Read Pashto Bible (Yusufzai) — د پښتو مقدس کتاب ايُوب 4 Bible Online

ايُوب 4 - Pashto Bible (Yusufzai) — د پښتو مقدس کتاب bible

ايُوب 4

¹بيا تيمانى اليفز په جواب کښې ووئيل:

²”که څوک تا ته يوه خبره وکړى نو تۀ به خفه کېږې څۀ؟ خو د خبرو نه څوک ځان منع کولے شى؟

³ګوره، تا ډېرو خلقو ته ښودنه کړې ده، تا کمزورى لاسونه تکړه کړى دى.

⁴ستا ډاډګيرنې خلق په خپلو پښو اودرولى دى. کوم خلق چې په غورزېدو وُو هغوى يې نېغ کړى دى.

⁵خو اوس مصيبت په تا باندې راغلے دے او تۀ وارخطا يې، چې دا تا له درنزدې شى نو تۀ پرېشانه شې.

⁶ستا اعتماد د خُدائ پاک يره نۀ ده څۀ، او ستا نېک عمل تا له اُميد نۀ درکوى؟

⁷اوس دا سوچ وکړه، داسې څوک شته چې بې ګناه وى او تباه شى؟ او داسې څوک صادق شته چې تباه شوے وى؟

⁸چې څومره ما ته پته ده، چې چا دا بې اِنصافى کړې ده چې چا مصيبت کَرلے دے، نو هغۀ مصيبت رېبلے دے.

⁹د خُدائ پاک د ساه په ذريعه هغوئ سزا موندلې ده، او د هغۀ د غصې د زور په وجه هغوئ تباه شوى دى.

¹⁰بدعمله د ازمرى په شان غړمبېږى، خو خُدائ پاک هغوئ غلى کوى او غاښُونه يې ماتوى.

¹¹لکه چې تکړه ازمرے د ښکار د کمى په وجه هلاکېږى، او د دې واړۀ بچى خوارۀ‌وارۀ شى.

¹²اوس ما ته پټ پټ يو خبر راغلو، او زما غوږُونو ته د دې غلے شان آواز راغلو.

¹³په نيمه شپه ما يو يروُونکے خوب وليدو، دا په هغه وخت وو چې خلق په دروند خوب اُودۀ وُو،

¹⁴يره او لړزان په ما باندې راغلل، چې دې زما ټول بدن وښوزولو.

¹⁵يو روح زما په وړاندې تېر شو او زما په بدن وېښتۀ نېغ ودرېدل.

¹⁶هغه روح ولاړ وو، خو ما ته پته نشته چې دا څۀ وُو. زما د سترګو په وړاندې يو شکل وو، هر څۀ خاموش وُو، بيا ما يو آواز واورېدو:

¹⁷ولى انسان کولے شى چې د خُدائ پاک په وړاندې صادق شى څۀ؟ ولې انسان د خالِق نه زيات پاک کېدے شى؟

¹⁸تر دې پورې چې هغه په خپلو خِدمت‌ګارانو باندې هم اعتماد نۀ کوى، او هغه د خپلو فرښتو کار ته هم غلط وائى،

¹⁹نو هغه به په انسان باندې څومره کم اعتماد وکړى څوک چې د خاورې نه جوړ وى. نو څوک چې د خاورى نه جوړ وى هغه به د پتنګ په شان به په آسانۍ زرې زرې شى.

²⁰سحر روغ وى او ماښام مړ شى. او څوک هم پرې خبر نۀ شى او د همېشه دپاره تباه شى.

²¹د هغوئ نه خپل ټول مال اخستے شوے دے، هغوئ په جاهليت مړۀ شى.