Read Pashto Bible (Yusufzai) — د پښتو مقدس کتاب ايُوب 24 Bible Online

ايُوب 24 - Pashto Bible (Yusufzai) — د پښتو مقدس کتاب bible

ايُوب 24

¹خُدائ تعالىٰ د عدالت دپاره وخت ولې نۀ مقرروى؟ او د خُدائ پاک منونکې دا ولې نۀ ګورى چې هغه د ګناهګارانو عدالت کوى؟

²بدعمله کسان د حد د پولې کاڼى لرې کوى، هغوئ څاروى پټ کړى او د خپلو رَمو سره يې څروى.

³هغوئ د يتيم خر بوځى، او هغوئ د کُنډې غوَيے په ضمانت کښې بوځى.

⁴هغوئ ضرورت مند د سړک نه ديکه کوى، او غريبانان دې ته مجبوروى چې ځان پټ کړى.

⁵غريبانان لکه د ځنګلى خرونو په شان په صحرا کښې خوراک لټوى، هغوئ د خپلو بچو دپاره په بل ځائ کښې خوراک نۀ شى پېدا کولے.

⁶هغوئ پردے پټے رېبى او هغوئ د بدعمله خلقو د انګورو په باغونو کښې پاتې شوى انګور راټولوى.

⁷په يخنۍ کښې هغوئ ټوله شپه بربنډ پراتۀ وى، او په ځان اچولو دپاره ورسره هيڅ هم نۀ وى.

⁸هغوئ په غرونو کښې په بارانونو سره لامدۀ وى، او په کاڼو کښې پناه اخلى.

⁹بدعمله خلق د کُنډې ماشوم د تى نه په زور لرې کوى، او د غريب ماشوم په ضمانت کښې يوسى.

¹⁰غريبانان د جامو نه بغېر بربنډ ګرځى، او په نهَرو کولمو د خلقو رېبلے شوى ګېډى اوړى،

¹¹د زيتُونو د ونو نه تېل وباسى خو د څَکلو ايجازت ورته نۀ وى، هغوئ انګور نچوړوى خو په خپله تږى وى.

¹²چې څوک مرى د هغوئ فريادونه په ښار کښې اورېدے شى، او مالدار خلق چې غريبانانو سره کوم ظلم زياتے کوى نو خُدائ پاک ورته هيڅ توجو نۀ ورکوى.

¹³هلته هغه څوک دى کوم چې د رڼا خِلاف بغاوت کوى، او هغوئ د دې روښانه لارې نه خبر نۀ دى نو ځکه هغوئ بې لارې شى.

¹⁴قاتِل سحر وختى راپاڅى چې غريب او ضرورت مند ووژنى، او په تيارۀ کښې غلا کوى.

¹⁵زنا کار هم د تيارې په اِنتظار کښې وى، خيال يې دا وى چې د هيچا به په ما باندې نظر نۀ وى، او هغه مخ پټوى چې څوک مې ونۀ پېژنى.

¹⁶د شپې په وخت کښې غلۀ د کورونو کنډرې کوى، او د ورځى خوبونه کوى، او رڼا ته نۀ راوځى.

¹⁷ځکه چې توره شپه د هغوئ دپاره سحر دے، او هغوئ د تورې تيارې د يرې سره عادت دى.

¹⁸هغوئ د اوبو په سر د زګ په شان فانى وى، د هغوئ په زمکه لعنت وئيلے شوے دے نو په دې وجه خلق د انګورو باغونو ته نۀ ځى.

¹⁹قبر ګناهګار داسې غائبوى لکه چې اوچ کالى او ګرمى واوره غائبوى.

²⁰د هغوئ خپله مور به هغوئ هېر کړى، او چينجو ته به هغوئ خواږۀ ښکاره شى، او نور به څوک هغوئ نۀ يادوى، نو بدعمله خلق داسې راپريوځى لکه چې په طوفان کښې ونه راپريوځى.

²¹هغوئ د بې‌اولاده مور سره ټګى کوى، او د کُنډې سره ښۀ نۀ کوى.

²²خو خُدائ پاک طاقتور خلق د خپل قُوت سره برباد کړى، کېدے شى چې هغوئ د لږ وخت دپاره کامياب شى خو د هغوئ ژوند څۀ اعتبارى نۀ وى.

²³کېدے شى چې هغه ورله امن ورکړى چې په حِفاظت سره ژوند تېروى، خو هغوئ د خُدائ پاک د نظر لاندې وى.

²⁴د لږ وخت دپاره بدعمله مالداره وى، خو هغوئ بيا د واښو په شان اوچ شى، هغوئ د فصل د سرونو په شان پرې کړے شى.

²⁵که داسې نۀ وى نو څوک به ما دروغژن ثابت کړى، او چې ښکاره کړى چې زۀ څۀ وايم نو هغه تشې خبرې دى؟“