Read Pashto Bible (Yusufzai) — د پښتو مقدس کتاب هجرت 8 Bible Online

هجرت 8 - Pashto Bible (Yusufzai) — د پښتو مقدس کتاب bible

هجرت 8

¹بيا مالِک خُدائ مُوسىٰ ته ووئيل، ”فِرعون له ورشه اؤ هغۀ ته ووايه چې مالِک خُدائ وائى، زما خلق تلو ته پرېږده چې دوئ زما عِبادت وکړى.

²کۀ تا اِنکار وکړو، نو زۀ تا خبروم، چې زۀ به ستا په ټول وطن داسې آفت راولم چې په چيندخو به يې پټ کړم.

³د نيل درياب به د بې‌شمېره چيندخو نه ډک وى. دا به ستا محل، ستا د څملاستو کوټې اؤ کټ ته، ستا د درباريانو اؤ د خلقو کورُونو ته اؤ ستاسو تنورُونو اؤ د اوړو ښانکُونو ته به هم دروخېژى.

⁴چيندخې به په تا، ستا په خلقو اؤ ستا په ټولو درباريانو دروخېژى.“

⁵مالِک خُدائ مُوسىٰ ته ووئيل، ”هارُون ته ووايه چې خپله امسا د دريابُونو، نِهرونو اؤ ډنډُونو د پاسه ونيسه اؤ چيندخې به د مِصر په وطن وروخېژوى.“

⁶نو هارُون دا د ټولو اوبو د پاسه ونيوله اؤ چيندخې راوختلې اؤ ټول وطن يې پټ کړو.

⁷خو جادُوګرانو د جادُو نه کار واخستلو اؤ دوئ هم چيندخې جوړې کړې اؤ د مِصر وطن ته يې راوړلې.

⁸نو فِرعون مُوسىٰ اؤ هارُون راوغوښتل اؤ ورته يې ووئيل، ”مالِک خُدائ ته سوال وکړئ چې دا چيندخې لرې کړى، نو زۀ به ستاسو خلق تلو ته پرېږدم، نو دوئ به مالِک خُدائ ته قُربانۍ پېش کړى.“

⁹مُوسىٰ ورته ووئيل، ”بادشاه سلامت! تۀ صِرف وخت مُقرر کړه چې زۀ ستا، ستا درباريانو اؤ ستا د خلقو د پاره سوال وکړم. چې تۀ اؤ ستاسو کورُونه د چيندخو نه خلاص شى اؤ د نيل درياب نه بغېر به هيچرته هم پاتې نۀ شى.“

¹⁰فِرعون ورته ووئيل، ”سبا زما د پاره سوال وکړه.“ مُوسىٰ ورته ووئيل، ”زۀ به هم دغسې وکړم لکه څنګه چې تا ووئيل نو بيا به تا ته پته ولګې چې د مالِک خُدائ زمُونږ د خُدائ پاک په شان بل هيڅ څوک هم نشته.

¹¹تۀ، ستا درباريان اؤ ستا خلق به د چيندخو نه خلاص شى اؤ د نيل درياب نه بغېر به هيچرته هم پاتې نۀ شى.“

¹²بيا مُوسىٰ اؤ هارُون د فِرعون د دربار نه لاړل. چې کله مُوسىٰ مالِک خُدائ ته سوال وکړو چې هغه چيندخې لرې کړى کُومې چې هغۀ په فِرعون راوستلې وې،

¹³نو مالِک خُدائ هم هغه شان وکړل چې څنګه مُوسىٰ وئيلى وُو اؤ په کورُونو، صِحنُونو اؤ په پټو کښې چيندخې مړې شوې.

¹⁴مِصريانو دا راغونډې کړې اؤ لوئ ډېرى يې ترې ودرول اؤ ټول وطن سخا بُوئ کولو.

¹⁵فِرعون چې کله دا وليدل چې خېر شو، نو هغۀ بيا خپل زړۀ سخت کړو، لکه څنګه چې مالِک خُدائ وئيلى وُو، چې فِرعون به د مُوسىٰ اؤ هارُون خبره نۀ اورى.

¹⁶مالِک خُدائ مُوسىٰ ته ووئيل، ”هارُون ته ووايه چې زمکه په خپله امسا ووهه، نو د ټول مِصر د وطن خاورې نه به ماشى جوړ شى.“

¹⁷نو هارُون زمکه په خپله امسا ووهله اؤ د مِصر د وطن د ټولې خاورې نه ماشى جوړ شول، چې ټول خلق اؤ ځناور يې پټ کړل.

