Read Pashto Bible (Yusufzai) — د پښتو مقدس کتاب هجرت 39 Bible Online

هجرت 39 - Pashto Bible (Yusufzai) — د پښتو مقدس کتاب bible

هجرت 39

¹د آسمانى رنګ، بانجانى اؤ د سُور رنګ وړۍ نه هغوئ ښائسته لِباس جوړ کړو کُوم به چې اِمامانو په مُقدس ځائ کښې د خِدمت کولو په وخت اغوستلو. هغوئ د هارُون د پاره د اِمامانو لِباس جوړ کړو، هم هغه شان چې څنګه مالِک خُدائ مُوسىٰ ته حُکم کړے وو.

²هغوئ د مهينې لټې، د آسمانى رنګ، بانجانى اؤ د سُور رنګ وړۍ، اؤ د سرو زرو تار نه پېش بند جوړ کړو.

³هغوئ د سرو زرو پاڼې وټکولې اؤ نرى نرى تارُونه يې ترې نه جوړ کړل چې په مهينه لټه اؤ د آسمانى رنګ، بانجانى اؤ د سُور رنګ په وړۍ جوړولو کښې ترې نه کار اخستلے شو.

⁴هغوئ د پېش بند د پاره دواړو طرفو ته د ولى پټۍ لګولې وې، چې د دې په ذريعه تړلے شو.

⁵يو ښۀ ګلکارى شوے کمربند، چې هغه هم د هغه سامان نه جوړ وو، هغه د پېش بند سره نښلولے شوے وو اؤ ورسره يو ځائ شوے وو، هم هغه شان لکه څنګه چې مالِک خُدائ مُوسىٰ ته حُکم کړے وو.

⁶هغوئ سُليمانى کاڼى تيار کړل اؤ په سرو زرو کښې يې ګېر کړل، په دې باندې د يعقُوب د دولسو زامنو نومُونه د يو ماهِر زرګر په ذريعه ليکلے شوى وُو.

⁷هغوئ دا د پېش بند د ولى په پټو باندې ولګول چې د بنى اِسرائيلو د دولسو قبيلو نُمائندګى کوى، هم هغه شان لکه څنګه چې مالِک خُدائ مُوسىٰ له حُکم ورکړے وو.

⁸هغوئ هم د هغه سامان نه د سينې جېب جوړ کړو چې د کُوم نه پېش بند جوړ وو اؤ هم هغه شان ګلکارى ورباندې شوې وه.

⁹دا څلور‌ګوټه اؤ دوه غبرږه وو، نهۀ اِنچې اُوږد اؤ نهۀ اِنچې پلن وو.

¹⁰هغوئ په دې باندې څلور قطاره قيمتى کاڼى ولګول : په اول قطار کښې ياقُوت، يو زېړ ياقُوت اؤ لعل،

¹¹په دويم قطار کښې، يو زمرُد، يو شين ياقُوت اؤ يوه هيره،

¹²په دريم قطار کښې، يوه فېروزه، يو عقيق اؤ يو بانجانى ياقُوت،

¹³اؤ په څلورم قطار کښې يو شين بخن ياقُوت، يو سُليمانى کاڼے اؤ يو يشم کاڼے ولګولو. دا په سرو زرو کښې ګېر وُو.

¹⁴په دې دولسو کاڼو په هر يو کاڼى باندې د يعقُوب د يو زوئ نُوم ليکلے وو، چې د بنى اِسرائيلو د دولسو قبيلو نُمائندګى وشى.

¹⁵د سينې جېب د پاره هغوئ د سُوچه سرو زرو زنځيرُونه جوړ کړل، چې د تارُونو په شان تاؤ شوى وُو.

¹⁶هغوئ د کاڼو ګېرولو د پاره د سرو زرو دوه څيزُونه جوړ کړل اؤ د سرو زرو دوه کَړۍ اؤ دا دوه کَړۍ يې د سينې جېب په بره ګوټُونو پورې ونښلولې.

¹⁷هغوئ د سرو زرو هغه دوه زنځيرُونه په دوه کَړو پورې يې وتړل

¹⁸اؤ د زنځيرُونو نور دوه سرُونه يې په هغه دوه څيزُونو پورې وتړل چې په هغې کښې کاڼى ګېر کړے شوى وُو اؤ داسې يې دا د پېش بند د ولى په پټو پورې مخکښې ونښلول.

¹⁹هغوئ دوه د سرو زرو کَړۍ جوړې کړې اؤ دا يې د سينې جېب لاندې ګوټُونو دننه غاړې ته د پېش بند خوا کښې ونښلولې.

²⁰هغوئ د سرو زرو دوه نورې کَړۍ هم جوړې کړې اؤ دا يې په لاندې حِصه پورې د پېش بند د ولى دوه پټو په مخکښې ونښلولې چې ګنډ ته نزدې وې اؤ په ګُلکارۍ ښائسته کړے شوى کمر‌بند د پاسه وې.

