Read Pashto Bible (Yusufzai) — د پښتو مقدس کتاب هجرت 2 Bible Online

هجرت 2 - Pashto Bible (Yusufzai) — د پښتو مقدس کتاب bible

هجرت 2

¹په دې دوران کښې د ليوى قبيلې يو سړى په خپله قبيله کښې يوه ښځه وکړه،

²اؤ د هغې نه د هغۀ يو زوئ وشو. هغې وليدل چې دا ښۀ ښکلے ماشُوم وو، نو هغې دا درې مياشتې پټ وساتلو.

³خو چې کله هغې دا نور نۀ شو پټولے، هغې د لُوښو نه جوړه شوې يوه ټوکرۍ راواخستله اؤ په دې يې تارکول ولګول چې اوبۀ په کښې دننه نۀ ځى. هغې ماشُوم په دې کښې کښېنولو اؤ دا يې بيا د درياب په غاړه په لُوښو کښې کېښوده.

⁴د ماشُوم خور لږه لرې ولاړه وه اؤ کتل يې چې په هغۀ به څۀ کېږى.

⁵د فِرعون لُور لمبېدلو له د درياب غاړې له راغله، د هغې خِدمت‌ګارانې د درياب په غاړه روانې وې نو ناڅاپه هغې په لُوښو کښې هغه ټوکرۍ وليده اؤ يوه خِدمت‌ګاره يې ورولېږله چې را يې وړى.

⁶د فِرعون لُور دا کولاؤ کړه اؤ يو ماشُوم يې وليدو. هغۀ ژړل اؤ د هغې ورباندې زړۀ وسوزېدلو. هغې ووئيل، ”دا ماشُوم عبرانے دے.“

⁷بيا د هغۀ خور د فِرعون د لُور نه تپوس وکړو، ”زۀ يو عبرانۍ ښځه راوغواړم څۀ چې دې ماشُوم له تے ورکوى؟“

⁸هغې ورته ووئيل، ”اؤ لاړه شه.“ نو هغه جينۍ لاړه اؤ د ماشُوم خپله مور يې راوستله.

⁹شهزادګۍ دې ښځې ته ووئيل، ”دا ماشُوم واخله اؤ زما د پاره تے ورکوه اؤ زۀ به تا له مزدُورى درکوم.“ نو هغې ماشُوم يوړو اؤ هغۀ له يې تے ورکولو.

¹⁰کله چې دا ماشُوم لږ لوئ شو نو هغې دا ماشُوم د بادشاه لُور له ورکړو اؤ د بادشاه لُور ماشُوم خپل زوئ جوړ کړو. هغې د خپل ځان سره ووئيل، ”ما دا د اوبو نه راويستلے دے!“ نو مُوسىٰ نُوم يې ورباندې کېښودو.

¹¹چې کله مُوسىٰ لوئ شو نو هغه خپلو خلقو عبرانيانو له لاړو اؤ هغۀ وليدل چې د هغوئ نه سخت کار اخستلے شو. هغۀ دا هم وليدل چې يو مِصرى يو عبرانے وهلو، دا د مُوسىٰ د خپلو خلقو نه يو کس وو.

¹²مُوسىٰ اخوا دېخوا وکتل اؤ چې کله هغۀ ته پته ولګېده چې هيڅ څوک يې هم نۀ ګورى، نو هغه مِصرے يې ووژلو اؤ د هغۀ لاش يې په شګو کښې پټ کړو.

¹³بله ورځ هغه بهر لاړو اؤ وې ليدل چې دوه عبرانيان په خپلو کښې په جګړه وُو. هغۀ هغه يو ته ووئيل کُوم چې په غلطه وو، ”تۀ ولې خپل عبرانے وهې؟“

¹⁴هغه سړى ورته ووئيل، ”تۀ چا په مُونږ مشر کړے يې اؤ په مونږ يې قاضى جوړ کړے يې؟ تۀ ما هم وژنې څۀ لکه چې هغه مِصرے دې وژلے وو؟“ نو مُوسىٰ ويرېدو اؤ د خپل ځان سره يې ووئيل، ”ښه نو لکه چې ما څۀ کړى دى د هغې خلقو ته پته لګېدلې ده!“

¹⁵چې کله فِرعون خبر شو چې څۀ شوى وُو، نو هغۀ د مُوسىٰ د وژلو کوشش وکړو، خو مُوسىٰ وتښتېدو اؤ لاړو اؤ د ميديان په وطن کښې اوسېدو. يوه ورځ چې کله مُوسىٰ د يو کُوهى سره ناست وو، د ميديان د اِمام يترو اووۀ لُوڼه راغلې، چې اوبۀ راوخېژوى اؤ د خپل پلار ګډو اؤ چېلو د پاره ښانکُونه ترې نه ډک کړى.

¹⁷خو څۀ شپانو د يترو لُوڼه وشړلې. نو مُوسىٰ د هغوئ د بچ کولو د پاره ورَغلو اؤ د هغوئ څاروو له يې اوبۀ ورکړې.

¹⁸چې کله دوئ خپل پلار له راغلې، هغۀ ترې تپوس وکړو، ”تاسو ولې نن ډېر زر راغلئ؟“

¹⁹هغوئ ورته ووئيل، ”يو مِصرى مُونږ د شپانو نه بچ کړُو اؤ هغۀ مُونږ له اوبۀ هم راوخېژولې اؤ زمُونږ څاروو له يې ورکړې.“

²⁰هغۀ د خپلو لُوڼو نه تپوس وکړو، ”هغه چرته دے؟ تاسو هغه سړے بهر ولې پرېښودو؟ لاړې شئ اؤ هغه راوغواړئ چې مُونږ سره ډوډۍ وخورى.“

²¹نو مُوسىٰ هلته اوسېدو ته راضى شو اؤ يترو هغۀ ته خپله لُور صفوره وادۀ کړه،

²²د هغې نه يې يو زوئ وشو. مُوسىٰ د خپل ځان سره ووئيل، ”زۀ په دې وطن کښې مُسافر يم“، نو په هغۀ يې جيرسوم نُوم کېښودو.

²³ډېره موده پس چې د مِصر بادشاه مړ شو، خو بنى اِسرائيلو د غُلامۍ په وجه فرياد کولو نو هغوئ په چغو وژړل، ”خُدايه پاکه! زمُونږ مدد وکړه!“

²⁴نو خُدائ پاک د دوئ ژړا واؤرېدله. هغۀ د هغوئ فرياد واؤرېدو اؤ د اِبراهيم اِسحاق اؤ يعقُوب سره خپل هغه تړون يې راياد کړو.

²⁵هغۀ د بنى اِسرائيلو تکليف ولېدو اؤ ورباندې خفه شو.