¹⁸جادُوګرانو هم زمکه ووهله چې د خپل جادُو نه کار واخلى چې ماشى راولى، خو دوئ ناکام شول. نو ماشى په بنيادمو اؤ ځناورو پورې نښتى وُو،

¹⁹بيا جادُوګرانو فِرعون ته ووئيل، ”دا د خُدائ پاک کار دے!“ خو د فِرعون زړۀ سخت وو، لکه څنګه چې مالِک خُدائ وئيلى وُو، چې فِرعون به د مُوسىٰ اؤ هارُون خبره نۀ اورى.

²⁰بيا مالِک خُدائ مُوسىٰ ته ووئيل، ”سبا سحر وختى لاړ شه اؤ د فِرعون سره مِلاؤ شه چې کله هغه درياب ته ځى نو هغۀ ته ووايه چې مالِک خُدائ وائى، زما خلق تلو ته پرېږده چې دوئ زما عِبادت وکړى.

²¹کۀ تۀ زما خلق تلو ته پرې نۀ ږدې، نو زۀ به په تا، ستا په درباريانو اؤ ستا په خلقو بې‌شمېره مچان درولېږم، د مِصريانو کورُونه به د مچانو نه ډک وى اؤ زمکه به ورباندې پټه وى.

²²خو په هغه ورځ به زۀ د جشن علاقه بچ کړم، چرته چې زما خلق اوسېږى، نو هلته به مچان بېخى نۀ وى. زۀ چې داسې وکړم نو تا ته به پته ولګې چې زۀ مالِک خُدائ، په دې وطن کښې حاضر يم.

²³اؤ زۀ به د خپلو خلقو اؤ ستا د خلقو په مېنځ کښې فرق راولم. دا نښه به سبا څرګنده شى.“

²⁴مالِک خُدائ هم داسې وکړل اؤ بې‌شمېره مچان د فِرعون محل ته اؤ د هغۀ د درباريانو کورُونو ته راننوتل. د بې‌شمېره مچانو په وجه د مِصر ټول وطن وران شو.

²⁵نو فِرعون مُوسىٰ اؤ هارُون راوغوښتل اؤ ورته يې ووئيل، ”لاړ شئ اؤ هم په دې وطن کښې خپل خُدائ پاک ته قُربانۍ پېش کړئ.“

²⁶خو مُوسىٰ ورته ووئيل، ”داسې کول به ټيک نۀ وى، چې کُوم ځناور مُونږ قُربانى کوُو اؤ مُونږ يې مالِک خُدائ خپل خُدائ پاک ته پېش کوُو د هغې په وجه به مِصريان نفرت کوى. کۀ د دې ځناورو د حلالولو په وجه مِصريان زمُونږ نه نفرت وکړى نو چې چرته هغوئ مُونږ ووينى، نو مونږ به سنګسار کړى.

²⁷مُونږ به خامخا په صحرا کښې درې ورځې سفر کوُو چې مالِک خُدائ خپل خُدائ پاک ته په صحرا کښې قُربانۍ پېش کړُو، لکه څنګه چې هغۀ مُونږ له حُکم راکړے دے.“

²⁸نو فِرعون ووئيل، ”زۀ به تاسو تلو ته پرېږدم چې مالِک خُدائ، خپل خُدائ پاک ته په صحرا کښې قُربانۍ پېش کړئ، خو تاسو ډېر لرې مۀ ځئ. زما د پاره سوال وکړه.“

²⁹مُوسىٰ ورته ووئيل، ”چې څنګه زۀ لاړ شم، نو زۀ به مالِک خُدائ ته سوال وکړم چې سبا ستا، ستا د درباريانو اؤ ستا د خلقو نه مچان لاړ شى. خو چې بيا تۀ مُونږ له دهوکه رانۀ کړې اؤ چې خلق د تلو نه ايسار نۀ کړې چې مالِک خُدائ ته قُربانۍ وکړى.“

³⁰مُوسىٰ د فِرعون د دربار نه لاړو اؤ مالِک خُدائ ته يې سوال وکړو،

³¹نو مالِک خُدائ د مُوسىٰ سوال قبُول کړو. مچان د فِرعون، د هغۀ د درباريانو اؤ د هغۀ د خلقو نه لاړل، يو مچ هم پاتې نۀ شو.

³²خو دا ځل هم فِرعون زړۀ سخت کړو اؤ بيا يې خلق تلو ته نۀ پرې ښودل.