Read Pashto Bible (Yusufzai) — د پښتو مقدس کتاب هجرت 30 Bible Online

هجرت 30 - Pashto Bible (Yusufzai) — د پښتو مقدس کتاب bible

هجرت 30

¹د خوشبويۍ سوزولو د پاره، د کيکر د لرګى نه يوه قُربان‌ګاه جوړه کړه.

²دا به څلور‌ګوټه وى، چې اتلس اِنچې اُوږده، اتلس اِنچې پلنه اؤ يو ګز اُوچته وى. د ښکرو په شان څلور ګوټُونه ورله جوړ کړه چې ورسره يو ځائ شى.

³د هغې په چت، څلورو واړو طرفُونو اؤ د هغې د ښکرو په شان څيزُونو باندې د سُوچه سرو زرو پترى وخېژوه اؤ ګېر‌چاپېره ترې نه د سرو زرو غاړه شان تاؤ کړه.

⁴د وړلو د پاره دوه د سرو زرو ګول کَړۍ ورله جوړې کړه اؤ لاندې يې دواړو طرفُونو ته د غاړې سره وتړه چې هغه بازوګان ونيسى چې د کُومو په ذريعه دا وړلے شى.

⁵بازوګان د کيکر د لرګى نه جوړ کړه اؤ په دې باندې د سرو زرو پترى وخېژوه.

⁶دا قُربان‌ګاه د هغې پړدې نه بهر کېږده کُومه چې د تړون د صندُوق مخې ته ځوړنده ده. دا هغه ځائ دے چې چرته به زۀ ستا سره مُلاقات وکړم.

⁷هر سحر وختى چې هارُون کله د ډيوو تيارولو له راځى، هغه به په دې باندې خوشبويۍ سوزوى.

⁸چې کله هغه په ماښام کښې ډيوې بلوى نو هم دغه شان به کوى. دا د خوشبويۍ نذرانه به په راتلُونکى ټولو وختُونو کښې جارى ساتلے شى.

⁹په دې قُربان‌ګاه باندې حرامه خوشبوئى مۀ پېش کوئ اؤ د يو ځناور نذرانه، يا د غلې نذرانه مۀ پېش کوئ اؤ يا د څښلو څۀ نذرانه هم په دې مۀ تويَوئ.

¹⁰په کال کښې يو ځل به هارُون د قُربان‌ګاه د کفارې رسم ادا کوى چې کله د ګُناه د پاره قربان شوى ځناور وينه د قُربان‌ګاه د ښکرو په شان څيزُونو باندې تويَولے شى نو دا پاکېږى. په راتلُونکى ټولو وختُونو کښې به دا د کفارې رسم هر کال ادا کېږى. دا قُربان‌ګاه به پُوره مُقدسه وى، ځکه چې دا ما مالِک خُدائ ته وقف ده.“

¹¹مالِک خُدائ مُوسىٰ ته ووئيل،

¹²”کله چې تۀ د بنى اِسرائيلو مردُم شمارى کوې، هر يو سړے به ما له د خپل ژوند قيمت راکوى، چې کله مردُم شمارى کېږى، نو هيڅ بلا به ورباندې نۀ راځى.

¹³هر يو کس چې په دې مردُم شمارۍ کښې شامِلېږى نو هغه به خامخا د منلے شوى معيار په مُطابق هغه مُقرر شوے قيمت ورکوى. هر يو کس به دا مالِک خُدائ ته د نذرانې په توګه ورکوى.

¹⁴هر يو کس به په دې مردُم شمارۍ کښې شمېرلے شى، د هر يو کس عُمر چې شل کاله يا د شلو کالو نه زيات وى، نو هغه به دا قيمت ورکوى.

¹⁵چې کله هغوئ مالِک خُدائ ته د خپل ژوند قيمت ادا کوى نو مالدار اؤ غريب به يو برابر ورکوى.

¹⁶د بنى اِسرائيلو نه د کفارې دا پېسې راټولوه اؤ زما د حضُور په خېمه يې خرچ کوه. دا محصُول به د هغوئ د ژوند قيمت وى اؤ زۀ، مالِک خُدائ به هغوئ ياد ساتم اؤ د هغوئ حِفاظت به کوم.“

¹⁷اؤ مالِک خُدائ مُوسىٰ ته ووئيل

¹⁸”د وينځلو د پاره د زېړو يو ښانک جوړ کړه چې بېخ يې هم د زېړو وى. دا د خېمې اؤ د قُربان‌ګاه په مېنځ کښې کېږده اؤ په هغې کښې اوبۀ واچوه.

