Read Pashto Bible (Yusufzai) — د پښتو مقدس کتاب هجرت 31 Bible Online

هجرت 31 - Pashto Bible (Yusufzai) — د پښتو مقدس کتاب bible

هجرت 31

¹بيا مالِک خُدائ مُوسىٰ ته ووئيل،

²”ګوره! ما د يهُوداه قبيلې، بضلى‌اېل غوره کړے دے، چې د اورى زوئ اؤ د حُور نمسے دے،

³اؤ ما هغه د خپل رُوح نه ډک کړے دے. ما هغۀ له پوهه، هُنر اؤ د هر قِسم هُنر په کار کښې قابليت ورکړے دے.

⁴د سرو زرو، سپينو زرو اؤ د زېړو ښائسته کار کولو،

⁵قيمتى کاڼى پرې کولو اؤ تيارولو، د لرګى کار کولو، اؤ د هر قِسم د هُنر کار د پاره.

⁶اؤ ګوره، ما اهلياب هم خوښ کړے دے چې د اخيسمک زوئ دے اؤ د دان د قبيلې نه دے، چې هغوئ يو ځائ کار وکړى. ما نورو ټولو هُنر مندو له هم لوئ قابليت ورکړے دے، چې هغوئ هغه څۀ جوړ کړى چې ما حُکم ورکړے دے :

⁷زما د حضُور خېمه، د تړون صندُوق اؤ د کفارې تخت چې ورباندې پروت دے، د خېمې نور ټول سامان،

⁸مېز اؤ د هغې سامان، د سُوچه سرو زرو ډيوټ اؤ د هغې ټول سامان، د خوشبويۍ د سوزولو قُربان‌ګاه،

⁹د سوزېدُونکې نذرانې قُربان‌ګاه اؤ د هغې ټول سامان، د وينځلو ښانک اؤ د هغې بېخ،

¹⁰د هارُون اؤ د هغۀ د زامنو د پاره د اِمامانو ښائسته لِباس چې کله هغوئ د اِمامانو په توګه خِدمت کوى نو دا دې استعمالوى،

¹¹د غوړولو تېل اؤ د مُقدس ځائ د پاره خوشبويۍ. دا څيزُونه دې هم هغه شان جوړ کړى چې څنګه ما تا ته حُکم کړے دے.“

¹²بيا مالِک خُدائ مُوسىٰ له حُکم ورکړو،

¹³چې بنى اِسرائيلو ته ووايه، ”تاسو د سبت، يعنې د آرام کولو ورځ منئ، دا به په راتلُونکى ټولو وختُونو کښې زما اؤ ستاسو په مېنځ کښې يوه نښه وى، چې تاسو ته پته ولګې چې ما مالِک خُدائ تاسو خپل خلق جوړ کړئ.

¹⁴تاسو خامخا د سبت ورځ منئ، ځکه چې دا ستاسو د پاره مُقدسه ده. چې څوک هم دا نۀ منى اؤ په هغه ورځ کار کوى، نو هغه دې ووژلے شى. اؤ څوک چې په هغه ورځ باندې کار کوى نو هغه به د اِسرائيليانو نه نۀ شى ګڼلے.

¹⁵ستاسو سره د خپل کار کولو د پاره شپږ ورځې شته، خو اوومه ورځ د سبت يعنې د آرام ورځ ده، هغه ما مالِک خُدائ ته وقف شوې ده. هر څوک چې څۀ قِسم کار هم په هغه ورځ وکړى نو هغه دې ووژلے شى.

¹⁶بنى اِسرائيل دې دا ورځ د تړون د يوې نښې په توګه همېشه د پاره منى.

¹⁷دا به همېشه د پاره زما اؤ بنى اِسرائيلو په مېنځ کښې يوه نښه وى، ځکه چې ما مالِک خُدائ په شپږ ورځو کښې آسمان اؤ زمکه جوړ کړل اؤ په اوومه ورځ ما کار بس کړو اؤ آرام مې وکړو.“

¹⁸چې کله خُدائ پاک د سينا په غرۀ باندې د مُوسىٰ سره خبرې خلاصې کړې، نو هغۀ له يې هغه د کاڼى دوه تختې ورکړې چې په کُومو باندې خُدائ پاک په خپله حُکمونه ليکلى وُو.