Read Pashto Bible (Yusufzai) — د پښتو مقدس کتاب هجرت 35 Bible Online

هجرت 35 - Pashto Bible (Yusufzai) — د پښتو مقدس کتاب bible

هجرت 35

¹بيا مُوسىٰ د بنى اِسرائيلو ټول قوم راغونډ کړو اؤ هغوئ ته يې ووئيل، ”تاسو به د مالِک خُدائ په دې حُکمُونو باندې عمل کوئ :

²د خپل کار د پاره ستاسو سره شپږ ورځې شته، خو اوومه د سبت مُقدسه ورځ يعنې د آرام ورځ ده، هغه ما مالِک خُدائ ته وقف شوې ده. هر څوک چې څۀ قِسم کار هم په هغه ورځ وکړى نو هغه دې ووژلے شى.

³د سبت په ورځ په خپلو کورُونو کښې اور هم مۀ بلوئ.“

⁴مُوسىٰ د بنى اِسرائيلو ټول قوم ته ووئيل، ”مالِک خُدائ د دې حُکم کړے دے :

⁵مالِک خُدائ ته يوه نذرانه پېش کړئ. د چا زړۀ چې غواړى نو داسې څيزُونه په نذرانه کښې راوړلے شئ لکه سرۀ زر، سپين زر، يا زېړ،

⁶مهينه لټه، د آسمانى رنګ، بانجانى اؤ د سُور رنګ وړۍ، د چېلو د وړۍ نه جوړه شوې کپړا،

⁷سره رنګ شوې د ګډو څرمن، ښه څرمن، د کيکر لرګى،

⁸د ډيوو د پاره تېل، د غوړولو تېلو د پاره اؤ د خوشبويۍ د پاره مصالحې،

⁹سُليمانى کاڼى اؤ نور قيمتى کاڼى چې د مشر اِمام په پېش بند اؤ د هغۀ د سينې جېب باندې ولګولے شى.

¹⁰د ستاسو ټول ماهِر خلق دې راشى اؤ هغه هر څۀ دې جوړ کړى د کُوم چې مالِک خُدائ حُکم درکړے دے :

¹¹خېمه، د دې پړده اؤ د دې پاسنۍ پړده، د دې کُنډې، چوکاټُونه، د دې دُرشلې، ستنې اؤ د دې خپې،

¹²د تړون صندُوق، د دې بازوګان، د دې د کفارې تخت اؤ هغه پړده چې ورباندې پټېږى،

¹³مېز اؤ د هغې ټول سامان، خُدائ پاک ته پېش کړے شوې ډوډۍ،

¹⁴د رڼا د پاره ډيوټ اؤ د دې ټول سامان، ډيوې سره د تېلو،

¹⁵د خوشبويۍ سوزولو د پاره قُربان‌ګاه اؤ د دې بازوګان، د غوړولو تېل، د خوشبويۍ مصالحه، خېمې ته د ننوتلو دروازې د پاره پړده،

¹⁶قُربان‌ګاه چې په کُومه باندې نذرانې سوزولے شى، ورسره د دې د زېړو جالۍ، د دې بازوګان اؤ د دې ټول سامان، د وينځلو د پاره ښانک اؤ د دې بېخ،

¹⁷د دربار د پاره پړدې، د دې ستنې اؤ خپې، دربار ته د ننوتلو د پاره پړده،

¹⁸د خېمې اؤ د دربار د پړدو د پاره موږى اؤ رسۍ،

¹⁹اؤ د اِمامانو ښائسته لِباس چې په مُقدس ځائ کښې د خِدمت په وخت اغوستلے شى يعنې د هارُون اؤ د هغۀ د زامنو د پاره مُقدس لِباس چې د اِمامانو په توګه خِدمت کوى.“

²⁰د بنى اِسرائيلو ټول قوم د مُوسىٰ د حضُور نه لاړو،

²¹اؤ چې د چا زړۀ هم غوښتل نو هغوئ مالِک خُدائ ته يوه نذرانه راوړه چې د مالِک خُدائ د حضُور خېمه جوړه شى. هغوئ هغه هر څيز راوړو د کُوم چې په عِبادت کښې اؤ د اِمامانو د پاره مُقدس لِباس جوړولو کښې ضرُورت وو.

²²چې د چا زړۀ هم غوښتل، ټولو نرانو اؤ ښځو ښائسته ستنې، والۍ، ګوتې، امېلُونه اؤ د هر قِسم د سرو زرو کالى راوړل اؤ مالِک خُدائ ته يې وقف کړل.

²³هر يو کس چې د هغۀ سره مهينه لټه وه، د آسمانى رنګ، بانجانى، يا د سُور رنګ وړۍ، د چېلو د وړۍ نه جوړه کپړه، سره رنګ شوې د ګډو څرمن، يا ښه څرمن وه نو را يې وړل.

²⁴د هر چا هم چې د سپينو زرو يا د زېړو د پېش کولو وس وو نو هغوئ د مالِک خُدائ د پاره خپلې نذرانې راوړې اؤ چې د چا سره د کيکر لرګى وُو چې هغه د څۀ کار د پاره هم اِستعمالېدلے شو نو را يې وړل.

²⁵ټولو ماهِرو ښځو د مهينې لټې تار اؤ د آسمانى رنګ، بانجانى اؤ د سُور رنګ وړۍ تار راوړلو چې هغوئ په خپله جوړ کړے وُو.

²⁶ټولو ماهِرو ښځو چې د هغوئ زړۀ غوښتل د چېلو د وړۍ نه جوړه کپړه يې هم راوړه.

²⁷مشرانو سُليمانى کاڼى اؤ نور قيمتى کاڼى راوړل چې په پېش بند اؤ د سينې په جېب يې ولګوى.

²⁸اؤ مصالحې اؤ د ډيوو د پاره تېل، د غوړولو تېل اؤ د خوشبويۍ مصالحې يې هم راوړې.

²⁹ټولو بنى اِسرائيلو، نرانو اؤ ښځو چې د چا زړۀ هم غوښتل مالِک خُدائ ته يې د هغه کار د پاره خپلې نذرانې راوړې چې مالِک خُدائ مُوسىٰ ته حُکم ورکړے وو.

³⁰مُوسىٰ بنى اِسرائيلو ته ووئيل، ”مالِک خُدائ د يهُوداه د قبيلې بضلى‌اېل غوره کړے دے، چې د اورى زوئ اؤ د حُور نمسے دے.

³¹هغه خُدائ پاک د خپل رُوح نه ډک کړے دے اؤ هغۀ له يې پوهه، هُنر اؤ د هر قِسم هُنر په کار کښې قابليت ورکړے دے.

³²د سرو زرو، سپينو زرو اؤ زېړو ښائسته کار کولو د پاره،

³³د قيمتى کاڼى پرې کولو اؤ تيارولو، د لرګى کار کولو، اؤ د هر قِسم د هُنر کار د پاره.

³⁴مالِک خُدائ هغۀ له اؤ د دان قبيلې، د اخيسمک زوئ اهلياب له هم دا قابليت ورکړے دے چې خپل د هُنر کارُونه نورو ته وښائى.

³⁵هغۀ هغوئ له په هر قِسم کار کښې مهارت ورکړے دے چې هغوئ د زرګرانو، د ماهِرانو اؤ د مهينې لټې، د آسمانى رنګ، بانجانى اؤ د سُور رنګ وړۍ، اؤ د نورې کپړې د جوړونکى په توګه کار وکړى. هغوئ د هر قِسم کار مهارت لرُونکى کاريګران اؤ د نوو څيزُونو جوړولو اُستاذان دى.