Read Pashto Bible (Yusufzai) — د پښتو مقدس کتاب زبور 108 Bible Online

زبور 108 - Pashto Bible (Yusufzai) — د پښتو مقدس کتاب bible

زبور 108

¹اے مالِکه خُدایه، زما زړۀ په تا مضبوط دے، زهٔ به په خپل ټول ځان سره ستا حمد او سرود وایم.

²اے بينجو او ربابه پاڅه، زهٔ به په خپلو سندرو سره سحر راپاڅوم.

³اے پاکه خُدايه، زهٔ به ستا ثناء په قومونو کښې بيان کړم، د خلقو مينځ کښې به دې حمدونه وايم.

⁴ځکه چې ستا ابدی مینه لویه او د آسمانونو دپاسه ده، او ستا وفادارى تر آسمانونو پورې ده.

⁵اے پاکه خُدایه، پاس په آسمانونو دې ستا لويې وی، او ستا جلال دې د ټولې زمکې دپاسه وی.

⁶مونږ دې په خپل ښی لاس سره بچ کړه او زمونږ مدد وکړه، او د چا سره چې تهٔ مینه کوې هغوئ بچ کړه.

⁷خُدائ د خپل مقدس ځائ نه کلام وکړو: ”په خوشحالۍ سره به شکیم تقسیم کړم او د سوکوت دره به ناپ تول کړم.

⁸جِلعاد زما دے او منشا هم زما دے، اِفرائيم زما ټوپۍ او يهوداه زما د بادشاهئ کونټۍ ده.

⁹موآب زما د وينځلو ښانک دے او هغه به زما خدمتګار وی، او زهٔ په ادوم باندې خپلې څپلئ پاکوم، او زهٔ به په فلسطين باندې د کامیابئ چغه وهم.“

¹⁰ما به څوک د برجونو ښار ته راولی؟ څوک به ما ته په آدوم باندې کاميابی راکړی؟

¹¹اے پاکه خُدايه، مونږ تا رد کړى يُو څۀ زمونږ د لښکرو سره نور نۀ ځې څهٔ؟

¹²د دشمن خلاف زمونږ مدد وکړه، ځکه چې د بنيادم امداد بې فائدې دے.

¹³د خُدائ پاک په مدد سره به مونږ ګټه وکړُو، او هغه به زمونږ دشمن چخڼې کړی.