Read Pashto Bible (Yusufzai) — د پښتو مقدس کتاب هجرت 24 Bible Online

هجرت 24 - Pashto Bible (Yusufzai) — د پښتو مقدس کتاب bible

هجرت 24

¹مالِک خُدائ مُوسىٰ ته ووئيل، ”ما له غرۀ ته، تۀ اؤ هارُون، ندب، ابيهُو اؤ د اِسرائيليانو اؤيا مشران راوخېژئ، اؤ چې لږه فاصله پاتې وى نو تاسو ما ته سجده وکړئ.

²صِرف تۀ ما له راشه اؤ هغه نور به ما له نزدې نۀ راځى. نور کسان به ستا سره غرۀ ته نۀ راخېژى.“

³مُوسىٰ راغلو اؤ خلقو ته يې د مالِک خُدائ ټولې خبرې اؤ ټول اصُول بيان کړل اؤ ټولو خلقو په يو آواز جواب ورکړو، ”څنګه چې مالِک خُدائ وئيلى دى نو مُونږ به هم هغه شان کوُو.“

⁴مُوسىٰ د مالِک خُدائ هغه ټولې خبرې وليکلې. بل سحر وختى د غرۀ په لمن کښې هغۀ يوه قُربان‌ګاه جوړه کړه اؤ د اِسرائيليانو د دولسو قبيلو په مُطابق يې د هرې يوې د پاره دولس تيږې ودرولې.

⁵بيا هغۀ د بنى اِسرائيلو څۀ ځلمى مُقرر کړل اؤ هغوئ مالِک خُدائ ته سوزېدُونکې قُربانۍ اؤ څۀ څاروى د سلامتۍ قُربانۍ په توګه پېش کړل.

⁶مُوسىٰ د ځناورو هغه نيمه وينه واخستله اؤ په ښانکُونو کښې يې واچوله، اؤ هغه نوره نيمه يې په قُربان‌ګاه وشيندله.

⁷بيا هغۀ د تړون کِتاب راواخستلو اؤ حاضرو خلقو ته يې واورولو. هغوئ ووئيل، ”مُونږ به د مالِک خُدائ فرمانبردارى کوُو اؤ د هغۀ په ټولو خبرو به عمل کوُو.“

⁸بيا مُوسىٰ هغه وينه راواخستله چې په ښانکُونو کښې وه اؤ په خلقو يې وشيندله. هغۀ ووئيل، ”ګورئ! دا وينه د تړون د پوخوالى د پاره ده کُوم چې مالِک خُدائ ستاسو سره کړے دے چې کله هغۀ دا ټول حُکمونه درکول.“

⁹مُوسىٰ، هارُون، ندب، ابيهُو اؤ د اِسرائيليانو هغه اؤيا مشران غرۀ ته وختل.

¹⁰اؤ هغه خُدائ پاک يې وليدلو چې اِسرائيليانو يې عِبادت کولو. د هغۀ د خپو لاندې لکه د آسمان په شان د ياقُوتو شين فرش وو.

¹¹د خُدائ پاک د لاس نه د بنى اِسرائيلو هغو مشرانو ته ضرر ونۀ رسېدلو، هغوئ خُدائ پاک وليدلو اؤ بيا هغوئ خوراک څښاک وکړو.

¹²مالِک خُدائ مُوسىٰ ته ووئيل، ”ما له غرۀ ته راوخېژه اؤ چې کله تۀ هلته يې نو زۀ به تا له د کاڼو دوه تختې درکړم چې په هغو باندې ما ټول اصُول اؤ حُکمونه ليکلى دى چې تۀ به دا خلقو ته بيانوى.“

¹³مُوسىٰ د خپل مدد کوُونکى يشوَع سره روان شو اؤ مُوسىٰ د خُدائ پاک غرۀ ته بره ختلو.

¹⁴مُوسىٰ مشرانو ته ووئيل، ”تاسو مُونږ ته دلته تر هغه پورې اِنتظار کوئ چې مُونږ واپس نۀ يُو راغلى. هارُون اؤ حُور به ستاسو سره وى، اؤ کۀ د چا څۀ لانجه وى نو هغوئ له دې ورځى.“

¹⁵چې مُوسىٰ بره وختلو نو وريځې غر پټ کړو.

¹⁶د مالِک خُدائ سپين جلال په غرۀ باندې خور شو. بنى اِسرائيلو ته د مالِک خُدائ جلال داسې ښکارېدو لکه چې د غرۀ په سر باندې اور بل وى. شپږ ورځې وريځې غر پټ کړے وو اؤ په اوومه ورځ مالِک خُدائ د وريځې د مېنځ نه مُوسىٰ ته آواز وکړو.

¹⁸چې مُوسىٰ بره غرۀ ته ورختلو نو د وريځې مېنځ ته ورننوتلو اؤ څلوېښت ورځې اؤ څلوېښت شپې په غرۀ کښې ايسار شو.