Read Pashto Bible (Yusufzai) — د پښتو مقدس کتاب هجرت 7 Bible Online

هجرت 7 - Pashto Bible (Yusufzai) — د پښتو مقدس کتاب bible

هجرت 7

¹مالِک خُدائ مُوسىٰ ته ووئيل، ”ګوره! زۀ تا فِرعون ته د خُدائ په شان جوړوم اؤ ستا ورور هارُون به ستا د پېغمبر په توګه د هغۀ سره خبرې کوى.

²چې څنګه ما حُکم درکړے دے هارُون ته هغه هر څۀ ووايه اؤ هغه به فِرعون ته ووائى چې بنى اِسرائيل د هغۀ د وطن نه تلو ته پرېږدى.

³زۀ به د فِرعون زړۀ سخت کړم، کۀ زۀ هر څومره زياتې نښې اؤ مُعجزې په مِصر کښې ښکاره کړم خو هغه به ستا خبره وانۀ ورى. بيا به زۀ د مِصريانو خِلاف د خپل لوئ طاقت نه کار واخلم اؤ دوئ له به سخته سزا ورکړم. اؤ زۀ به د خپل قوم خلق، بنى اِسرائيل د مِصر وطن نه وباسم.

⁵نو مِصريانو ته به پته ولګې چې زۀ مالِک خُدائ يم، چې کله زۀ د دوئ خِلاف خپل لاس اُوچت کړم نو بنى اِسرائيل به د هغوئ د وطن نه بهر بوځم.“

⁶مُوسىٰ اؤ هارُون هم هغسې وکړل، لکه څنګه چې مالِک خُدائ حُکم ورکړے وو.

⁷په هغه وخت چې کله دوئ فِرعون سره خبرې وکړې، مُوسىٰ د اتيا کالو وو اؤ هارُون د درې اتياؤ کالو وو.

⁸مالِک خُدائ مُوسىٰ اؤ هارُون ته ووئيل،

⁹”کله چې فِرعون تاسو ته ووائى چې تاسو يوه مُعجزه ښکاره کړئ، نو هارُون ته ووايه چې خپله امسا راواخلى اؤ د فِرعون په مخکښې يې وغورزوى، نو يو مار به ترې نه جوړ شى.“

¹⁰نو مُوسىٰ اؤ هارُون فِرعون له لاړل اؤ هغسې يې وکړل چې څنګه مالِک خُدائ حُکم ورکړے وو. هارُون خپله امسا د فِرعون اؤ د هغۀ د درباريانو په مخکښې وغورزوله، نو يو مار ترې نه جوړ شو.

¹¹نو فِرعون هم خپل د غېب عِلم لرُونکى خلق اؤ جادُوګران راوغوښتل اؤ هغوئ هم د جادُو په ذريعه هم دغسې وکړل.

¹²هغوئ خپلې امساګانې وغورزولې اؤ د امساګانو نه ماران جوړ شول. خو د هارُون امسا د هغوئ امساګانې تېرې کړې.

¹³خو د فِرعون زړۀ تر اوسه پورې سخت وو، لکه څنګه چې مالِک خُدائ وئيلى وُو، هغۀ به د مُوسىٰ اؤ هارُون خبره نۀ اؤرېدله.

¹⁴بيا مالِک خُدائ مُوسىٰ ته ووئيل، ”د فِرعون زړۀ سخت دے، هغه خلق تلو ته نۀ پرېږدى.

¹⁵په سحر کښې فِرعون له لاړ شه چې کله هغه د نيل درياب ته کُوزېږى. د خپل ځان سره هغه امسا هم يوسه چې مار ترې نه جوړ شوے وو اؤ د درياب په غاړه هغۀ ته ودرېږه.

¹⁶بيا فِرعون ته ووايه چې مالِک خُدائ د عبرانيانو خُدائ پاک، زۀ رالېږلے يم چې تا ته ووايم چې د هغۀ خلق تلو ته پرېږده چې دوئ په صحرا کښې د هغۀ عِبادت وکړى. خو ګوره! تا تر اوسه پورې دا خبره ونۀ منله.

¹⁷نو اوس، بادشاه سلامت! مالِک خُدائ به يو داسې کار وکړى چې تا ته پته ولګې چې هغه په رښتيا مالِک خُدائ دے. ګوره! زما په لاس کښې چې کُومه امسا ده زۀ د درياب اوبۀ په دې وهم اؤ د اوبو نه به وينه جوړه شى.

¹⁸کبان به مړۀ شى اؤ د درياب اوبۀ به دومره سخت بُوئ شروع کړى چې مِصريان به ترې اوبۀ نۀ شى څښلے.“

¹⁹مالِک خُدائ مُوسىٰ ته ووئيل، ”هارُون ته ووايه چې خپله امسا راواخلى اؤ د مِصر ټولو اوبو په طرف يعنى دريابُونو، نِهرونو اؤ ډنډُونو د پاسه ونيسى. نو د اوبو نه به وينه جوړه شى اؤ د مِصر په ټوله زمکه به وينه وى، داسې د لرګى په لوښو اؤ د خټې په منګو کښې به هم وى.“

²⁰نو مُوسىٰ اؤ هارُون هم هغسې وکړل چې څنګه مالِک خُدائ حُکم کړے وو. د فِرعون اؤ د هغۀ درباريانو په مخکښې، هارُون خپله امسا اُوچته کړه اؤ د درياب اوبۀ يې پرې ووهلې اؤ د درياب د ټولو اوبو نه وينه جوړه شوه.

²¹په درياب کښې کبان مړۀ شول اؤ دومره سخا بُوئ يې کولو چې مِصريانو د درياب نه اوبۀ نۀ شوې څښلے. اؤ د مِصر په ټول وطن کښې وينه وه.

²²بيا د فِرعون جادُوګرانو د خپل جادُو په ذريعه هم دغه شان وکړل اؤ د فِرعون زړۀ هم هغه شان سخت وو. لکه څنګه چې مالِک خُدائ وئيلى وُو، هغۀ د مُوسىٰ اؤ هارُون د خبرې اؤرېدو نه اِنکار وکړو.

²³فِرعون راوګرځېدو اؤ خپل محل ته لاړو، دا خبره يې زړۀ ته ښکته نۀ کړه.

²⁴ټولو مِصريانو د څښلو د اوبو د پاره د درياب غاړه وکنستله، ځکه چې هغوئ د درياب اوبۀ نۀ شوې څښلے.

²⁵چې مالِک خُدائ په درياب آفت راوستلے وو نو اووۀ ورځې د هغې نه پس تېرې شوې.