Read Pashto Bible (Yusufzai) — د پښتو مقدس کتاب هجرت 26 Bible Online

هجرت 26 - Pashto Bible (Yusufzai) — د پښتو مقدس کتاب bible

هجرت 26

¹اؤ مالِک خُدائ ووئيل، ”د مُقدسې خېمې يعنې زما د حضُور خېمې دننه برخه د مهينې لټې د لسو پړدو نه جوړه کړه چې دا د آسمانى رنګ، بانجانى اؤ د سُور رنګ د وړۍ نه تياره وى. په دې باندې په ګُلکارۍ کښې د وزرو والا مخلُوق جوړ کړه.

²هره يوه پړده په برابر ناپ جوړه کړه چې څوارلس ګزه اُوږده وى اؤ دوه ګزه پلنه وى.

³پينځۀ پړدې په يو ځائ وګنډه. اؤ هغه نورې پينځۀ پړدې هم په يو ځائ وګنډه.

⁴په هره يوه جوړه کښې، د پړدې په بهرنۍ غاړه د آسمانى رنګ د کپړې کَړۍ جوړې کړه.

⁵د وړومبۍ جوړې په وړومبۍ پړده پنځوس کَړۍ اؤ پنځوس کَړۍ د دويمې جوړې په آخرى پړده جوړ کړه چې دا کَړۍ يو بل ته مخامخ وى.

⁶پنځوس د سرو زرو کُنډې جوړې کړه اؤ هغه پړدې د يوې بلې سره مِلاؤ کړه نو ټوله مُقدسه خېمه به يوه شى.

⁷د خېمې پټولو د پاره د چېلو د وړو نه جوړې شوې يولس پړدې واخله.

⁸دا ټولې په يو ناپ جوړې کړه، چې پينځلس ګزه اُوږدې اؤ دوه ګزه پلنې وى.

⁹پينځۀ پړدې په يو ځائ وګنډه اؤ هغه نورې شپږ هم يو ځائ وګنډه. شپږمه پړده د خېمې په مخکښينۍ حِصه باندې غبرږه کړه.

¹⁰د يوې جوړې د آخرى پړدې په غاړه پنځوس کَړۍ جوړې کړه اؤ د هغه بلې جوړې په غاړه هم پنځوس کَړۍ جوړې کړه.

¹¹د زېړو پنځوس کُنډې جوړې کړه اؤ هغه په کړو کښې واچوه چې هغه دوه جوړې مِلاؤ کړى نو داسې به دا د خېمې سره يو ځائ شى.

¹²هغه زياته شوې نيمه برخه به د خېمې شا ته ځوړنده وى.

¹³د پړدو دواړو طرفُونو ته چې په اُوږدوالى کښې کُوم نيم ګز زيات شوے دے هغه به راځوړند وى چې خېمه پټه کړى.

¹⁴دوه نورې پړدې هم جوړې کړه : يوه پړده د ګډو د څرمنې نه چې سُور رنګ ورکړے شوے وى اؤ بله د ښې څرمنې نه جوړه کړه، چې د پاس نه پرې خېمه پټه کړے شى.

¹⁵خېمې له د ودرولو د پاره د کيکر د لرګى نه چوکاټُونه جوړ کړه.

¹⁶چې هر يو چوکاټ پينځلس فُټه اُوږد وى اؤ اووۀ ويشت اِنچې پلن وى،

¹⁷په بېخ کښې ورله دوه يو شان تختې هم جوړې کړه چې چوکاټُونه ونښلوى. د ټولو چوکاټُونو دې دا تختې وى.

¹⁸د خېمې جنُوب طرف د پاره شل چوکاټُونه جوړ کړه

¹⁹اؤ څلوېښت د سپينو زرو خپې چې ورلاندې شى، چې د هر يو چوکاټ لاندې دوه دوه وى چې هغه دوه وړاندينۍ حِصې ونيسى.

²⁰د خېمې د شمال په طرف هم شل چوکاټُونه جوړ کړه

²¹اؤ څلوېښت د سپينو زرو خپې جوړې کړه، چې د هر يو چوکاټ لاندې دوه دوه وى.

²²د خېمې شا د پاره چې د نمرپرېواتۀ په طرف دے، شپږ چوکاټُونه جوړ کړه،

²³اؤ دوه چوکاټُونه د خېمې د ګوټُونو د پاره جوړ کړه.

²⁴د ګوټُونو دا چوکاټُونه به په بېخ کښې مِلاؤ وى اؤ د لاندې نه واخله تر سره پورې به نښتې وى. دا دوه چوکاټُونه به هم دغه شان جوړولے شى چې د کُومو نه دوه ګوټُونه جوړولے شى.

²⁵نو اتۀ چوکاټُونه اؤ شپاړس د سپينو زرو خپې به وى، چې د هر چوکاټ لاندې به دوه دوه وى.

²⁶د کيکر لرګى نه پينځلس لاړى جوړ کړه، پينځۀ د خېمې د هغو چوکاټُونو د پاره چې په يو طرف باندې وى،

²⁷پينځۀ د هغه چوکاټُونو د پاره چې په بل طرف باندې وى اؤ پينځۀ د هغه چوکاټُونو د پاره چې نَمرخاتۀ طرف شا ته په آخِر سر کښې وى.

²⁸د چوکاټُونو تير به د يو سر نه تر بل سره پورې پُوره رسېدلے وى.

²⁹په چوکاټُونو د سرو زرو پترى وخېژوه اؤ د سرو زرو کَړۍ ورله جوړې کړه چې لاړى ونيسى، په لاړو به هم د سرو زرو پترى خېژولے شى.

³⁰دا خېمه د هغه نقشې په مُطابق ودروه کُومه چې ما تا ته په غرۀ ښودلې وه.

³¹د مهينې لټې نه يوه پړده جوړه کړه چې د آسمانى رنګ، بانجانى اؤ د سُور رنګ وړۍ نه تياره شوې وى. په دې باندې په ګُلکارۍ کښې د وزرو والا مخلُوق جوړ کړه.

³²دا د کيکر لرګى په څلورو ستنو باندې، په کُنډو کښې راځوړنده کړه په کُومو ستنو چې د سرو زرو پترى خېژولے شوى وى اؤ د سپينو زرو په څلورو خپو باندې به ولاړې وى.

³³دا پړده د خېمې په چت کښې د کُنډو په قطار کښې ځوړنده کړه اؤ د پړدې نه شا ته د تړون صندُوق کېږده چې په هغې کښې د کاڼو دوه تختې دى. دا پړده به مُقدس ځائ د زيات مُقدس ځائ نه جُدا کوى.

³⁴د تړون صندُوق د کفارې په تخت بند کړه.

³⁵د زيات مُقدس ځائ نه بهر د خېمې ښى طرف ته مېز اؤ ګڅ طرف ته يې هغه ډيوټ کېږده.

³⁶د خېمې د ننوتلو دروازې د پاره د مهينې لټې نه يوه پړده جوړه کړه چې د آسمانى رنګ، بانجانى اؤ د سُور رنګ وړۍ نه تياره شوې وى اؤ چې دا په ګُلکارۍ باندې ښائسته کړے شوے وى.

³⁷د دې پړدې د پاره د سرو زرو کُنډې جوړې کړه اؤ د کيکر لرګى نه پينځۀ ستنې جوړې کړه چې د سرو زرو پترى ورباندې خېژولے شوى وى، اؤ د دې ستنو د پاره پينځۀ د زېړو خپې جوړې کړه.