Read Pashto Bible (Yusufzai) — د پښتو مقدس کتاب هجرت 17 Bible Online

هجرت 17 - Pashto Bible (Yusufzai) — د پښتو مقدس کتاب bible

هجرت 17

¹د بنى اِسرائيلو ټول قوم د سين بيابان نه په سفر روان شولو اؤ د مالِک خُدائ په حُکم يې د يو ځائ نه بل ځائ ته کډه وړله. دوئ په رفيديم کښې خېمې ولګولې، خو هلته د دې خلقو د پاره د څښلو اوبۀ نۀ وې.

²نو په دې وجه خلق د مُوسىٰ سره په جګړه شول اؤ وې وئيل، ”مُونږ له د څښلو اوبۀ راکړه.“ مُوسىٰ دوئ ته ووئيل، ”تاسو ولې ما سره په جګړه يئ؟ تاسو ولې مالِک خُدائ په آزمېښت کښې اچوئ؟“

³خو خلق ډېر تږى وُو اؤ په مُوسىٰ وغورېدل. دوئ ووئيل، ”تا مُونږ ولې د مِصر نه راوويستلُو؟ د دې د پاره چې مُونږ، زمُونږ بچى اؤ زمُونږ څاروى د تندې نه ووژنې؟“

⁴نو مُوسىٰ مالِک خُدائ ته مِنت زارى وکړه اؤ وې وئيل، ”زۀ دې خلقو سره څۀ وکړم؟ دوئ خو زما سنګسارولو ته تيار دى.“

⁵مالِک خُدائ مُوسىٰ ته ووئيل، ”د ځان سره د اِسرائيليانو يو څو مشران روان کړه اؤ د خلقو په وړاندې ځه. د ځان سره هغه امسا هم يوسه په کُومه چې تا د نيل درياب وهلے وو.

⁶اؤ ګوره! زۀ به په سينا کښې په يو ګټ باندې ستا په وړاندې ولاړ يم. تۀ هغه ګټ په امسا ووهه اؤ د هغه ګټ نه به د خلقو د پاره د څښلو اوبۀ راووځى.“ نو مُوسىٰ د اِسرائيليانو د مشرانو په مخکښې هم دغه شان وکړل.

⁷نو هغۀ په دغه ځائ مسه (يعنې آزمېښت) اؤ مريبه (يعنې جګړه) نُوم کېښودو، ځکه چې بنى اِسرائيل په جګړه شول اؤ مالِک خُدائ يې په آزمېښت کښې واچولو چې وې وئيل، ”مالِک خُدائ زمُونږ مل دے کۀ نۀ دے؟“

⁸بيا عماليقيان راغلل اؤ په رفيديم کښې يې په اِسرائيليانو باندې حمله وکړه.

⁹مُوسىٰ يشوَع ته ووئيل، ”يو څو سړى خوښ کړه اؤ لاړ شه، سبا د عماليقيانو سره جنګ وکړه. زۀ به د غر په سر ودرېږم اؤ د خُدائ پاک طاقت لرُونکې امسا به زما په لاس کښې وى.“

¹⁰يشوَع هم هغه شان وکړل چې څنګه ورته مُوسىٰ وئيلى وُو اؤ عماليقيانو سره يې جنګ وکړو اؤ مُوسىٰ، هارُون اؤ حُور د غرۀ سر ته لاړل.

¹¹تر کُومې پورې چې مُوسىٰ لاسُونه پورته نيولى وُو، اِسرائيليان په ګټه کښې وُو، خو چې کله هغۀ لاسُونه لاندې کړل، نو عماليقيان په ګټه کښې شول.

¹²چې کله د مُوسىٰ لاسُونه ستړى شول، نو هارُون اؤ حُور ورله د کښېناستو د پاره يو کاڼے راوړو اؤ هغوئ د هغۀ يو څنګ اؤ بل څنګ ته ولاړ وُو اؤ د هغۀ لاسُونه يې پورته نيولى وُو اؤ د نمرپرېواتو پورې د هغۀ لاسُونه نېغ وُو.

¹³نو داسې يشوَع عماليقيانو له پُوره شکست ورکړو.

¹⁴بيا مالِک خُدائ مُوسىٰ ته ووئيل، ”دا فتح د ياد ساتلو د پاره د ځان سره وليکه. يشوَع ته دا واوروه چې زۀ به عماليقيان بېخى تباه کړم.“

¹⁵مُوسىٰ يوه قُربان‌ګاه جوړه کړه اؤ په هغې يې ”مالِک خُدائ زما د فتحې جنډا ده“ نُوم کېښودو.

¹⁶نو ځکه هغۀ ووئيل، ”د مالِک خُدائ جنډا اُوچته ونيسئ! مالِک خُدائ به د همېشه د پاره د عماليقيانو خِلاف جنګ جارى ساتى.“