Read Pashto Bible (Yusufzai) — د پښتو مقدس کتاب زبور 106 Bible Online

زبور 106 - Pashto Bible (Yusufzai) — د پښتو مقدس کتاب bible

زبور 106

¹د مالِک خُدائ ثناء صِفت وکړئ. ځکه چې هغه ښهٔ دے، د مالِک خُدائ شکر ادا کړئ. د هغۀ مينه د تل دپاره پاتې کیږی.

²د مالِک خُدائ د زورَورو کارونو بيان څوک کولے شی او څوک پوره د هغهٔ ثناء صفت بیانولے شی؟

³بختور دی هغوئ څوک چې اِنصاف کوی، او څوک چې تل ښهٔ کارونه کوی.

⁴په هغه وخت ما ياد ساته، اے مالِکه خُدايه، کله چې تهٔ په خپلو خلقو رحم کوې، کله چې تۀ هغوئ بچ کوې نو زما مدد دپاره هم راشه،

⁵نو چې زۀ هم ستا د غوره شوؤ خلقو په برکتونو کښې شریک شم، او چې زهٔ هم ستا د قوم په خوشحالئ کښې برخه واخلم او چې زهٔ ستا د خلقو سره په ثنا صفت وئیلو کښې شریک شم.

⁶مونږ هم د خپل پلار نيکۀ په شان ګناه ګار يُو، مونږ غلط کارونه وکړل او بدعمله يُو.

⁷کله چې زمونږ پلار نيکۀ په مصر کښې وُو، نو ستا معجزو ته يې خيال ونهٔ کړو، او ستا ډېر رحمونه ورته یاد نهٔ وُو، او د بحرِقُلزم سره هغوئ بغاوت وکړو.

⁸خو بیا هم هغهٔ د خپل نوم په خاطر هغوئ بچ کړهٔ، د دې دپاره چې هغه په دې خپل طاقت څرګند کړى.

⁹او هغهٔ بحرِقُلزم ورټلو او هغه اوچ شو، هغۀ هغوئ په سمندر کښې داسې پورې ایستل لکه چې په صحرا کښې روان وُو.

¹⁰هغهٔ دوئ د دشمنانو د لاسونو نه بچ کړل، او د دشمنانو د لاسونو نه يې په بيعه واخستل.

¹¹اوبو د هغوئ مخالفين ټول ډوب کړل، او په هغوئ کښې يو کس هم ژوندې پاتې نهٔ شو.

¹²بیا هغوئ د هغۀ په وعدو يقين شروع کړو د هغۀ د ثناء صِفت سرود يې ووئيلو.

¹³خو هغوئ هغه هر څۀ زر هير کړل کوم چې خُدائ پاک د دوئ دپاره کړی وُو، او د هغهٔ د نصیحت انتظار يې ونهٔ کړو.

¹⁴خو په هغه بیابان کښې دوئ شهوت پرستی شروع کړه، او په دې يې د خُدائ پاک صبر وآزمائیلو.

¹⁵نو بیا هغهٔ هغوئ ته هر څهٔ ورکړل کوم چې دوئ غوښتل، خو هغهٔ ورسره وبا هم راولیږله.

¹⁶بیا هغوئ په کيمپ کښې د موسىٰ سره کینه وساتله او د هارون خلاف چې د مالِک خُدائ دپاره مقدس شوے وو کینه وکړله.

¹⁷نو په دې وجه زمکه په مينځ اوچاوده او داتان يې تیر کړو، او ابيرام يې هم سره د نورو دوستانو تیر کړو.

¹⁸او د دوئ د نورو مریدانو په مينځ کښې اور بل شو، او د اور په لمبې سره نور بدعمله تباه شو.

¹⁹هغوئ په حورب کښې سخے جوړ کړو او د اوسپنې نه د جوړ شوی بت عبادت يې وکړو.

²⁰نو په دې کولو سره هغوئ جلالی خُدائ بدل کړو د یو سخى په شکل چې ګياه خوری.

²¹هغوئ خُدائ پاک یعنې خپل خلاصُونکے هير کړو، چا چې په مصر کښې لوئ کارونه کړی وُو،

²²د حام په ملک کښې يې معجزې وکړې او د بحرِقُلزم سره يې عجيبه کارنامې وکړې.

