Read Pashto Bible (Yusufzai) — د پښتو مقدس کتاب هجرت 36 Bible Online

هجرت 36 - Pashto Bible (Yusufzai) — د پښتو مقدس کتاب bible

هجرت 36

¹بضلى‌اېل، اهلياب اؤ نور ټولو ماهِرو کسانو له مالِک خُدائ مهارت اؤ پوهه ورکړې ده چې هغوئ هغه هر څۀ د مالِک خُدائ د حُکم په مُطابق جوړ کړى چې په مُقدسه خېمه کښې يې ضرُورت وى.“

²بيا مُوسىٰ بضلى‌اېل، اهلياب اؤ نور ټول ماهِر کسان راوغوښتل چا له چې مالِک خُدائ قابليت ورکړے وو اؤ چې د هغوئ زړۀ غوښتل چې کار وکړى اؤ مُوسىٰ ورته ووئيل چې کار شروع کړئ.

³هغوئ د مُوسىٰ نه هغه ټولې نذرانې اخستلې کُومې چې بنى اِسرائيلو د مُقدسې خېمې جوړولو د پاره راوړې وې. خو بنى اِسرائيلو به هر سحر خپلې نذرانې مُوسىٰ له راوړلې.

⁴نو هغه ماهِر کسان د خپل کار نه لاړل.

⁵اؤ مُوسىٰ ته يې ووئيل، ”مالِک خُدائ چې د کُوم کار کولو حُکم کړے دے خلق د هغه ضرُورت نه زياتې نذرانې راوړى.“

⁶نو مُوسىٰ اِعلان وکړو چې دا پېغام دې ټولو خېمو ته ورسولے شى چې نور به هيڅ څوک د مُقدسې خېمې د پاره هيڅ هم نۀ راوړى، نو خلق د نورو نذرانو راوړلو نه منع کړے شول.

⁷کُوم سامان چې د مخکښې نه راوړلے شوے وو هغه د ټول کار ختمولو نه ډېر زيات وو.

⁸د ټولو نه تکړه کسانو د مالِک خُدائ د حضُور خېمه جوړه کړه. هغوئ دا د مهينې لټې د لسو پړدو نه جوړه کړه چې د آسمانى رنګ، بانجانى اؤ د سُور رنګ وړۍ نه جوړې وې اؤ په دې باندې په ګُلکارۍ کښې د وزرو والا مخلُوق جوړ کړے شوى وُو.

⁹ټولې پړدې په يو ناپ وې هره يوه څوارلس ګزه اُوږده اؤ دوه ګزه پلنه وه.

¹⁰هغوئ پينځۀ پړدې يو ځائ وګنډلې اؤ هغه نورې پينځۀ يې هم يو ځائ وګنډلې.

¹¹هغوئ په هره جوړه کښې د پړدې په بهرنۍ غاړه د آسمانى رنګ د کپړې کَړۍ جوړې کړې.

¹²هغوئ د وړومبۍ جوړې په وړومبۍ پړده پنځوس کَړۍ اؤ پنځوس کَړۍ د دويمې جوړې په آخرى پړده جوړې کړې چې دا کَړۍ يو بل ته مخامخ وې.

¹³پنځوس د سرو زرو کُنډې يې جوړې کړې اؤ هغه پړدې يې د يوې بلې سره مِلاؤ کړې نو داسې ټوله مُقدسه خېمه يو ځائ شوه.

¹⁴بيا هغوئ د چېلو د وړۍ نه جوړې شوې يولس پړدې واخستلې اؤ د خېمې پټولو د پاره يې يوه پړده ترې نه جوړه کړه.

¹⁵هغوئ دا ټولې په يو ناپ جوړې کړې چې پينځلس ګزه اُوږدې اؤ دوه ګزه پلنې وې.

¹⁶هغوئ پينځۀ پړدې يو ځائ وګنډلې اؤ هغه نورې شپږ يې هم يو ځائ وګنډلې.

¹⁷د يوې جوړې د آخرى پړدې په غاړه يې پنځوس کَړۍ جوړې کړلې اؤ د هغه بلې جوړې په غاړه يې هم پنځوس کَړۍ جوړې کړلې.

¹⁸هغوئ د زېړو پنځوس کُنډې جوړې کړې اؤ هغه يې په کړو کښې واچولې چې هغه دوه جوړې يې سره مِلاؤ کړې نو داسې خېمه وتړلے شوه.

