Read Pashto Bible (Yusufzai) — د پښتو مقدس کتاب ايُوب 20 Bible Online

ايُوب 20 - Pashto Bible (Yusufzai) — د پښتو مقدس کتاب bible

ايُوب 20

¹بيا ضوفر نعماتى ورته ووئيل:

²”زما زړۀ وائى چې جواب درکړم، ځکه چې ستا خبرو زۀ خفه کړے يم.

³تا چې څۀ ووئيل هغه زما بې‌عزتى ده، او زما زړۀ ما ته وائى چې جواب درکړم.

⁴تا ته د ډېر وخت نه د دې پته ده، د هغه وخت نه چې کله بنى آدم په زمکه پېدا شوے وو،

⁵د بدعمله کس کاميابى لنډه وى، او د خُدائ نه منکرو خلقو خوشحالى د لږ وخت دپاره وى.

⁶که هغوئ د آسمانونو پورې هم اُوچت شوى وى، او د هغوئ سرونه وريځو ته رسېدلى وى،

⁷هغوئ به د خپلو متيازو په شان د همېشه دپاره ختم شى، چا چې هغوئ ليدلى وى نو هغوئ به ووائى چې څۀ شول؟

⁸هغوئ به د يو خوب په شان تېر شى او ورک به شى، هغوئ به د شپې د خوب په شان فنا شى.

⁹کومو خلقو چې هغوئ ليدلى وى نو هغه به يې نور ونۀ ګورى، او چې چرته اوسېدل نو هغه ځائ خلق به يې ياد نۀ کړى.

¹⁰د هغوئ د اولاد نه به هغه مال دولت واپس لاړ شى، چې کوم يې د غريبانانو نه اخستے وى.

¹¹هغوئ به په ځوانۍ کښې مړۀ شى او په خاورو کښې به ښخ شى.

¹²په بدعملۍ کښې خوند وى، او د دې خوند تر ډېر وخته پورې وى.

¹³او د خوږ څيز په شان يې په خولهٔ کښې د ډېر وخت پورې ساتى،

¹⁴خو ناګهانه د هغوئ خوراک په خېټه کښې تريخ شى، او د دې نه دننه زهر جوړ شى.

¹⁵هغوئ مال دولت تېر کړى خو بيا يې راقے کړى، خُدائ پاک د هغوئ دولت د هغوئ د خېټې نه واپس راوغورزوى.

¹⁶هغوئ به د مارانو زهر وخورى، او زهرژن مار به هغوئ ووژنى.

¹⁷هغوئ به سيندونه ونۀ ګورى، هغه نِهرونه چې شات او پئ په کښې بهېږى.

¹⁸د هغوئ ناجائزه ګټه به د هغوئ نه واپس اوځى، او په مال دولت باندې به خوشحالى ونۀ کړى،

¹⁹ځکه چې هغوئ غريبانان وهلى دى او نهر يې پرېښې دى، او د هغوئ کورونه يې قبضه کړى دى کوم چې هغوئ نۀ دى جوړ کړى.

²⁰د هغوئ د حرص ختمېدل نشته، چې په څۀ خوشحاليږى نو د هغې نه به ورسره هيڅ پاتې نۀ شى.

²¹هغوئ چې څۀ خورى نو د هغې نه هيڅ نۀ پاتې کېږى، نو په دې وجه د هغوئ مالدارى ختمېږى.

²²کله چې هغوئ ښۀ کامياب وى، نو د غم چپې به په هغوئ باندې راشى.

²³چې کله هغوئ خپلې خېټې ډکې کړى نو خُدائ پاک دې په هغوئ باندې سخت قهر راولى، او دا قهر دې په هغوئ لکه د ګلئ راوريږى.

²⁴هغوئ به د اوسپنې د وسلحې نه تښتى، خو د زېړو په غشى به هغوئ ولګى.

²⁵هغه غشے د هغوئ د ملا نه وويستلے شى، او دا غشے په وينه سور وى، يره به په هغوئ باندې راشى.

²⁶د هغوئ خزانه به په تکه توره تيارۀ کښې پټه شى، يو داسې اور به هغوئ تباه کړى چې هيچا بل کړے نۀ وى، او د هغوئ په کور کښې پاتې هر څۀ به تباه شى.

²⁷آسمانونه به د هغوئ ګناه ښکاره کړى، او زمکه به د هغوئ خِلاف ګواهى ورکوى.

²⁸يو سېلاب به د هغۀ کور يوسى، د خُدائ پاک قهر به په هغوئ سيلاب راولى.

²⁹دا د خُدائ پاک د طرف نه د بدعمله کسانو انجام دے، دا د هغوئ هغه ميراث دے چې د خُدائ پاک د طرف نه يې فېصله شوې ده.“