Read Pashto Bible (Yusufzai) — د پښتو مقدس کتاب زبور 103 Bible Online

زبور 103 - Pashto Bible (Yusufzai) — د پښتو مقدس کتاب bible

زبور 103

¹اے زما روحه، د مالِک خُدائ ثناء ووايه، اے زما ټول ځانه، د مالِک خُدائ د مقدس نوم ثناء ووایه.

²اے زما روحه، د مالِک خُدای ثناء ووايه، چې د هغهٔ ټول احسانونه هير نهٔ کړی.

³څوک چې ستا ټول ګناهونه معاف کوی، او چې ستا ټول مرضونه جوړوی،

⁴څوک چې ستا ژوند د مرګ نه په بيعه اخلی، او خپل د مينې او رحم تاج ستا په سر ږدی،

⁵او څوک چې په ښهٔ څیزونو ستا آرمانونه پوره کوی، نو چې د باز په شان ستا ځوانی تازه شی.

⁶مالِک خُدائ خپل صداقت سرته رسوی، او د ټولو مظلومانو سره اِنصاف کوی.

⁷هغهٔ موسىٰ ته خپلې طریقې وښودلې، خپل اعمال يې بنی اِسرائيلو ته ‎ښکاره کړل.

⁸مالِک خُدائ رحیم او مهربان دے، زر نهٔ په غصه کیږی او د هغهٔ مينه پائيداره ده.

⁹هغه به هر وخت نهٔ ملامتوی، او خپل قهر به تر ابده نهٔ ساتی.

¹⁰هغه مونږ ته زمونږ د ګناهونو په اندازه سزا نهٔ راکوی، او نۀ زمونږ د ګناهونو په مطابق بدله راکوی.

¹¹نو لکه څنګه چې آسمانونه د زمکې نه اوچت دی، نو دومره د دهٔ مینه د هغوئ دپاره لویه ده څوک چې د هغهٔ نه یریږی.

¹²څومره چې مشرق د مغرب نه لرې دے، نو دومره هغهٔ زمونږ قصورونه مونږ نه لری کړی دی.

¹³څومره چې پلار په خپلو بچو باندې مهربان وی، نو دومره مالِک خُدائ په هغوئ مهربانه دے څوک چې د هغهٔ نه یریږی.

¹⁴ځکه چې هغۀ ته پته ده چې مونږ څنګه جوړ شوی يُو، هغۀ ته دا ياد دی چې مونږ خاورې يُو.

¹⁵د اِنسان ژوند د واښو په شان دے، لکه د میدان د ګل په شان غوړيږی.

¹⁶کله چې هوا ورباندې ولګیږی نو ختم شی، او بيا په هغې ځائ کښې نۀ ښکاری.

¹⁷تر ابده ابده د مالِک خُدائ مینه د هغوئ سره وی څوک چې د هغهٔ نه یریږی، او د هغهٔ صداقت د هغوئ د نسلونو سره وی.

¹⁸او د هغوئ سره څوک چې د هغهٔ د تړون پابند وی، او د هغوئ سره څوک چې د هغهٔ په حُکمونو عمل کوی.

¹⁹مالِک خُدائ خپل تخت په آسمان کښې قائم کړے دے، او د هغهٔ سلطنت په هر څهٔ باندې قائم دے.

²⁰فرښتو د مالِک خُدائ ثناء صفت ادا کړئ، تاسو چې زورَورې يئ او د هغهٔ په حُکمونو عمل کوئ، او د هغهٔ د کلام تابعداری کوئ.

²¹اے د فرښتو لښکرو، تاسو د مالِک خُدائ ثناء ووايئ، اے د هغۀ خِدمتګارانو چې د هغهٔ رضا پوره کوئ.

²²اے د مالِک خُدائ ټولو مخلوقاتو د هغهٔ د بادشاهئ په هر ځائ کښې د هغهٔ ثنا صفت وکړئ. اے زما روحه د مالِک خُدائ ثناء صفت ووايه.