شوې او د خلقو زړونه د خوشحالۍ نه ډک وُو ځکه چې خُدائ پاک هغوئ ډېر خوشحاله کړى وُو. ښځې او ماشومان په دې جشن کښې شريک وُو او چې هغوئ کوم شور جوړ کړے وو نو هغه تر لرې لرې پورې اورېدے شو.

⁴⁴په هغه وخت کښې څۀ سړى د هغه ګودامونو مشران مقرر شوى وُو، چرته چې د خُدائ پاک د کور دپاره څيزُونه کېښودلے شول، په دې کښې نذرانه، وړومبے پېدا شوې غله او لسمه حصه. دا سړى د مختلفو ښارونو سره نزدې پټو نه د برخو راغونډولو ذِمه وار وُو. دا برخې د قانون په مطابق د اِمامانو او ليويانو دپاره وې. د يهوداه ټول خلق د اِمامانو او ليويانو نه خوشحاله وُو.

⁴⁵هغوئ د پاکوالى رسمونه او هغه نور رسمونه ادا کول د کومو چې خُدائ پاک حُکم ورکړے وو. د خُدائ پاک د کور موسيقارانو او څوکيدارانو هم خپله ذِمه وارى د هغه اصُولو په مطابق سر ته رسوله کوم چې داؤد بادشاه او د هغۀ زوئ سليمان جوړ کړے وُو.

⁴⁶ډېر وخت مخکښې د داؤد بادشاه او آسف موسيقار د وخت نه، موسيقارانو د خُدائ پاک د ثناء صِفت وئيلو او د شکر ګزارۍ مشرى کړې وه.

⁴⁷د زروبابل او نحمياه په زمانه کښې به ټولو بنى اِسرائيلو هره ورځ د خداى د کور د سندرغاړو او څوکيدارانو ضرورتونه پوره کول. لاويانو ته به هغه برخه ورکولے کيدله کومه چې هغوئ دپاره مقرر وه او لاويانو به د هغې نه اِمامانو له هغه برخه ورکوله کومه چې د هغئ دپاره مقرر وه.