Read Pashto Bible (Yusufzai) — د پښتو مقدس کتاب زبور 144 Bible Online

زبور 144 - Pashto Bible (Yusufzai) — د پښتو مقدس کتاب bible

زبور 144

¹مالِک خُدائ ته دې ثناء صفت وی څوک چې زما ګټ دے، څوک چې زما لاسونه د جنګ دپاره تياروی، او زما ګوتې د جنګ دپاره تياروی.

²هغه زما مینه ناک خُدائ پاک او د حِفاظت قلعه ده، هغه زما پناه ګاه او زما خلاصُونکے دے، هغه زما ډال دے په چا کښې چې زهٔ پناه اخلم، څوک چې خلق زما د اختیار لاندې راولی.

³اے مالِکه خُدایه، اِنسان څهٔ دے چې تهٔ یې خيال ساتې، د اِنسان زوئ څهٔ دے چې تهٔ يې فکر کوې؟

⁴اِنسان دے لکه د هوا په شان، د هغۀ عمر تيريږى لکه سورى په شان.

⁵خپل آسمانونه وشلوه اے مالِکه خُدایه او لاندې راکُوز شه، غرونو ته صرف لاس وروړه نو دوئ به لوګے شی.

⁶بریښنا ګانې راولېږه او دشمنان خوارۀ کړه، او خپل غشى پرې راووروه او هغوئ تس نس کړه.

⁷د بره نه خپل لاس راوغزوه، ما ته خلاصُون او خلاصُون راکړه، د زورَورو اوبو او د غیرو لاسونو نه،

⁸د چا خولهٔ چې د دروغو نه ډکه ده، د چا لاسونه چې دوکه باز دی.

⁹زهٔ به تا ته نوے حمد ووایم، اے پاکه خُدايه، په لس تاريزه رباب به زهٔ تا ته سور ساز وغږوم،

¹⁰هغه چا ته څوک چې بادشاهانو ته فتح ورکوی، څوک خپل خدمتګار داود ته د وژونکې تورې نه خلاصُون ورکوی.

¹¹ما ته خلاصُون او ما ته خلاصُون راکړه، او د غیرو د لاسونو نه خلاصُون راکړه، د چا خولهٔ چې د دروغو نه ډکه ده، او د چا لاسونه چې دوکه باز دی.

¹²نو بیا به زمونږ زامن په ځوانۍ کښی لکه د سیرابه تکو شنو بوټو په شان وی، او زمونږ لوڼه به لکه د محل د زینت د ستنو په شان وی.

¹³زمونږ ګودامونه به د هر قسمه غلې نه ډک وی، زمونږ ګډې به زرګونو ته ورسیږی، په زرګونو به زمونږ په پټو کښې وی،

¹⁴زمونږ غویان به درانۀ بارونه وړی، نو زمونږ د ښار ديوالونه به کنډر نهٔ شی، هيڅ څوک به قېدى بوتلے نۀ شی، او زمونږ په کوڅو کښې به د نا اُميدئ ژړا نهٔ وی.

¹⁵بختور دی هغه خلق د چا په حقله چې دا رښتيا وی، بختور دی هغه خلق د چا چې خُدائ پاک، مالِک خُدائ وی.