Read Pashto Bible (Yusufzai) — د پښتو مقدس کتاب هجرت 9 Bible Online

هجرت 9 - Pashto Bible (Yusufzai) — د پښتو مقدس کتاب bible

هجرت 9

¹بيا مالِک خُدائ مُوسىٰ ته ووئيل، ”فِرعون له لاړ شه اؤ ورته ووايه چې مالِک خُدائ، د عبرانيانو خُدائ پاک وائى، چې زما خلق تلو ته پرېږده چې زما عِبادت وکړى.

²خو کۀ تۀ اِنکار کوې اؤ هغوئ بيا هم تلو ته نۀ پرېږدى،

³نو ګوره! زۀ به ستا په ټولو ځناورو، ستا په اسُونو، خرُونو، اُوښانو، څاروو، ګډو اؤ چېلو سخته بيمارى درولېږم.

⁴زۀ به د اِسرائيليانو اؤ د مِصريانو د څاروو په مېنځ کښې فرق راولم اؤ د اِسرائيليانو يو څاروے به هم نۀ مرى.

⁵ما مالِک خُدائ سبا وخت مُقرر کړے دے، زۀ به په دې وطن کښې داسې وکړم.“

⁶بله ورځ مالِک خُدائ هم هغسې وکړل لکه څنګه چې مالِک خُدائ وئيلى وُو، د مِصريانو ټول څاروى مړۀ شول، خو د بنى اِسرائيلو يو څاروے هم مړ نۀ شو.

⁷فِرعون تپوس وکړو چې څۀ شوى وُو اؤ هغۀ ته ووئيلے شول چې د اِسرائيليانو يو څاروے هم مړ نۀ شو. خو د هغۀ زړۀ سخت وو اؤ هغۀ به خلق تلو ته نۀ پرېښودل.

⁸بيا مالِک خُدائ مُوسىٰ اؤ هارُون ته ووئيل، ”د بټۍ نه يو څو لَپې ايرې راواخلئ، دا به مُوسىٰ د فِرعون په مخکښې د آسمان طرف ته لړه کړى.

⁹دا به د دُوړې په شان د مِصر په ټول وطن کښې خورې شى اؤ په هر ځائ کښې به دا دانې راوخېژوى چې په خلقو اؤ ځناورو به سخا شى.“

¹⁰نو هغوئ ايرې راواخستلې اؤ د فِرعون په مخکښې ودرېدل، مُوسىٰ دا د آسمان طرف ته لړه کړې، نو په خلقو اؤ ځناورو باندې دانې راوختلې اؤ سخا شوې.

¹¹جادُوګران د دې قابِل نۀ وُو چې د مُوسىٰ په مخکښې ولاړ وے، ځکه چې د نورو ټولو مِصريانو په شان دوئ هم په دانو پټ وُو.

¹²خو مالِک خُدائ د فِرعون زړۀ سخت کړو، لکه څنګه چې هغۀ وئيلى وُو، چې فِرعون به د مُوسىٰ اؤ هارُون خبره نۀ اورى.

¹³بيا مالِک خُدائ مُوسىٰ ته ووئيل، ”سحر وختى پاڅه اؤ د فِرعون په مخکښې ودرېږه اؤ هغۀ ته ووايه چې مالِک خُدائ، د عبرانيانو خُدائ پاک وائى، چې زما خلق تلو ته پرېږده چې دوئ زما عِبادت وکړى.

¹⁴دا ځل به زۀ نۀ صِرف ستا درباريانو اؤ ستا خلقو له سزا ورکوم، بلکې دغه شان تا له به هم سزا درکوم، نو تا ته به پته ولګې چې په ټوله دُنيا کښې زما په شان بل هيڅ څوک هم نشته.

¹⁵کۀ ما خپل لاس اُوچت کړے وے اؤ تۀ اؤ ستا خلق مې په بيمارو وهلے وے، نو تاسو به د دُنيا نه ورک شوى وئ.

¹⁶خو ما تاسو د دې د پاره ژوندى پرېښودلى يئ چې خپل طاقت درته وښايم اؤ چې زما نُوم په ټوله دُنيا کښې خور شى.

¹⁷خو تر اوسه پورې تۀ مغرُور يې اؤ زما خلق تلو ته نۀ پرېږدى.