²¹هم هغه شان چې څنګه مالِک خُدائ مُوسىٰ ته حُکم ورکړے وو، هغوئ د سينې د جېب کَړۍ د پېش بند کړو پورې د آسمانى رنګ مزى سره وتړلې، نو چې داسې د سينې جېب په کمر‌بند باندې پروت وى اؤ چې ترې نه لرې کېږى نه.

²²چې کُومه چُوغه د پېش بند لاندې اغوستلے کېږى هغه ټوله د آسمانى رنګ وړۍ نه جوړه شوې وه.

²³په هغې کښې د سر د پاره يو سُورے وو، چې غاړه يې مضبُوطه ګنډلے شوې وه چې ونۀ شلېږى.

²⁴د دې په لاندې غاړه باندې هغوئ د آسمانى رنګ، بانجانى اؤ د سُور رنګ تار انار جوړ کړل اؤ د هر انار په مېنځ کښې د سرو زرو ټلۍ وې، هم هغه شان چې څنګه مالِک خُدائ مُوسىٰ له حُکم ورکړے وو.

²⁵

²⁶

²⁷هغوئ د هارُون اؤ د هغۀ د زامنو د پاره قميصُونه جوړ کړل،

²⁸اؤ پټکے، ټوپۍ اؤ د لټې جانګى،

²⁹اؤ د مهينې لټې اؤ د آسمانى رنګ، بانجانى اؤ د سُور رنګ وړۍ نه يې کمربند جوړ کړو چې ګلکارى ورباندې شوې وه، هم هغه شان لکه چې څنګه مالِک خُدائ مُوسىٰ له حُکم ورکړے وو.

³⁰هغوئ د سُوچه سرو زرو نه نښه جوړه کړه اؤ په دې باندې يې وليکل ”مالِک خُدائ ته وقف شوے“.

³¹هغوئ دا د يو آسمانى رنګ مزى سره د پټکى مخې ته وتړله، هم هغه شان څنګه چې مالِک خُدائ مُوسىٰ له حُکم ورکړے وو.

³²د مالِک خُدائ د حضُور خېمې ټول کار په ښۀ توګه سر ته ورسېدو. بنى اِسرائيلو هر څۀ هم هغه شان وکړل چې څنګه مالِک خُدائ مُوسىٰ له حُکم ورکړے وو.

³³هغوئ خېمه اؤ د هغې ټول سامان مُوسىٰ له راوړو، د دې کُنډې، چوکاټُونه، لاړى، ستنې اؤ د دې خپې،

³⁴د ګډو څرمنې نه جوړه شوې پړده چې سُور رنګ ورکړے شوے وو، د ښې څرمنې نه جوړه پړده، د پټولو والا پړده،

³⁵د تړون صندُوق چې د کاڼو تختې په کښې پرتې وې، د دې د وړلو د پاره بازوګان اؤ د دې د کفارې تخت هم،

³⁶مېز اؤ د دې ټول سامان اؤ خُدائ پاک ته پېش کړے شوې ډوډۍ،

³⁷د سُوچه سرو زرو ډيوټ، د دې ډيوې اؤ د دې ټول سامان اؤ د ډېوو د پاره تېل،

³⁸د سرو زرو قُربان‌ګاه، د غوړولو تېل، د خوشبويۍ مصالحې، خېمې ته د ننوتلو دروازې د پاره پړده،

³⁹د زېړو قُربان‌ګاه اؤ ورسره د دې د زېړو جالۍ، د دې د وړلو د پاره بازوګان اؤ د دې ټول سامان، د وينځلو د پاره ښانک اؤ د دې بېخ،

⁴⁰د دربار د پاره پړدې اؤ د دې ستنې اؤ خپې، دربار ته د ننوتلو د پاره پړده اؤ د دې رسۍ، د خېمې د پاره موږى، اؤ هغه ټول سامان چې په خېمه کښې اِستعمالېدلو،

⁴¹اؤ د اِمامانو ښائسته لِباس چې په مُقدس ځائ کښې د خِدمت په وخت اغوستلے شو. د هارُون اؤ د هغۀ د زامنو د پاره مُقدس لِباس وو چې کله هغوئ د اِمامانو په توګه خِدمت کولو.

⁴²بنى اِسرائيلو ټول کار هم هغه شان سر ته رسولے وو چې څنګه مالِک خُدائ مُوسىٰ له حُکم ورکړے وو.

⁴³مُوسىٰ هغه ټول کار ته وکتل اؤ وې ليدل چې هغوئ دا په صحيح توګه هم هغه شان کړے وو څنګه چې مالِک خُدائ حُکم کړے وو. نو مُوسىٰ د هغوئ د پاره برکت وغوښتلو.