Read Pashto Bible (Yusufzai) — د پښتو مقدس کتاب زبور 138 Bible Online

زبور 138 - Pashto Bible (Yusufzai) — د پښتو مقدس کتاب bible

زبور 138

¹زهٔ به د زړهٔ د اخلاصه، ستا ثناء صفت وکړم، اے مالِکه خُدایه، او د نورو معبودانو په وړاندې به زهٔ ستا د شکر ګذارئ سندرې ووايم.

²زهٔ به ستا مقدس کور طرف ته سجده وکړم، او زهٔ به ستا د نوم ثناء صفت ادا کړم، ځکه چې تهٔ ډير مينه ناک او وفادار يې، او تا په ټولو څیزونو باندې خپل نوم او کلام اوچت کړو.

³ما چې کله هم تا ته سوال زارى کړې ده، تا قبوله کړې ده، تا زهٔ په طاقت ورکولو تکړه او زړۀور کړم.

⁴اے مالِکه خُدایه، د دنيا ټول بادشاهان دې ستا ثناء صفت وکړی، چې کله دوئ ستا د خولې کلام واوری.

⁵دوئ دې د مالِک خُدائ د طريقو ثناء صفت وکړی، ځکه چې د مالِک خُدائ جلال لوئ دے.

⁶کۀ څهٔ هم چې مالِک خُدائ ډیر اوچت دے، خو بیا هم د ښکته خلقو خيال ساتی، خو هغه کبرژن د ډیر لرې نه پیژنى.

⁷زهٔ کۀ څهٔ هم د مصیبتونو په مينځ کښې ګرځم، تهٔ زما ژوندون بچ کوې. تهٔ خپل لاس زما د دشمنانو د غصې په خلاف راوږدوې، د خپل ښى لاس سره دې ما بچ کوې.

⁸مالِک خُدائ به زما دپاره خپل مقصد پوره کړی، ستا مينه، اے مالِکه خُدایه، د تل دپاره پاتې کیږی، د خپلو لاسونو کارونه مۀ پرېږده.