¹⁹هارُون اؤ د هغۀ زامن به په دې اوبو خپل لاسُونه اؤ خپې وينځى

²⁰د هغې نه مخکښې چې هغوئ خېمې ته ننوځى يا چې قُربان‌ګاه ته د خوراک نذرانه پېش کولو د پاره نزدې کېږى. نو هغوئ به نه مړۀ کېږى.

²¹هغوئ دې خامخا خپل لاسُونه اؤ خپې وينځى، چې مړۀ نۀ شى. دا يو قانُون دے چې هغوئ اؤ د هغوئ اولاد به همېشه د پاره په دې عمل کوى.“

²²بيا مالِک خُدائ مُوسىٰ ته ووئيل،

²³”دا ښې مصالحې واخله : شپږ کيلو اوبۀ شوې خوشبوداره ژاوله، درې کيلو خوشبوداره دارچينى، درې کيلو خوشبودار درږے،

²⁴اؤ شپږ کيلو د سناد د پاڼو مصالحه، دا ټول به د منلے شوى معيار په مُطابق تَللے شوى وى. څلور ليټره د زيتُونو تېل هم ورسره مِلاؤ کړه،

²⁵اؤ د غوړولو مُقدس تېل ترې نه جوړ کړه، داسې يې مِلاؤ کړه لکه چې د عطرو والا دا کار کړے وى.

²⁶په دې باندې دا څيزُونه غوړ کړه، زما د حضُور خېمه، د تړون صندُوق،

²⁷مېز اؤ د هغې ټول سامان، ډيوټ اؤ د هغې سامان، د خوشبويۍ سوزولو قُربان‌ګاه،

²⁸د سوزېدُونکې نذرانې قُربان‌ګاه، ورسره د هغې ټول سامان، اؤ د وينځلو ښانک اؤ د دې بېخ هم په تيلو غوړ کړه.

²⁹په دې طريقه دا څيزُونه وقف کړه اؤ دا به بېخى مُقدس شى اؤ هر څوک يا هر څيز چې د دې سره ولګې نو هغه به هم مُقدس شى.

³⁰بيا هارُون اؤ د هغۀ د زامنو سرونه په تيلو غوړ کړه اؤ زما په خِدمت کښې يې د اِمامانو په توګه مُقرر کړه.

³¹بنى اِسرائيلو ته ووايه چې دا مُقدس تېل به په راتلُونکى ټولو وختُونو کښې زما په خِدمت کښې اِستعمالېږى.

³²دا به د يو عام سړى په بدن باندې نۀ شى تويَولے اؤ تاسو به د دې په شان خوشبويۍ نۀ جوړوئ. دا مُقدس دى اؤ تاسو به خامخا دا مُقدس ګڼئ.

³³کۀ هر څوک د دې په شان خوشبوئى جوړه کړى يا يې څوک د يو اِمام نه بغېر په بل چا پورې ولګوى نو هغه به نور زما د خلقو نۀ شى ګڼلے.“

³⁴مالِک خُدائ مُوسىٰ ته ووئيل، ”د دې خوشبودارو مصالحو يوه يوه برابره حِصه واخله : ژاوله، صدف، کنډ اؤ سُوچه لوبان.

³⁵د دې نه عطر جوړ کړه، دا داسې مِلاؤ کړه لکه چې يو د عطرو والا دا کار کړے وى. مالګه په کښې مِلاؤ کړه چې سُوچه اؤ مُقدس وى.

³⁶اؤ د دې څۀ حِصه مېده مېده کړه، دا زما د حضُور خېمې ته يوسه اؤ دا د تړون صندُوق مخې ته کېږده، هلته به زۀ تا سره مُلاقات وکړم. دا پُوره مُقدس وګڼئ.

³⁷د خپلو ځانُونو د پاره داسې خوشبوئى مه جوړوئ چې دا څيزُونه په کښې په دې طريقه اِستعمال شوى وى. دا يو مُقدس څيز اؤ ما مالِک خُدائ ته يې وقف وګڼئ.

³⁸کۀ څوک داسې يو څيز هم جوړ کړى اؤ د عطرو په توګه يې اِستعمال کړى نو هغه به نور زما د خلقو نۀ شى ګڼلے.“