Read Pashto Bible (Yusufzai) — د پښتو مقدس کتاب هجرت 38 Bible Online

هجرت 38 - Pashto Bible (Yusufzai) — د پښتو مقدس کتاب bible

هجرت 38

¹د سوزېدُونکې نذرانې د پاره، د کيکر د لرګى نه هغۀ يوه قُربان‌ګاه جوړه کړه. هغه څلور‌ګوټه وه، چې اووۀ نيم فُټه اُوږده وه، اووۀ نيم فُټه پلنه اؤ څلور نيم فُټه لوړه وه.

²هغۀ د څلورو ګوټُونو د پاره د ښکرو په شان څيزُونه جوړ کړل چې د قُربان‌ګاه سره يو ځائ کړل. هغۀ په دې هر څۀ باندې د زېړو پترى خېژولى وُو.

³هغۀ د قُربان‌ګاه د پاره دا ټول سامان هم جوړ کړو : د ايرو د لرې کولو د پاره لوښى، بېلچې، جامُونه، درې غاښى اؤ د ګرمې ايرې لرې کولو د پاره لُوښى. دا ټول سامان د زېړو نه جوړ وو.

⁴هغۀ د زېړو يوه جالۍ جوړه کړه اؤ دا يې د قُربان‌ګاه د ژۍ لاندې کېښوده، چې د قُربان‌ګاه مېنځ ته رسېدلې وه.

⁵هغۀ څلور کَړۍ جوړې کړې اؤ په څلورو ګوټُونو يې ورله ولګولې.

⁶هغۀ د وړولو د پاره د کيکر د لرګى نه ورله څلور بازوګان جوړ کړل اؤ د زېړو پترى يې ورباندې وخېژول،

⁷اؤ د قُربان‌ګاه دواړو طرفُونو ته چې کُومې کَړۍ وې په هغو کښې يې ولګولې. قُربان‌ګاه د لرګى تختو نه جوړه وه اؤ د مينځ نه تشه وه.

⁸هغۀ د زېړو ښانک اؤ د دې بېخ د هغه ښځې د زېړو د ائينو نه جوړ کړو کُومې چې د مالِک خُدائ د حضُور خېمې په دروازه کښې خِدمت کولو.

⁹هغۀ د مهينې لټې د پړدو نه د مالِک خُدائ د حضُور خېمې د پاره دربار جوړ کړو. د جنُوب په طرف پړدې پنځوس ګزه اُوږدې وې،

¹⁰دا د زېړو شلو ستنو اؤ د زېړو په شلو خپو کښې، د سپينو زرو کُنډو اؤ د سپينو زرو سيخُونو په ذريعه ټينګې کړے شوې وې.

¹¹دربار د شمال په طرف هم دومره وو.

¹²د نمرپرېواتۀ طرف هم پينځۀ ويشت ګزه اُوږدې پړدې وې، سره د لسو ستنو اؤ لسو خپو اؤ د کُنډو اؤ سيخُونو چې د سپينو زرو نه جوړ وُو.

¹³نَمرخاتۀ طرف، چرته چې دروازه وه، هلته هم دربار پينځۀ ويشت ګزه اُوږد وو.

¹⁴د دروازې دواړو طرفُونو ته د درې ستنو اؤ درې خپو سره اووۀ نيم ګزه پړدې وې.

¹⁶د دربار ګېر‌چاپېره ټولې پړدې د مهينې لټې نه جوړې وې.

¹⁷د ستنو خپې د زېړو نه جوړې کړے شوې وې اؤ د دې کُنډې، سيخُونه اؤ د ستنو د پاسه سرُونه د سپينو زرو نه جوړ وُو. د دربار ګېر‌چاپېره ټولې ستنې د سپينو زرو سيخُونو سره نښلولے شوې وې.

¹⁸د دربار د دروازې پړده د مهينې لټې نه جوړه وه چې د آسمانى رنګ، بانجانى اؤ د سُور رنګ وړۍ نه تياره شوې وه. اؤ په ګُلکارۍ ښائسته کړے شوې وه. دا د دربار د پړدو په شان، لس ګزه اُوږده اؤ دوه نيم ګزه اُوچته وه.

¹⁹دا د څلورو ستنو اؤ د زېړو څلورو خپو په ذريعه ټينګه کړے شوې وه، کُنډې، د ستنو پاسنى سرُونه اؤ سيخُونه يې د سپينو زرو نه جوړ وُو.

²⁰د خېمې اؤ د دربار د پاره ګېر‌چاپېره ټول موږى د زېړو نه جوړ شوى وُو.

²¹دا د هغه څيزُونو تفصيل دے کُوم چې د مالِک خُدائ د حضُور په خېمه کښې اِستعمال شوې وو، چرته چې د کاڼو هغه دوه تختې ساتلے شوې وې چې لس حُکمونه ورباندې ليکلے شوى وُو. د تفصيل د تيارولو حُکم مُوسىٰ ورکړے وو اؤ د دې کار د پاره د ليويانو مشر اِتمر وو چې د هارُون اِمام زوئ وو.

²²د يهُوداه د قبيلې، بضلى‌اېل، چې د اورى زوئ اؤ د حُور نمسے وو، هغه هر څۀ جوړ کړل چې مالِک خُدائ حُکم کړے وو.

²³د هغۀ مدد کوُونکے، د دان د قبيلې اهلياب د اخيسمک زوئ وو، هغه زرګر وو، هغه ماهِر اؤ د مهينې لټې اؤ د آسمانى رنګ، بانجانى اؤ د سُور رنګ وړۍ جوړُونکے هم وو.

²⁴مُقدسې خېمې د پاره مالِک خُدائ ته وقف شوى ټول سرۀ زر يو زر کيلو وُو، چې د منلے شوى معيار په مُطابق تَللے شوى وُو.

²⁵د بنى اِسرائيلو د مردم‌شمارۍ په وخت چې کُوم سپين زر راجمع شوى وُو، هغه درې زره څلور سوه اؤ دېرش کيلو وُو،

²⁶کُوم سړى چې په مردم‌شمارۍ کښې شامِل شوى وُو هر يو کس د منلے شوى معيار په مُطابق هغه مُقرر شوے قيمت ورکړو. په مردم‌شمارۍ کښې شامِل شوى سړى شپږ لاکهه درې زره پينځۀ سوه پنځوس وُو چې د هغوئ عُمر شل کاله يا د دې نه زيات وو.

²⁷درې زره اؤ څلور سوه کيلو سپين زر په کښې اِستعمال شوى وُو د مُقدسې خېمې د سلو خپو اؤ د پړدې د پاره، د هرې يوې خپې د پاره څلور دېرش کيلو اِستعمال شوى وُو.

²⁸د پاتې دېرش کيلو سپينو زرو نه بضلى‌اېل سيخُونه، د ستنو د پاره کُنډې اؤ د ستنو پاسنى سرُونه جوړ کړل.

²⁹کُوم زېړ چې مالِک خُدائ ته وقف شوى وُو هغه دوه زره څلور سوه اؤ پينځۀ ويشت کيلو وُو.

³⁰هغۀ د دې نه د مالِک خُدائ د حضُور خېمې د دروازې د پاره خپې، د زېړو قُربان‌ګاه سره د زېړو جالۍ اؤ د قُربان‌ګاه د پاره نور ټول سامان جوړ کړو،

³¹د دربار ګېر‌چاپېره اؤ د دربار د دروازې د پاره خپې اؤ د خېمې د پاره اؤ ګېر‌چاپېره د دربار د پاره ټول موږى يې ترې نه جوړ کړل.