Read Pashto Bible (Yusufzai) — د پښتو مقدس کتاب زبور 143 Bible Online

زبور 143 - Pashto Bible (Yusufzai) — د پښتو مقدس کتاب bible

زبور 143

¹اے مالِکه خُدایه، زما دعا واوره، زما ژړا ته د رحم دپاره غوږ ونیسه، په خپله وفادارۍ او صداقت سره دې زما مدد دپاره راشه.

²او خپل خدمتګار دې د عدالت دپاره مۀ راوله، ځکه چې ستا په وړاندې څوک هم بې ګناه نهٔ دی.

³دشمن راپسې لګيدلے دے ما په زمکه ښکته غورزوی، هغهٔ زهٔ په زور په تورو تیارو کښې اوسولم لکه د هغه خلقو چې ډیر مخکښې مړهٔ شوى دی.

⁴نو ځکه روح مې په بدن کښې کمزورے کیږی، نو دغه شان د یرې نه زما زړۀ په ما کښې ودریږی.

⁵کله چې زهٔ پخوانى وختونه رایادوم، نو زهٔ ستا په کارونو سوچ کوم، کوم کارونه چې ستا لاسونو کړی دی په هغوئ فکر کوم.

⁶زهٔ تا ته د دعا دپاره لاسونه پورته کوم، زما ځان لکه د للمې زمکې ستا تږے دے.

⁷اے مالِکه خُدایه، ما ته زر جواب راکړه، زهٔ نا اُميده شوے يم. ما نه خپل مخ مۀ اړوه، نو ګنى زۀ به د هغوئ په شان شم څوک چې ښکته قبر ته روان وی.

⁸سحر دې ستا د تل عمری مينې کلام راوړی، ځکه چې زۀ په تا باندې يقين لرم. ما ته هغه لار راوښایه چې زهٔ پرې لاړ شم، ځکه چې تا ته ما خپل ځان په دعا کښې پورته کړے دے.

⁹ما د خپلو دشمنانو نه خلاص کړه، اے مالِکه خُدايه، ځکه چې زهٔ د پناه دپاره تا ته راځغليږم.

¹⁰ستا د رضا پوره کولو ما ته تعلیم راکړه، ځکه چې تهٔ زما خُدائ پاک يې. ستا نيک روح دې په هوار میدان کښې زما رهنمائی وکړی.

¹¹د خپل نوم په خاطر دې، مالِک خُدايه، زما ژوند بچ کړه. په خپل صداقت دې ما تکلیفونو نه راوباسه.

¹²تۀ ما سره د خپلې نهٔ ختمیدونکې مينې په وجه زما دشمنان خاموشه کړه، زما ټول دشمنان تباه کړه، ځکه چې زهٔ ستا خدمتګار یم.