Read Pashto Bible (Yusufzai) — د پښتو مقدس کتاب ايُوب 36 Bible Online

ايُوب 36 - Pashto Bible (Yusufzai) — د پښتو مقدس کتاب bible

ايُوب 36

¹اليهُو خپله خبره جارى وساتله او وې وئيل:

²”ما ته لږ صبر وکړئ، نو زۀ به تاسو ته حقيقت وښايم، ځکه چې زۀ د خُدائ پاک په صفايۍ کښې څۀ وئيل غواړم.

³زۀ به د خپل ډېر علم نه کار واخلم، چې دا ثابت کړم چې زما خالِق د اِنصاف خاوند دے.

⁴په حقيقت کښې زما خبرې غلطې نۀ دى، څوک چې ستا په وړاندې ولاړ دے هغه د استاذانو استاذ دے.

⁵خُدائ پاک بې شکه لوئ دے او د هيچا نه نفرت نۀ کوى، داسې يو علم هم نشته چې هغه يې نۀ لرى.

⁶هغه بدعمله خلق ژوندى نۀ پرېږدى، خو مظلومانو له خپل حق ورکوى.

⁷هغه د صادِقانو حفاظت کوى، او هغه يې د بادشاهانو سره په تخت کښېنوى او د همېشه دپاره عزت ورکوى.

⁸خو که خلق په زنځيرونو کښې تړلے شوى وى او د ظلم په تارونو کښې ګېر شوى وى،

⁹نو هغه ورته د هغوئ خپل عمل ښائى، او هغه غلطيانې ورته ښائى، چې کومې هغوئ په فخر سره کولې.

¹⁰هغه اصُولو ته يې پام راګرځوى، او حُکم ورکوى چې د بدو نه توبه وباسى.

¹¹که هغوئ ورته توجو ورکړى او د هغۀ خِدمت وکړى، نو هغوئ به په مالدارۍ کښې خپلې ورځې پوره کړى، او په خوشحالۍ کښې به خپل کالونه پوره کړى.

¹²خو که هغوئ دې ته توجو ورنۀ کړى، نو هغوئ دې په جهالت کښې هلاک شى او د خاورو د لاندې دې شى.

¹³کوم خلق چې د خُدائ نه منکر وى او هر وخت په غصه کښې وى، چې کله هغوئ ته سزا هم ملاوېږى نو هغوئ د مدد دپاره دعا نۀ کوى.

¹⁴هغوئ په ځوانۍ کښې مړۀ شى، او د هغوئ ژوند په زناکارئ کښې ختم شى.

¹⁵خو هغه مظلومان د ظلم نه بچ کوى، او د مصيبتونو په وخت کښې ورته خپل ځان څرګندوى.

¹⁶ايُوبه! خُدائ پاک تا د خطرې نه وباسى، او هغه ځائ ته دې بوځى چرته چې غم نۀ وى. هغه ستا په دسترخوان باندې ښۀ ښۀ خوراکونه ږدى.

¹⁷خو د نورو بدعمله په شان به پوره سزا تا ته ملاوېږى، تۀ په عدالت او اِنصاف راګېر يې.

¹⁸خبردار چې رشوت دې دوکه نۀ کړى، او دولت دې بې لارې نۀ کړى.

¹⁹ستا دولت او ستا طاقت ټول به تا د تکليف نه بچ کړى څۀ؟

²⁰د شپې د راتلو خواهش مۀ کوه، د هغه وخت چې کله قومونه تباه کېږى.

²¹خبردار! چې د بدعملۍ طرف ته وانۀ وړى، خُدائ پاک ځکه په تکليف کړے وې چې په بدعملۍ کښې آخته نۀ شې.

²²ياد ساته چې د خُدائ پاک طاقت څومره لوئ دے، او هغه د ټولو نه اعظيم اوستاذ دے.

²³هيڅوک خُدائ پاک ته دا نۀ شى ښودلے چې تۀ به څۀ کوې، او څوک ورته وئيلے شى چې تا غلط کار کړے دے؟

²⁴څۀ چې هغه کوى په هغې هميشه د هغۀ تعريف کيږى. تۀ هم د هغۀ ثناء صِفت کوه.

²⁵ټولو خلقو دې ته کتلى دى، هر يو کس د لرې نه دې ته ګورى.

²⁶بې شکه خُدائ پاک لوئ دے او مونږ د هغۀ د لويئ اندازه هم نۀ شو لګولے، د هغۀ د کالونو شمېر نشته.

²⁷ځکه چې هغه نمى اُوچتوى، او په باران يې بدلوى،

²⁸هغه وريځې جوړوى او په هر چا باندې باران راوروى.

²⁹څوک د وريځو په خورېدو باندې پوهېږى، او د آسمان په تندر باندې پوهېږى څۀ؟

³⁰ګوره، هغه په آسمان کښې برېښنا راولى او د سمندر بېخ کښې تيارۀ وى.

³¹ځکه چې د دې په ذريعه هغه په خلقو باندې حکومت کوى، او هغه خلقو له بې حسابه خوراک ورکوى.

³²هغه برېښنا په خپلو لاسونو کښې ساتى، او حُکم ورکوى چې نښه وولى.

³³د هغۀ د تندر آواز داسې وائى، چې هغه غېرتى دے او د ګناه خِلاف غصه لرى.