Read Pashto Bible (Yusufzai) — د پښتو مقدس کتاب هجرت 18 Bible Online

هجرت 18 - Pashto Bible (Yusufzai) — د پښتو مقدس کتاب bible

هجرت 18

¹د مُوسىٰ سخر يترو، څوک چې د ميديان اِمام وو، هغۀ د هغه هر څۀ په باره کښې واؤرېدل چې خُدائ پاک د مُوسىٰ اؤ د خپلو خلقو اِسرائيليانو د پاره کړى وُو اؤ چې مالِک خُدائ هغوئ څنګه د مِصر نه راويستلى وُو.

²نو يترو مُوسىٰ له راغلو، د مُوسىٰ ښځه صفوره يې هم د ځان سره راوستله، کُومه چې مُوسىٰ د خپلې سخرانې کره پرېښې وه،

³اؤ ورسره د هغې دوه زامن جيرسوم اؤ اِلعازار هم وُو. مُوسىٰ وئيلى وُو، ”زۀ په پردى وطن کښې مُسافر يم.“ نو ځکه هغۀ په يو زوئ جيرسوم نُوم کېښودو.

⁴هغۀ دا هم وئيلى وُو، ”زما د پلار خُدائ پاک زما مل وو اؤ زۀ يې د مِصر د فِرعون نه بچ کړم چې هغۀ زۀ وژلم.“ نو ځکه هغۀ په بل زوئ اِلعازار نُوم کېښودو.

⁵يترو د مُوسىٰ د ښځې اؤ د هغې د دوه زامنو سره بيابان ته راغلو چرته چې مُوسىٰ د خُدائ پاک غرۀ ته نزدې اوسېدو.

⁶هغۀ مُوسىٰ له خبر ورولېږلو چې زۀ ستا د ښځې اؤ د دوه زامنو سره در روان يم،

⁷نو مُوسىٰ هغۀ سره مِلاوېدو د پاره بهر لاړو، د هغۀ په مخکښې د عِزت نه ټيټ شو اؤ ښُکل يې کړو. هغوئ د يو بل د خېر خېريت پوښتنه وکړه اؤ بيا د مُوسىٰ خېمې ته دننه راغلل.

⁸مُوسىٰ يترو ته هغه هر څۀ ووئيل کُوم چې مالِک خُدائ د اِسرائيليانو په خاطر په فِرعون اؤ د مِصر په خلقو کړى وُو. هغۀ ته يې د هغه تکليفُونو په باره کښې هم ووئيل کُوم چې په لاره کښې دوئ ته پېښ شوى وُو اؤ دا هم چې مالِک خُدائ دوئ څنګه بچ کړى وُو.

⁹چې کله يترو دا هر څۀ واؤرېدل، نو هغه ډېر خوشحاله شو

¹⁰اؤ وې وئيل، ”د مالِک خُدائ ثناء دې وى، چې هغۀ تاسو د فِرعون اؤ د مِصر د خلقو نه بچ کړئ! د مالِک خُدائ ثناء دې وى، چې هغۀ خپل خلق د غُلامۍ نه بچ کړل!

¹¹اوس ما ته پته ولګېده چې مالِک خُدائ د نورو ټولو خُدايانو نه لوئ دے، ځکه چې هغۀ خپل خلق د مِصريانو نه بچ کړل کله چې مِصريانو دوئ ته سپک کتل.“

¹²بيا يترو يوه پُوره سوزېدُونکې قُربانى پېش کړه اؤ ورسره نورې قُربانۍ هم راوړلې چې د خُدائ پاک په حضُور کښې يې پېش کړى، هارُون اؤ د اِسرائيليانو نور ټول مشران د يترو سره د خُدائ پاک حضُور ته لاړل، چې د عِبادت په شکل کښې د قُربانۍ دغه ډوډۍ وخورى.

¹³په بله ورځ مُوسىٰ د خلقو لانجې فېصله کولو ته کښېناستو اؤ د سحر نه تر ماښامه پورې خلق ترې نه راتاؤ وُو.

¹⁴چې کله يترو هغه هر څۀ وليدل کُوم چې مُوسىٰ کول، نو هغۀ ترې تپوس وکړو، ”دا څۀ دى چې تۀ يې د خلقو د پاره کوې؟ تۀ دا کار يواځې ولې کوې، چې د سحر نه تر ماښامه پورې خلق د مشورې د پاره درنه راتاؤ وى؟“

¹⁵مُوسىٰ خپل سخر ته ووئيل، ”زۀ به خامخا داسې کوم ځکه چې خلق د خُدائ پاک رضا معلُومولو د پاره ما له راځى.

¹⁶چې کله د دوو کسانو په مېنځ کښې لانجه وى، نو هغوئ ما له راشى اؤ زۀ بيا دا ګورم چې کُوم يو په حقه دے او کُوم په ناحقه دے اؤ زۀ دوئ ته د خُدائ پاک حُکمونه اؤ شريعت ښايم.“

¹⁷يترو ورته ووئيل، ”تۀ دا کار په صحيح طريقه نۀ کوې.

¹⁸تۀ اؤ دا خلق به ځانُونه ستړى کړئ. دا کار ستا د پاره ډېر مُشکل دے، تۀ دا کار يواځې نۀ شې کولے.

¹⁹زما خبره واؤره زۀ به تا له يوه ښۀ مشوره درکړم اؤ خُدائ پاک به ستا مل وى. ستا د پاره به دا ښۀ وى چې تۀ د خلقو لانجې راوړې اؤ د خُدائ پاک په حضُور کښې يې پېش کوې.

²⁰تۀ به دوئ ته د خُدائ پاک حُکمونه اؤ شريعت ښائې اؤ تۀ به دوئ ته د ژوند د تېرولو طريقه اؤ هغه څۀ ښائې چې دوئ به يې کوى.

²¹د دې نه علاوه، تۀ يو څو قابِل کسان هم خوښ کړه اؤ هغوئ په لسو، پنځوسو، سوُونو اؤ زرګُونو کسانو باندې مشران مُقرر کړه. هغوئ دې داسې سړى وى چې د خُدائ پاک نه يرېږى، چې اعتبارى وى اؤ رشوت خوارۀ نۀ وى.

²²هغوئ دې همېشه د قاضيانو په شان د خلقو خِدمت کوى. هغوئ به ټولې سختې لانجې تا له راوړى، خو وړې لانجې به هغوئ په خپله فېصله کوى، نو ستا د پاره به آسانى جوړه شى اؤ بوج به درنه کم شى.

²³کۀ تۀ هم هغه شان کوې چې څنګه خُدائ پاک حُکم درکړے دے، نو تۀ به دومره زيات ستړے کېږې هم نه اؤ ټول خلق به په خېر سره خپل خپل کور ته ځى.“

²⁴مُوسىٰ د يترو مشوره ومنله

²⁵نو هغۀ د ټولو اِسرائيليانو نه قابِل خلق خوښ کړل. اؤ هغوئ يې په لسو، پنځوسو، سوُونو اؤ زرګُونو کسانو مشران مُقرر کړل.

²⁶هغوئ به په پخه توګه د قاضيانو په شان د خلقو خِدمت کولو، هغوئ به ټولې سختې لانجې مُوسىٰ له راوړې خو وړې لانجې به هغوئ په خپله فېصله کولې.

²⁷بيا مُوسىٰ يترو رُخصت کړو اؤ يترو خپل وطن ته واپس لاړو.