Read Pashto Bible (Yusufzai) — د پښتو مقدس کتاب هجرت 15 Bible Online

هجرت 15 - Pashto Bible (Yusufzai) — د پښتو مقدس کتاب bible

هجرت 15

¹بيا مُوسىٰ اؤ بنى اِسرائيلو مالِک خُدائ ته دا حمد‌و‌ثناء ووئيل : ”زۀ به مالِک خُدائ د پاره حمد‌و‌ثناء ووايم، ځکه چې هغۀ د جلال نه ډکه فتح مُوندلې ده، هغۀ اسُونه اؤ په اسُونو سوارۀ کسان درياب ته غورزولى دى.

²مالِک خُدائ زما طاقت دے اؤ زما حمد‌و‌ثناء د هغۀ د پاره ده، اؤ هغه ذات دے چې زۀ يې بچ کړے يم، هغه زما خُدائ پاک دے اؤ زۀ به د هغۀ ثناء وايم، هغه زما د پلار خُدائ پاک دے اؤ زۀ به د هغۀ لوئى بيان کړم.

³مالِک خُدائ د جنګيالى په شان دے، د هغۀ نُوم مالِک خُدائ دے.

⁴هغۀ درياب کښې د فِرعون جنګى ګاډۍ اؤ لښکر ډُوب کړو د هغۀ ښۀ ښۀ مشران په سُور درياب کښې ډُوب شول.

⁵ژور درياب هغوئ ډُوب کړل، هغوئ د کاڼى په شان لاندې بېخ ته لاړل.

⁶مالِکه خُدايه! ستا په ښى لاس کښې د جلال نه ډک طاقت شته، مالِکه خُدايه! ستا ښے لاس دُښمنان ټوټې ټوټې کوى.

⁷د خپل لوئ جلال سره تا خپل دُښمنان د خپو لاندې کړل، تا د اور په شان خپل قهر ورولېږلو اؤ هغوئ دې د بُوسو په شان وسوزول.

⁸تا درياب پُو کړو اؤ اوبۀ اُوچتې راغونډې شوې، سېلابُونه د دېوال په شان نېغ ودرېدل، اؤ د درياب په بېخ کښې اوبۀ کلکې شوې.

⁹دُښمن لافې وهلې، چې زۀ به په هغوئ پسې يم اؤ زۀ به ورورسېږم، زۀ به د هغوئ غنيمت ووېشم اؤ خپل ځان به په دې ښۀ موړ کړم. زۀ به خپله تُوره راوباسم اؤ زۀ به هغوئ تباه کړم.

¹⁰خو تا پُوکے ورکړو اؤ درياب هغوئ ډُوب کړل، مِصريان په زورَورو اوبو کښې د سيکې په شان ډُوب شول.

¹¹اے مالِکه خُدايه! ستا په شان نور خُدايان څوک دى؟ ستا په شان څوک دى چې ټولو نه لوئ اؤ مُقدس دى؟ ستا جلال د يرې نه ډک دے، ځکه چې داسې عجيبه عجيبه کارُونه کوې.

¹²تا خپل ښے لاس اُوږد کړو، اؤ زمکې دُښمنان ژوندى تېر کړل.

¹³تۀ په خپله وعده ولاړ وې اؤ تا هغه خلقو ته لار ښودله کُوم چې تا بچ کړى دى، تۀ به په خپل طاقت سره هغوئ، تر خپل مُقدس ځائ پورې ورسوې.

¹⁴قومُونو واؤرېدل اؤ په لړزان شول، د فلسطين اوسېدُونکى په دردُونو آخته شول.

¹⁵د ادوم مشران ويرېدل، د موآب مشران په لړزان آخته شول، د کنعان ټولو اوسېدُونکو خپله حوصله بائيلله.

¹⁶سخته يره اؤ هېبت په هغوئ باندې پرېوتو، هغوئ ستا د لاس طاقت وليدو اؤ هغوئ د تيږې په شان غلى شول، تر دې پورې مالِکه خُدايه! چې ستا قوم تېر شولو، چې هغه خلق تېر شول کُوم چې تا بچ کول.

¹⁷تۀ خپل خلق دننه راولې اؤ هغوئ په خپل غرۀ آبادوې، هغه ځائ اے مالِکه خُدايه! چې تا د خپل ځان د پاره خوښ کړے دے، هغه پاک ځائ ته، اے مالِکه خُدايه! چې تا په خپله ودان کړے دے.

¹⁸مالِک خُدائ به تل تر تله بادشاهى کوى.“

¹⁹چې کله د فِرعون اسُونه، د هغۀ جنګى ګاډۍ اؤ د هغۀ په اسُونو سوارۀ کسان درياب ته ورکُوز شول، مالِک خُدائ د درياب اوبۀ واپس په هغوئ باندې راوستلې، خو بنى اِسرائيل د درياب په مېنځ کښې په وچه زمکه تېر شول.

²⁰بيا د هارُون خور مريم، کُومه چې پېغمبره وه، هغې خپل تمبل راواخستلو، اؤ ټولې ښځې د خپلو تمبلُونو سره په ګډېدو په هغې پسې لاړلې.

²¹نو مريم هغوئ ته دا حمد‌و‌ثناء ووئيل : ”مالِک خُدائ ته حمد‌و‌ثناء ووايئ، ځکه چې هغۀ لويه فتح مُوندلې ده، هغۀ اسُونه اؤ په اسُونو سوارۀ کسان درياب ته غورزولى دى.“

²²بيا مُوسىٰ اِسرائيليانو له حُکم ورکړو چې د سُور درياب نه روان شى، نو دوئ د شُور صحرا ته لاړل. دوئ په صحرا کښې درې ورځې مزل وکړو خو اوبۀ يې ونۀ مُوندلې.

²³چې کله دوئ ماره ته راغلل، نو دوئ د ماره اوبۀ نۀ شوې څښلے ځکه چې د دې ځائ اوبۀ ترخې وې. نو د دې ځائ نُوم ماره ايښودلے شوے وو.

²⁴نو خلق مُوسىٰ ته وغورېدل اؤ ورته يې ووئيل، ”مُونږ به څۀ څښُو؟“

²⁵مُوسىٰ مالِک خُدائ ته سوال وکړو، نو مالِک خُدائ هغۀ ته د لرګى يوه ټُکړه وښودله، هغۀ دا اوبو ته وغورزوله اؤ اوبۀ خوَږې شوې. مالِک خُدائ هلته د هغوئ د پاره حُکمونه اؤ يو قانُون جوړ کړو اؤ هلته يې په هغوئ باندې آزمېښت وکړو.

²⁶ورته يې ووئيل، ”کۀ تاسو د مالِک خُدائ، د خپل خُدائ پاک خبره په غور سره واورئ اؤ هغه څۀ کوئ کُوم چې د هغۀ په نظر کښې صحيح دى اؤ د هغۀ قانُون ته پام کوئ اؤ د هغۀ ټول حُکمونه پُوره کوئ، نو زۀ به په تاسو داسې هيڅ بيمارۍ نۀ راولم چې کُومې ما په مِصريانو راوستلې وې، ځکه چې زۀ مالِک خُدائ يم اؤ زۀ شِفاء درکوُونکے يم.“

²⁷بيا دوئ ايليم ته راغلل، چې هلته د اوبو دولس چينې اؤ د اؤيا کهجُورو ونې وې، اؤ هلته هغوئ د اوبو په خوا خېمې ولګولې.