¹⁹هغوئ دوه نورې پړدې هم جوړې کړې، يوه پړده يې د ګډو د څرمنې نه چې سُور رنګ ورکړے شوے وو اؤ بله يې د ښې څرمنې نه جوړه کړه، چې د پاس نه پرې خېمه پټه کړے شى.

²⁰هغوئ د خېمې د ودرولو د پاره د کيکر د لرګى چوکاټُونه جوړ کړل.

²¹هر يو چوکاټ پينځلس فُټه اُوږد وو اؤ اووۀ‌ويشت اِنچې پلن وو،

²²سره د دوه يو شان تختو، چې دا چوکاټُونه په خپلو کښې ونښلوى. د ټولو چوکاټُونو دا تختې وې.

²³هغوئ د خېمې جنُوبى طرف د پاره شل چوکاټُونه جوړ کړل

²⁴اؤ څلوېښت د سپينو زرو خپې چې ورلاندې شى، د هر يو چوکاټ لاندې دوه دوه خپې چې هغه دوه وړاندينۍ حِصې يې نيولې وې.

²⁵هغوئ د خېمې شمالى طرف د پاره هم شل چوکاټُونه جوړ کړل

²⁶اؤ څلوېښت د سپينو زرو خپې، چې د هر يو چوکاټ لاندې دوه دوه وې.

²⁷د نمرپرېواتۀ په طرف خېمې شا ته هغوئ شپږ چوکاټُونه جوړ کړل

²⁸اؤ دوه چوکاټُونه يې د خېمې د ګوټُونو د پاره هم جوړ کړل.

²⁹د ګوټُونو دا چوکاټُونه په بېخ کښې مِلاؤ وُو اؤ د لاندې نه واخله تر سر پورې خپلو کښې انښتى وُو. دا دوه چوکاټُونه هم د ګوټُونو د دوه چوکاټُونو په شان جوړ شوى وُو.

³⁰نو اتۀ چوکاټُونه اؤ شپاړس د سپينو زرو خپې وې، چې د هر چوکاټ لاندې دوه دوه وې.

³¹هغوئ د کيکر د لرګى نه پينځلس لاړى جوړ کړل، پينځۀ د خېمې د هغو چوکاټُونو د پاره چې په يو طرف باندې وُو،

³²پينځۀ د هغو چوکاټُونو د پاره چې په بل طرف باندې وُو اؤ پينځۀ د هغه چوکاټُونو د پاره چې نَمرخاتۀ په طرف شا ته په آخِر سر کښې وُو.

³³تير د يو سر نه تر بل سره پورې پُوره رسېدلے وو.

³⁴هغوئ په چوکاټُونو د سرو زرو پترى خېژولې وُو اؤ د سرو زرو کَړۍ يې ورله جوړې کړې وې چې لاړى ونيسى، په لاړو باندې هم د سرو زرو پترى خېژولے شوى وُو.

³⁵هغوئ د مهينې لټې نه يوه پړده جوړه کړه چې د آسمانى، بانجانى اؤ د سُور رنګ وړۍ نه تياره شوې وه اؤ په دې باندې يې په ګُلکارۍ کښې د وزرو والا مخلُوق جوړ کړے وو.

³⁶هغوئ د کيکر د لرګى نه څلور ستنې جوړې کړې چې پړده په کښې په کُنډو کښې راځوړنده شى، په دې ستنو باندې د سروزرو پترى خېژولے شوى وُو. بيا هغوئ څلور د سپينو زرو خپې ورله جوړې کړې چې ستنې ونيسى.

³⁷هغوئ د خېمې د ننوتلو دروازې د پاره د مهينې لټې نه يوه پړده جوړه کړه چې د آسمانى، بانجانى اؤ د سُور رنګ وړۍ نه تياره شوې وه اؤ چې په ګُلکارۍ باندې ښائسته کړے شوې وه.

³⁸د دې پړدې د پاره هغوئ پينځۀ ستنې جوړې کړې چې کُنډې په کښې لګېدلې وې، د دې په سرُونو اؤ سيخُونو د سرو زرو پترى خېژولے شوى وُو اؤ د دې ستنو د پاره يې پينځۀ د زېړو خپې جوړې کړې.