Read Pashto Bible (Yusufzai) — د پښتو مقدس کتاب ايُوب 40 Bible Online

ايُوب 40 - Pashto Bible (Yusufzai) — د پښتو مقدس کتاب bible

ايُوب 40

¹بيا مالِک خُدائ ايُوب ته ووئيل:

²”تۀ اوس هم د خُدائ تعالىٰ سره بحث کول غواړې څۀ؟ څوک چې د خُدائ پاک سره بحث کوى نو هغه به جواب ورکوى.“

³بيا ايُوب مالِک خُدائ له جواب ورکړو:

⁴”ګوره، زۀ هيڅ هم نۀ يم، زۀ به تا له څۀ جواب درکړم؟ زۀ په خپله خولهٔ باندې لاس ږدم.

⁵ما ډير څۀ وئيلى دى، نور زۀ څۀ نۀ وايم.“

⁶بيا مالِک خُدائ د طوفان نه ايُوب له جواب ورکړو:

⁷”نو اوس ورته ټينګ شه، زۀ به ستا نه تپوس وکړم او تۀ به ما له جواب راکړې.

⁸ولې تۀ د دې ثابِتولو کوشش کوې چې زۀ بې اِنصافه يم، او ما غلط وګڼې او خپل ځان ته صحيح ووايې؟

⁹تۀ د خُدائ پاک په شان تکړه يې څۀ، ستا آواز د هغۀ د تندر د آواز په شان کېدے شى؟

¹⁰که داسې وى نو په رُعب داب او شان و شوکت سره خپل ځان سينګار کړه، د عزت او درناوى په جامو باندې خپل ځان پټ کړه.

¹¹خپل ځان په قهر کړه، هر يو مغرور سړى ته ګوره او هغه سپک کړه،

¹²ټولو مغروره خلقو ته وګوره او هغوئ عاجزان کړه، او بدعمله خلق ټک سره ووژنه.

¹³هغوئ ټول په خاورو کښې ښخ کړه، او هغوئ قبرکښې قېد کړه.

¹⁴نو زۀ به دې هم صِفت وکړم، ځکه چې خپل طاقت تا بچ کولے شى.

¹⁵دريابى مېښې ته وګوره، چې هغه مې هم هغه شان جوړه کړې ده لکه څنګه مې چې تۀ جوړ کړے يې، دا د يو غوَيى په شان واښۀ خورى.

¹⁶د هغې طاقت د هغې په بدن کښې دے، او د هغې طاقت د هغې د خېټې په پټو کښې دے.

¹⁷د هغې لکۍ لکه د دِيار د ونې په شان سخته ده، د هغې د پتُون پټې خپلو کښې غوټه شوې دى.

¹⁸د دې هډوکى د زېړو نلکې دى، د هغې هډوکى د اوسپنې سيخُونه دى.

¹⁹دا د خُدائ پاک دکارنامو يو لوئ کار دے، او صرف د دې خالِق په دې باندې قابو موندلے شى.

²⁰ځکه چې غرونه د دې دپاره خوراک پېدا کوى چرته چې ټول ځنګلى ځناور لوبې کوى.

²¹دا په اوبو کښې د نيلوفر بوټو لاندې پراتۀ وى او د لوښې په ډنډونو کښې پټ وى.

²²د نيلوفر بوټى ورباندې سورے کوى، او د نِهر د غاړې د وَلو ونې د دې نه ګېرچاپېره تاو وى.

²³که سيند په موج کښې وى، نو دا نۀ يريږى، د اُردن سيند که تر خولې پورې هم ډک وى نو دا نۀ يريږى.

²⁴څوک دا د کُونډو سره رااُچتولے شى، يا يې څوک په پوزه کښې د قابو کولو دپاره پېزوان اچولے شى؟