²³نو هغهٔ ووئیل زهٔ به دوئ تباه کړم نو د هغهٔ غوره شوی کس موسىٰ، د خُدائ د غضب او مخلوق په مينځ کښې ودريدلو چې د هغهٔ غصه سړه او دوئ د تباهئ نه بچ کړی.

²⁴دوئ بیا د هغه ښهٔ ملک نه نفرت شروع کړو، او دوئ د هغهٔ په وعده یقین نهٔ کولو.

²⁵هغوئ به په خپلو خیمو کښې غورېدل او د مالِک خُدائ تابعداری يې ونهٔ کړه.

²⁶نو هغهٔ خپل لاس اوچت کړو او دوئ ته يې قسم وخوړو چې هغه به دوئ په دې دشته بیابان کښې مړهٔ کړی،

²⁷او د هغوئ اولاد يې په قومونو کښې خوارهٔ کړل، او هغه يې په ملکونو کښې تس نس کړل.

²⁸هغوئ د بعل د فعور بُت عبادت وکړو او بُتانو ته د پیش کړے شوؤ قربانو غوښې يې وخوړلې،

²⁹د هغوئ په بد عملونو مالِک خُدای غصه شو، او په دوئ باندې یو لوئ مرض راغلو.

³⁰خو فينحاس ورمينځ ته شو او مخ نيوے يې وکړو، نو بيا مرض راقابو شو.

³¹د دې کار په وجه هغه رښتينے جوړ شو دا به نسل در نسل تر ابده پورې وی.

³²د مریبه د اوبو سره دوئ مالِک خُدائ غصه کړو، د دوئ په وجه په موسىٰ باندې مصيبت راغلو،

³³هغوئ د موسىٰ روح دومره خفه کړو، چې د هغهٔ د خولې نه بې ځايه خبرې راووتلې.

³⁴او هغوئ هغه قومونه هغه شان تباه نۀ کړل لکه څنګه چې مالِک خُدائ د هغوئ د وژلو حُکم کړے وو،

³⁵خو د دې په ځائ هغوئ هم په قومونو کښې ورګډ شول او د هغوئ رواجونه يې خپل کړل.

³⁶هغوئ د هغه خلقو د بُتانو عبادت وکړو، کوم چې د دوئ دپاره دام جوړ شو.

³⁷دوئ خپل زامن قربانی کړل او پيریانو ته يې خپلې لوڼه قربانی کړې.

³⁸دوئ بې ګناه وينې توئ کړې د خپلو لوڼو او زامنو وينې يې توئ کړې، کوم چې د کنعان بُتانو ته دوئ قربانی کړل، د هغوئ د وینې په وجه هغه ملک ناپاک شو.

³⁹په خپلو بدو کارونو یې ځان پلیت کړُو، په خپل دې عمل يې ځانونه زناکار کړل.

⁴⁰نو په دې وجه مالِک خُدائ خپلو خلقو ته غصه شو او د خپلو خلقو نه بیزاره شو.

⁴¹هغهٔ دوئ نورو قومونو ته حواله کړل، او د هغوئ دشمنانو په دوئ باندې حکومت وکړو.

⁴²او دشمنانو په هغوئ باندې ظُلم وکړو او د هغوئ زور طاقت ته يې حواله کړو.

⁴³هغۀ څو څو ځلې دوئ بچ کړل، خو هغوئ سرکشی خوښه کړه او په خپله ګناه کښې مختورن شول.

⁴⁴خو هغهٔ د هغوئ مصيبت ته پام شو کله چې هغهٔ د هغوئ ژړا واوريده،

⁴⁵د دوئ د خاطره هغهٔ خپل تړون ځان ته رایاد کړو او هغهٔ خپله فیصله د ابدی مينې په سبب بدله کړه.

⁴⁶په هغوئ يې هغه خلق مهربان کړل چا چې دوئ ګیر کړی وُو.

⁴⁷اے مالِکه خُدايه، زمونږ پاکه خُدایه مونږ بچ کړه، او مونږ د قومونو نه راغونډ کړه، نو چې دغه شان مونږ ستا د مقدس نوم شکر ادا کړُو او ستا په جلال کښې ستا ثناء صفت ادا کړُو.

⁴⁸د مالِک خُدائ ثناء صِفت دې وى څوک چې د بنی اِسرائيلو خُدائ پاک دے، د ازل نه تر ابده پورې دې د مالِک خُدائ ثناء صِفت وی. راځئ چې ټول په شریکه سره ووایُو، ”آمين.“ ثنا صفت دې مالِک خُدائ ته وی.