Read Pashto Bible (Yusufzai) — د پښتو مقدس کتاب ايُوب 12 Bible Online

ايُوب 12 - Pashto Bible (Yusufzai) — د پښتو مقدس کتاب bible

ايُوب 12

¹نو ايُوب جواب ورکړو:

²”په دې کښې هيڅ شک نشته چې تاسو په هر څۀ پوهېږئ، او چې کله تاسو مرئ نو ستاسو پوهه به ستاسو سره ختمه شى.

³خو زۀ هم ستاسو په شان پوهه لرم، زۀ ستاسو نه کم نۀ يم، چې تاسو څۀ وايئ نو په دې باندې هر څوک پوهېږى.

⁴زۀ د خپلو دوستانو دپاره يوه مسخره يم، زۀ چې خُدائ پاک ته آواز کوم نو هغه زما آواز اورې، زۀ يو داسې سړے يم چې صادق او بې داغه يم، خو زۀ مسخره جوړ شوے يم.

⁵کوم خلق چې په آرام وى نو هغوئ په هغه چا پورې خندا کوى چې څوک په تکليف کښې دى، او هغه خلقو له ديکه ورکوى د چا چې پښې خوئيږى.

⁶د ډاکوانو کورونه په آمن کښې وى، او چې څوک خُدائ پاک راپاروى نو هغه محفوظ وى، اګر چې هغوئ د خُدائ پاک په ځائ په خپل طاقت باندې بهروسه کوى.

⁷خو د ځناورو نه تپوس وکړئ او هغوئ به ستاسو رهنمائى وکړى، او په هوا کښې د مارغانو نه تپوس وکړئ، نو هغوئ به تاسو ته ښودنه وکړى،

⁸او د زمکې د بوټو نه تپوس وکړئ، نو دا به تاسو ته ښودنه وکړى، او د سمندر کبانو نه تپوس وکړئ نو هغه به تاسو ته دا بيان وکړى.

⁹ځکه چې هغوئ ټولو ته پته ده چې زما تکليف د مالِک خُدائ د طرف نه دے.

¹⁰د هغۀ په لاس کښې د هر ژوندى څيز ژوند دے او د هغۀ په لاس کښې د هر بشرساه ده.

¹¹ولى غوږونه د خبرو معائنه نۀ کوى لکه څنګه چې ژبه د خوراک خوند معلوموى؟

¹²ولى حِکمت د سپين ګيرو سره نۀ وى څۀ؟ ولى زيات عُمر سره پوهه نۀ راځى څۀ؟

¹³حِکمت او طاقت د خُدائ پاک سره دى، د هغۀ سره رهنمائى او پوهه شته دے.

¹⁴چې هغه څۀ وران کړى نو هيڅ څوک يې نۀ شى جوړولے، او چې هغه کوم سړے قېدى کړى نو هغه خلاصېدلے نۀ شى.

¹⁵که هغه باران ايسار کړى، نو زمکه به اوچه شى، که هغه اوبۀ راخوشې کړى، نو اوبۀ به زمکه تباه کړى.

¹⁶طاقت او حِکمت د هغۀ سره دے، دوکه خوړُونکے او دوکه ورکوُونکے د هغۀ د اختيار لاندې دى.

¹⁷هغه د مشرانو نه پوهه اخلى، او د قاضيانو نه کم عقلان جوړوى.

¹⁸هغه د بادشاهانو نه اِختيار واخلى، او د هغوئ نه غلامان جوړ کړى.

¹⁹هغه اِمامان شړى او اختيار ترې اخلى، او هغه طاقتور لرې کوى چې ډير وخت يې حکومت کړے وى.

²⁰هغه اعتبارى مشيران غلى کړى، د مشرانو نه حِکمت يوسى.

²¹هغه شهزادګان سپک کړى، او هغه د زورورو زور اوبۀ کوى.

²²هغه د قبر تيارۀ لرې کوى، او هغه تکه توره تيارۀ په رڼا بدلوى.

²³هغه قومونه تکړه کړى او بيا يې تباه کړى، هغه قومونه لوئ کړى او بيا يې پرېږدى.

²⁴هغه د دنيا د مشرانو نه پوهه ختموى، او پرې يې ږدى چې سرګردانه او پرېشانه ګرځى.

²⁵هغه مشران په تيارۀ کښې د ړندو په شان سرګردانه ګرځى، او د شرابى په شان يې ځنګېدلے کړى.