Read Pashto Bible (Yusufzai) — د پښتو مقدس کتاب نحمياه 6 Bible Online

نحمياه 6 - Pashto Bible (Yusufzai) — د پښتو مقدس کتاب bible

نحمياه 6

¹سنبلط، طوبياه، عربى جشم او زمونږ نور دشمنان خبر شول چې مونږ د دېوال جوړول ختم کړى دى او چې په دې کښې يو مات ځائ هم پاتې نۀ دے، اګر چې مونږ د دروازو په ځايُونو کښې دروازې هم لا نۀ وې لګولې.

²نو سنبلط او جشم ما له يو پېغام راولېږلو، دا مشوره يې راکوله چې د اونو په مېدان کښې په يو کلى کښې زۀ د هغوئ سره مِلاو شم. خو ما ته پته ولګېده چې دا ما ته د هغوئ د نقصان رسولو يوه منصُوبه وه.

³ما هغوئ له پېغام وړُونکى ولېږل چې ورته ووائى، ”زۀ يو اهم کار کوم او لاندې نۀ شم درتلے. صِرف ستاسو سره مِلاوېدو دپاره خپل کار نۀ شم بندولے.“

⁴هغوئ څلور ځلې ما له هم دغه پېغام رالېږلو او هر ځل ما هغوئ له هم دغه جواب ورولېږلو.

⁵بيا سنبلط خپل يو نوکر ما له د پينځم پېغام سره راولېږلو، دا د خط په شکل کښې وو او دا خط کولاوو.

⁶ما ولوستل، ”جشمه ووئيل چې په ګاونډيانوکښې دا افواه خوره ده چې تۀ او يهُوديان د بغاوت اراده لرئ نو دا ځکه تاسو دا دېوال بيا جوړوئ. هغۀ دا هم ووئيل چې ستا منصُوبه دا ده چې خپل ځان بادشاه کړې

⁷او تا د يو څو پېغمبرانو بندوبست کړے دے چې په يروشلم کښې دا اِعلان وکړى چې تۀ د يهوداه بادشاه يې. خو بادشاه سلامت به يقيناً د دې نه خبر شې، نو ځکه زۀ دا مشوره درکوم چې مونږ دواړه مِلاو شو چې په حالاتو باندې خبرې وکړُو.“

⁸نو ما هغۀ له جواب ورولېږلو، ”تۀ چې څۀ وايې په هغۀ کښې هيڅ هم رښتيا نشته. دا هر څۀ تا د خپل ځان نه جوړ کړى دى.“

⁹د هغوئ دا کوشش وو چې مونږ ويروى چې کار بند کړُو. خو ما دعا وکړه، ”خُدايه پاکه! ما له طاقت راکړه.“

¹⁰په هغه وخت زۀ د مهيطب اېل نمسى او د دلاياه زوئ سمعياه سره مِلاوېدو له لاړم، چې هغه د دې قابِل نۀ وو چې د خپل کور نه لاړ شى. هغۀ ما ته ووئيل، ”زۀ او تۀ به لاړ شو او د خُدائ پاک د کور په مقدس ځائ کښې به دواړه پټ شو او دروازې به تاله کړُو، ځکه چې هغوئ ستا د وژلو دپاره راروان دى. نو هغوئ به ستا د وژلو دپاره د شپې راشى.“

¹¹ما په جواب کښې ورته ووئيل، ”زۀ داسې سړے نۀ يم چې وتښتم او پټ شم. ستا خيال دا دے څۀ چې زۀ به د خپل ژوند د بچ کولو دپاره د خُدائ پاک په کور کښې پټېږم؟ زۀ به داسې نۀ کوم.“

¹²کله چې ما په دې باندې سوچ وکړو، نو ما ته پته ولګېده چې خُدائ پاک د سمعياه سره خبرې نۀ دى کړې، خو طوبياه او سنبلط هغۀ له د دې دپاره رشوت ورکړے دے چې ما له دا خبردارے راکړى.

¹³هغوئ هغۀ له د دې دپاره پېسې ورکړې وې چې ما ويروى او زۀ ګناه وکړم، نو چې هغوئ زما شهرت خراب کړى او ما سپک کړى.

¹⁴ما دعا وکړه، ”خُدايه پاکه! چې طوبياه او سنبلط څۀ کړى دى هغه ياد ساته او سزا ورکړه. هغه ښځه نوعيدياه او نور ټول پېغمبران ياد ساته چا چې زما د يرولو کوشش کړے دے.“

¹⁵د کار دوه پنځوسمې ورځې نه پس د الول د مياشتې په پينځۀويشتمه ورځ ټول دېوال ختم شو.

¹⁶کله چې په ګېرچاپېره مُلکونو کښې زمونږ دشمنان د دې نه خبر شول، نو هغوئ ويرېدل او خپل ځانونه ورته کمزورى ښکاره شول، ځکه چې هغوئ ته پته وه چې دا کار د خُدائ پاک د مدد سره شوے دے.

¹⁷په دې ټول وخت کښې د يهُوديانو مشرانو او طوبياه يو بل ته ډير خطونه ليږل راليږل.

¹⁸په يهوداه کښې ډېرو خلقو د طوبياه ملګرتيا ځکه کوله چې د هغۀ سخر د ارخ زوئ سکانياه يهُودى وو. د دې نه علاوه، د هغۀ زوئ يهوحنان د برکياه د زوئ د مسلام لور وادۀ کړې وه.

¹⁹طوبياه چې کوم ښۀ کارونه کړى وُو نو خلقو به د هغې ټولو په باره کښې زما په وړاندې خبرې کولې او ما چې څۀ وئيل نو هغه به يې طوبياه ته وئيل. او هغۀ زما د يرولو دپاره خطُونه رالېږل.