Read Pashto Bible (Yusufzai) — د پښتو مقدس کتاب زبور 112 Bible Online

زبور 112 - Pashto Bible (Yusufzai) — د پښتو مقدس کتاب bible

زبور 112

¹د مالِک خُدائ ثناء صفت دې وی، بختور دى هغوئ څوک چې د مالِک خُدائ نه یریږی، او څوک چې د هغهٔ په حُکمونو په عمل کولو ډیر خوشحاله وی.

²د هغوئ اولاد به په زمکه زورَور خلق شی، د صادِقانو نسل به بختور کړے شی.

³دولت او مالدارى به د هغهٔ په کور کښې وی، او د هغهٔ صداقت به د تل دپاره وی.

⁴کۀ څهٔ هم په تیارهٔ کښې صادِقانو ته رڼا ځلېږی، څوک چې مِهربانه زړهٔ سواندی او صادِق وی.

⁵مِهربانه په هغۀ دے چې سخى وى او بل ته بې لالچه قرض ورکوی، او څوک چې خپلې مسئلی په اِنصاف سره حل کوی.

⁶په یقین سره هغه به ونهٔ ښوزولے شی، صادِق سړے به تل یادولے شی.

⁷هغه به د بد خبر نه نهٔ يرېږی، د هغهٔ زړهٔ قائم دے او په مالِک خُدائ باندې پوره توکل کوی.

⁸د هغهٔ زړهٔ مطمئن دے او هغه به نهٔ یریږی، او په آخر کښې به په خپلو ټولو دشمنانو کاميابی حاصله کړی.

⁹هغهٔ خپل خیراتونه مسکینانو ته ورلیږلی دی، د هغهٔ صداقت د تل دپاره پاتې کیږی، او د عزت سره به د هغهٔ سترګې اوچتیږی.

¹⁰بدکاران چې دا ګوری نو غصه کیږی، او هغوئ به خپل غاښُونه چیچی او ورک به شی، د بدکارانو آرمانونه به پوره نهٔ شی.