Read Pashto Bible (Yusufzai) — د پښتو مقدس کتاب ايُوب 13 Bible Online

ايُوب 13 - Pashto Bible (Yusufzai) — د پښتو مقدس کتاب bible

ايُوب 13

¹ګوره، زما سترګو دا هر څۀ ليدلى دى، او زما غوږُونو دا اورېدلى دى او پوهه شوے يم.

²چې تا ته د څۀ پته ده نو ما ته هم د هغې پته ده، زۀ تا نه څۀ کم نۀ يم.

³خو زۀ به د خُدائ تعالىٰ سره خبره وکړم، او زۀ غواړم چې هغۀ ته خپل ځان بې ګناه ثابت کړم.

⁴د حقيقت پټولو دپاره تاسو دروغ وايئ، او تاسو د بې‌کاره طبيبانو په شان يئ.

⁵مړه که تاسو خولې بندې کړى، نو دا به ستاسو عقلمندى وى!

⁶اوس تاسو زما بحث واورئ، او زما زارۍ واورئ.

⁷تاسو هغه څۀ وايئ څۀ چې خُدائ پاک نۀ دى وئيلى، او تاسو د هغۀ د خاطره پاره د دوکې خبرې کوئ څۀ؟

⁸تاسو به د هغۀ طرفدارى کوئ څۀ، تاسو به د خُدائ پاک صفائى کوئ څۀ؟

⁹دا به ستاسو دپاره ښۀ وى څۀ چې هغه ستاسو آزمېښت وکړى؟ يا تاسو هغه داسې دوکه کولے شئ، لکه چې تاسو نور کسان دوکه کوئ؟

¹⁰هغه به بې شکه تاسو ورَټى که تاسو په پټه طرفدارى وکړئ.

¹¹د هغۀ د شان نه به تاسو يرېږئ نه څۀ، او د هغۀ يره به په تاسو باندې غالبه نۀ شى؟

¹²ستاسو قيصې او متلونه د ايرو په شان بې‌کاره دى، او ستاسوخبرې د خټې د لوښو په شان کچه دى.

¹³تاسو غلى شئ او ما له د خبرو کولو موقع راکړئ، نو چې څۀ کېږى هغه دې په ما باندې وشى.

¹⁴زۀ به خپل ژوند په خطره کښې واچوم، او د خپل زړۀ خبره به وکړم.

¹⁵که هغه ما وژنى هم خو زۀ به په هغۀ توکل کوم، او زۀ به د هغۀ په مخکښې خپله دفاع کوم.

¹⁶او داسې به زۀ بچ شم ځکه چې زۀ څۀ کافر خو نۀ يم که زۀ وم نو بيا به زۀ د هغۀ په مخکښې نۀ شوم اودريدے.

¹⁷زما خبره په غور سره واورئ، او تاسو ما ته غوږ ونيسئ.

¹⁸ګورئ، ما د خپلې خبرې تيارے کړے دے، ما ته پته ده چې زۀ به بې ګناه ثابت شم.

¹⁹څوک ما سره په دې باندې بحث کولے شى؟ که څوک ما غلط ثابت کړى نو زۀ به خاموش شم او مړ به شم.

²⁰اے خُدايه، ما له صِرف دوه څيزُونه راکړه، نو بيا به زۀ خپل ځان ستا نه نۀ پټوم.

²¹خپله سزا زما نه لرې کړه، او په خپله يره باندې ما مۀ يروه.

²²بيا ما ته آواز وکړه او زۀ به جواب درکړم، يا ما له اِجازت راکړه چې خبرې وکړم او تۀ ما له د هغې جواب راکړه.

²³زما غلطيانې او زما ګناهُونه څومره دى؟ ما ته زما بغاوت او زما ګناه وښايه؟

²⁴تۀ خپل مخ ولې پټوې، او تۀ ما خپل دشمن ولې ګڼې؟

²⁵زۀ خو هيڅ هم نۀ يم، نو تۀ ما ولې يروې؟ زۀ خو داسې يم لکه چې په هوا کښې پاڼې خوَزى دوړى الوځى.

²⁶ځکه چې تۀ زما خِلاف ترښې خبرې ليکې، او تۀ ما له د ځوانۍ د ګناه سزا راکوې.

²⁷تۀ زما پښې په زولنو کښې تړې، او تۀ زما په ټول چال چلن نظر ساتې، او زما د پښو چاپونه هم معلوموې.

²⁸زۀ د سخا څيزُونو په شان خراب شوے يم، د هغه جامو په شان چې چينجو خوړلى وى.