Read Pashto Bible (Yusufzai) — د پښتو مقدس کتاب ايُوب 2 Bible Online

ايُوب 2 - Pashto Bible (Yusufzai) — د پښتو مقدس کتاب bible

ايُوب 2

¹يو ځل آسمانى مخلوق راغلو چې خپل ځانونه د مالِک خُدائ په مخکښې حاضر کړى او شيطان هم د هغوئ سره راغلو.

²مالِک خُدائ شيطان ته ووئيل، ”تا څۀ کول؟“ نو شيطان ووئيل، ”زۀ په زمکه ګرځېدم راګرځېدم.“

³نو مالِک خُدائ شيطان ته ووئيل، ”ستا زما د خِدمتکوُونکى ايُوب په باره کښې څۀ خيال دے؟ په زمکه باندې د هغۀ په شان هيڅ څوک هم نشته، هغه يو بې داغه او نېک سړے دے چې هغه د خُدائ پاک نه يريږى او د بدۍ نه ځان ساتى. هغه تر اوسه پورې په خپل صداقت کښې قائم دے، اګر چې تا زۀ د هغۀ خِلاف لمسولم، چې بغېر د څۀ وجې نه يې په غضب آخته کړم.“

⁴بيا شيطان مالِک خُدائ ته ووئيل، ”خلق د خپل ژوند بچ کولو دپاره هر څۀ ورکوى.

⁵خو که د هغۀ په بدن باندې تکليف راولې، نو هغه به ستا په حضُور کښې په تا لعنت ووائى.“

⁶نو مالِک خُدائ شيطان ته ووئيل، ”بالکل ټيک ده هغه ستا په اِختيار کښې د‌ے خو هغه ژوندې پرېږده.“

⁷نو شيطان د مالِک خُدائ د حضُور نه لاړو او په ايُوب باندې يې د سر نه تر پښو پورې خرابې دانې راوخېژولې.

⁸نو ايُوب د خاورې د مات لوښى يوه ټوټه واخستله او ځان يې ورباندې ګرولو او په ايرو باندې کښېناستو چې خپل خفګان څرګند کړى.

⁹نو ايُوب ته خپلې ښځې ووئيل، ”تر اوسه پورې تۀ لا په خپل صداقت کښې قائم يې؟ په خُدائ پاک لعنت ووايه او مړ شه.“

¹⁰خو هغۀ خپلې ښځې ته ووئيل، ”تۀ خو لکه د کم عقلى ښځې په شان خبرې کوې، ولى مونږ به د خُدائ د طرفه صرف ښۀ څيزُونه اخلو څۀ او هيڅ کله به ترې نه بد نۀ اخلو؟“ خو د دې ټولو خبرو باوجود ايُوب د خُدائ پاک خِلاف يوه خبره هم ونۀ کړه.

¹¹نو چې کله د ايُوب درې ملګرى د هغه ټولو مصيبتونو نه خبر شول کوم چې په ايُوب باندې راغلى وُو، نو هغوئ هر يو د خپل خپل کور نه روان شول هغوئ په يو ځائ ايُوب له ورغلل چې د تسلۍ خبرې ورته وکړى. د هغوئ نومونه دا دى: د تيمان نه اليفز، د شوحى نه بِلداد، د نعماتى نه ضوفر.

¹²کله چې هغوئ ايُوب د لرې نه وليدلو، نو هغه د پېژندګلو نه وتے وو خو چې کله يې وپېژندو نو په چغو چغو يې وژړل، هغوئ د غم نه خپلې چُوغې وشلولې او په سر باندې يې خاورې واچولې.

¹³هغوئ د هغۀ سره په زمکه باندې اووۀ شپې او اووۀ ورځې ناست وُو او يو کس هم هغۀ ته يوه خبره هم ونۀ کړه، ځکه چې هغوئ ته پته وه چې د هغۀ تکليف ډېر زيات دے.