Read Pashto Bible (Yusufzai) — د پښتو مقدس کتاب ايُوب 10 Bible Online

ايُوب 10 - Pashto Bible (Yusufzai) — د پښتو مقدس کتاب bible

ايُوب 10

¹زۀ د خپل ژوند نه نفرت کوم، زۀ به ډېرشکايتُونه کوم، زۀ به په مايوسۍ کښې خبرې کوم.

²زۀ به خُدائ پاک ته ووايم چې ما مۀ رد کوه، او تۀ چې په ما کوم الزام لګوې نو د هغې نه ما خبر کړه.

³دا تا ته ښۀ ښکارى، چې ما په عذاب کړې، چې ما يعنې د خپلو لاسونو کار رد کړې او د بد کارو خلقو منصُوبو ته ښۀ ووايې؟

⁴ولې ستا نظر د انسانانو په شان دے؟ تۀ د انسان په شان کتل کوې څۀ؟

⁵ستا عُمر زمونږ په شان لنډ دے څۀ؟ يا ستا کالونه د انسانانو د کالونو په شان دى څۀ؟

⁶چې تۀ زما غلطى معلوموې او زما ګناه لټوې،

⁷اګر چې تا ته پته ده چې زۀ بې ګناه يم، او ستا د لاسونو نه مې هيڅ څوک نۀ شى بچ کولے.

⁸ستا لاسونو ما له صورت راکړو او جوړ يې کړم، او اوس مې بېخى تباه کوې.

⁹هغه راپه ياد کړه چې تا زۀ د خټو نه جوړ کړم، او اوس به تۀ ما بيا خاورې کوې؟

¹⁰تا زۀ د مور په خيټه کړم او زما وجود دې جوړ کړو.

¹¹تا زۀ د غوښى او څرمنې نه جوړ کړم، او د هډُوکو او پټو په ذريعه دې يو ځائ وتړلم.

¹²تا ما له ژوند او نۀ ختمېدونکې مينه راکړې ده، او تا زما د ژوند ښۀ حِفاظت کړے دے.

¹³خو اوس ما ته پته ولګېده چې تا د ډير وخت نه ما ته د نقصان دپاره پټه منصُوبه جوړه کړې وه.

¹⁴که زۀ ګناه وکړم نو تۀ ما وينې، او زما ګناه مۀ معاف کوه.

¹⁵که زۀ بد کاره يم، نو ما غمژن کړه! او که زۀ صادق يم، نو خپل سر نۀ شم اُوچتولے، ځکه چې زۀ د شرم سره مخ شوے يم او په غمونو کښې ډوب يم.

¹⁶او که زۀ خپل سر اُوچتوم، نو تۀ د ازمرى په شان زما ښکار کوې، اوخپل لوئ طاقت زما خِلاف استعمالوې.

¹⁷تۀ خپل ګواهان زما خِلاف بيا راتازه کړې، او خپله غصه زما خِلاف زياتوې، تۀ زما خِلاف تازه دم فوجيان رالېږې.

¹⁸تا زۀ د مور د خېټې نه ولې راوويستلم؟ کاش چې زۀ د خلقو د سترګو د ليدو نه مخکښې مړ شوے وے.

¹⁹ښۀ به دا وے چې د سره پېدا شوے نۀ وے او د مور د خېټې نه سيدها قبر ته تلے وے.

²⁰زما ژوند لنډ نۀ دے څۀ؟ ما پرېږده نو چې داسې يو ساعت په آرام شم.

²¹چې زۀ لاړ شم او بيا هيڅ کله راواپس نۀ شم، چې تور او د تکې تورې تيارې مُلک ته لاړ شم،

²²د نيمې شپې په شان تيارۀ، د لانجو مُلک ته، چرته چې رڼا هم د تيارې په شان وى.“