Read Pashto Bible (Yusufzai) — د پښتو مقدس کتاب ايُوب 5 Bible Online

ايُوب 5 - Pashto Bible (Yusufzai) — د پښتو مقدس کتاب bible

ايُوب 5

¹آواز وکړه، داسې څوک شته چا تا له جواب درکړى؟ داسې يوه فرِښته شته څۀ چې د هغې نه مدد وغواړې؟

²په حقيقت کښې نفرت کم عقل خلق وژنى، اوحسد ساده خلق وژنى.

³ما دا ليدلى دى چې څۀ کم عقل خلق د لږ وخت دپاره کامياب وى، خو بيا ناڅاپه تباهى ورباندې راشى.

⁴د هغوئ بچو دپاره به د پناه هيڅ امکان نۀ وى، او داسې به څوک نۀ وى چې په عدالت کښې يې خلاص کړى.

⁵اوږى خلق د کم عقلو فصلونه خورى، که د هغۀ د پټو نه د حِفاظت دپاره آزغى هم تاو وى، لالچى خلق د هغوى دولت ختم کړى.

⁶ځکه چې خفګان د زمکې نه نۀ راځى، او نۀ مصيبت د زمکې نه پېدا کېږى،

⁷خو انسانان د مصيبت دپاره داسې پېدا شوى دى لکه چې د اور بڅرى بره الوځى.

⁸که زۀ ستا په ځائ وے نو ما به خُدائ پاک لټولے، او خُدائ پاک ته به مې فرياد اورولے.

⁹هغه داسې لوئ لوئ کارونه کوى چې څوک ورباندې نۀ پوهېږى، هغه بې شمېره عجيبه کارونه کوى.

¹⁰هغه په زمکه باندې باران وروى او هغه پټو ته اوبۀ رالېږى،

¹¹چې څوک غريب وى نو خُدائ پاک يې مالداره کړى، او چې څوک غمژن وى نو خوشحالى ورکړى.

¹²هغه د چالاکو منصُوبې ګډې وډې کړى، نو داسې د هغوئ په لاس کښې هيڅ کاميابى نۀ راځى.

¹³هغه هوښيار د خپلې چالاکۍ په جال کښې راګېروى، اوچالاک خلق زر فنا شى.

¹⁴د ورځې په وخت په هغوى تيارۀ راشې او د غرمې په وخت داسې تيندکونه خورى لکه چې شپه وى.

¹⁵خو هغه ضرورت مند خلق د مرګ نه بچ کوى، او د زورَور د زور نه يې بچ کوى.

¹⁶نو چې غريبانان اُميد ولرى، او د بې اِنصافه خلقو خولې بندې کړے شى.

¹⁷چې خُدائ پاک څوک ټيک کړى نو هغوى څومره خوشحاله وى، نو په دې وجه د خُدائ تعالىٰ تربيعت ته سپک مۀ ګورئ.

¹⁸که هغه زخمى کول کوى، نو هغه يې مرهم پټۍ هم کوى، که هغه وهل کوى، نو د هغۀ لاسونه يې عِلاج هم کوى.

¹⁹هغه به تاسو د شپږو آفتُونو نه بچ کوى، او په اوؤم کښې به تاسو ته هيڅ نقصان نۀ رسېږى.

²⁰په قحط کښې به هغه تاسو د مرګ نه په بيعه واخلى، او په جنګ کښې به مو د مرګ نه بچ کړى.

²¹تاسو به د سپکو خبرو نه بچ شئ، او چې کله تباهى راځى نو تاسو به نۀ يرېږئ.

²²په تباهۍ او قحط پورې به تاسو خندا کوئ، او د زمکې د ځنګلى ځناورو نه به نۀ يرېږئ.

²³تاسو چې کوم پټى کَرئ نو په هغې کښې به کاڼى نۀ وى، او ځنګلى ځناور به په تاسو حمله نۀ کوى.

²⁴تاسو ته به پته ولګى چې ستاسو کور محفُوظ دے، تاسو به وګورئ چې ستاسو د رَمو نه به هيڅ ورک نۀ وى.

²⁵تاسو ته به پته ولګى چې ستاسو اولاد به ډېر وى، داسې بې شميره لکه په زمکه چې واښۀ وى.

²⁶تاسو به خپل قبر ته په بوډاتوب کښې ځئ، لکه چې د فصل ګېډئ درمند ته په خپل موسم کښې راځى.

²⁷ګوره، زمونږه چې د عمر په حقله کومه تجربه ده، دا حقيقت دے. دا نصيحت واوره او په دې باندې عمل وکړه.“