Read Pashto Bible (Yusufzai) — د پښتو مقدس کتاب ايُوب 42 Bible Online

ايُوب 42 - Pashto Bible (Yusufzai) — د پښتو مقدس کتاب bible

ايُوب 42

¹بيا ايُوب مالِک خُدائ له جواب ورکړو:

²”ما ته پته ده چې تۀ هر څۀ کولے شې، او تا د خپل کار نه هيڅ څوک نۀ شى ايسارولے.

³تا ووئيل چې هغه څوک دے چې زما په حِکمت باندې د ناپوهۍ سره شک کوى؟ هغه زۀ يم، ما د داسې څيزُونو خبره کوله چې ما ته يې هيڅ پته نۀ وه، او هغه خبرې زما دپاره ډېرې عجيبه او لوئې وې.

⁴تا وئيل چې ما ته غوږ ونيسه او زۀ به وايم، زۀ به تپوس کوم او تۀ به ماله جواب راکوې.

⁵ما مخکښې صرف ستا په حقله اوريدلى، خو اوس مې پخپلو سترګو وليدلې.

⁶نو ما چې څۀ وئيلى دى نو په هغې شرمنده يم، او په خاورو او ايرو کښې توبه وباسم.“

⁷کله چې مالِک خُدائ د ايُوب سره دا خبرې وکړې، نو مالِک خُدائ تيمانى اليفز ته ووئيل: ”زۀ تا او ستا دوو ملګرو ته سخت غصه يم، ځکه چې تاسو زما هغه خبره نۀ ده کړې چې کومه صحيح ده، لکه څنګه چې زما خِدمت کوُونکى ايُوب کړې ده.

⁸نو په دې وجه اوس اووۀ غوَيى او اووۀ ګډان بوځه او زما خِدمت کوُونکى ايُوب له ورشه او د خپل ځان دپاره دا د سوزېدونکې نذرانې په توګه پېش کړه، نو زما خِدمت کوُونکے ايُوب به ستا دپاره دعا وکړى، ځکه چې زۀ به د هغۀ دعا قبلوم او ستاسو د کم عقلتوب په مطابق کار به درسره نۀ کوم، ځکه چې تاسو زما هغه خبره نۀ ده کړې چې کومه صحيح ده، لکه څنګه چې زما خِدمت کوُونکى ايُوب کړې ده.“

⁹نو تيمانى اليفز، شوحى بِلداد او نعماتى ضوفر لاړل او چې مالِک خُدائ څنګه وئيلى وُو هم هغه شان يې وکړل، او مالِک خُدائ د ايُوب دعا قبوله کړه.

¹⁰نو کله چې ايُوب د خپلو ملګرو دپاره دعا وکړه نو خُدائ پاک هغۀ له بيا برکت ورکړو، او چې ايُوب مخکښې څۀ لرل نو مالِک خُدائ هغۀ له د هغې يو په دوه نور هم زيات ورکړل.

¹¹نو هلته هغۀ له د هغۀ ټول وروڼه خوېندې او ټول پخوانى خپل پردې راغلل او هغوئ د هغۀ په کور کښې روټۍ وخوړه، او هغوئ ورته مينه ښکاره کړه او د هغه تکليفُونو په وجه يې هغۀ له تسلى ورکړه چې مالِک خُدائ په هغۀ باندې راوستى وُو، او هغوئ هر يو هغۀ له لږې پېسې او يوه د سرو زرو ګوتمه ورکړه.

¹²نو مالِک خُدائ د ايُوب وروستنے عُمر د اول عُمر نه زيات برکتناک کړو، او د هغۀ څوارلس زره ګډې، شپږ زره اُوښان، دوه زره غوَيى او يو زر خرۀ وُو.

¹³د هغۀ اووۀ زامن او درې لوڼه هم وې.

¹⁴هغۀ په وړومبۍ لور باندې يميمه، په دويمه قصياه او په دريمه باندې قرن هپوک نوم کېښودو.

¹⁵او په هغه ټول مُلک کښې د ايُوب د لوڼو په شان ښائسته ښځې نۀ وې، خپل پلار هغوئ له د دوئ د وړُونو په شان ميراث ورکړو.

¹⁶ايُوب د دې نه پس يو سل او څلوېښت کاله ژوندے وو او د څلورم نسل پورې خپل بچى او نمسى يې وليدل.

¹⁷نو بيا ايُوب په پوخ عُمر کښې مړ شو.