¹⁸ګوره! سبا دا وخت به زۀ درته ږلۍ ووروم، چې داسې ږلۍ به کله د مِصر په تاريخ کښې هم نۀ وى شوې.

¹⁹اوس خپل څاروى راولئ اؤ چې په پټو کښې ستاسو نور څۀ هم وى هغه محفوظ ځائ ته راوړئ. ږلۍ به په بهر پاتې خلقو اؤ ځناورو باندې وورېږى اؤ ټول به مړۀ شى.“

²⁰د فِرعون کُوم درباريان چې د مالِک خُدائ د خبرې نه ويرېدل نو هغوئ خپل نوکران اؤ څاروى په منډه باندې کورُونو ته بوتلل.

²¹خو چا چې د مالِک خُدائ خبرو ته غوږ کښې نۀ ښودلو نو هغوئ خپل نوکران اؤ څاروى بهر په پټو کښې پرېښودل.

²²بيا مالِک خُدائ مُوسىٰ ته ووئيل، ”خپل لاس کښې امسا آسمان ته اُوږده کړه، نو د مِصر په ټول وطن، خلقو، ځناورو اؤ په پټو کښې په ټولو بُوټو به ږلۍ وورېږى.“

²³نو مُوسىٰ خپله امسا آسمان ته اُوږده کړه اؤ مالِک خُدائ تندر اؤ ږلۍ راولېږله اؤ برېښنا زمکه ووهله. مالِک خُدائ د ږلۍ يو لوئ طوفان اؤ آسمانى بجلى راولېږله. د مِصر په ټول تاريخ کښې هم داسې خراب طوفان کله هم نۀ وو تېر شوے.

²⁵د مِصر په وطن کښې بهر چې څۀ هم وُو هغه ټول ږلۍ ووهل، سره د ټولو خلقو اؤ ځناورو. ږلۍ په پټو کښې ټول بُوټى وغورزول اؤ ټولې ونې يې ماتې کړلې.

²⁶خو صِرف د جشن په علاقه کښې، چرته چې بنى اِسرائيل اوسېدل، هلته لږه ږلۍ هم نۀ وه ورېدلې.

²⁷فِرعون مُوسىٰ اؤ هارُون راوغوښتل اؤ ورته يې ووئيل، ”دا ځل زما نه ګُناه شوې ده، مالِک خُدائ صادق دے اؤ زۀ اؤ زما خلق بد عمله يُو.

²⁸مالِک خُدائ ته سوال وکړه! نور مُونږ دې ږلۍ اؤ تندرُونو ته نۀ شُو ټينګېدے. زۀ به تاسو تلو ته پرېږدم، تاسو به دلته نور نۀ ايسارېږئ.“

²⁹مُوسىٰ هغۀ ته ووئيل، ”زۀ چې څنګه د ښار نه لاړ شم، نو زۀ به د دُعا د پاره خپل لاسُونه مالِک خُدائ ته پورته کړم. نو تندر به بس شى اؤ نوره ږلۍ به نۀ ورېږى، نو داسې تا ته به پته ولګې چې زمکه د مالِک خُدائ ده.

³⁰خو ما ته پته ده چې تۀ اؤ ستا درباريان اوس هم د مالِک خُدائ، خُدائ پاک نه نۀ يرېږئ.“

³¹سُنډ اؤ اوربشې تباه شول، ځکه چې اوربشې پخې وې اؤ د سُنډو بُوټى غوټۍ شوى وُو.

³²خو د غنمو فصل خراب نۀ شو، ځکه چې دا وروستو پخېږى.

³³مُوسىٰ د فِرعون نه لاړو اؤ د ښار نه بهر ووتلو اؤ خپل لاسُونه يې مالِک خُدائ ته پورته کړل. تندرُونه، ږلۍ اؤ باران هر څۀ ودرېدل.

³⁴چې کله فِرعون ته پته ولګېده چې طوفان ختم شو، نو هغۀ بيا ګُناه وکړه. هغۀ اؤ د هغۀ درباريانو خپل زړُونه سخت کړل

³⁵اؤ لکه چې څنګه مالِک خُدائ د مُوسىٰ په ذريعه مخکښې وئيلى وُو، فِرعون بنى اِسرائيل تلو ته نۀ پرېښودل.