Read Pashto Bible (Yusufzai) — د پښتو مقدس کتاب زبور 145 Bible Online

زبور 145 - Pashto Bible (Yusufzai) — د پښتو مقدس کتاب bible

زبور 145

¹اے زما پاکه خُدایه، بادشاه، زهٔ به ستا لوئې بيانوم، او زۀ به د تل دپاره ستا د نوم ثناء صفت کوم.

²زۀ به هره ورځ ستا ثناء صِفت وکړم، زۀ به د تل دپاره ستا د نوم لوئې بيان کړم.

³مالِک خُدائ لوئ دے او د ډېر ثناء صِفت قابل دے، د هغهٔ لوئى هیڅوک هم معلومولے نهٔ شی.

⁴يو نسل به بل نسل ته ستا د کارونو ستائينه کوی، او دوئ به ستا د لويئ کارونه بيانوی.

⁵هغوئ به ستا د جلالی شان او شوکت او لویئ خبرې کوی، زۀ به ستا په عجيبه کارونو فکر وکړم.

⁶هغوئ به ستا د هيبت ناکه کارونو په حقله خبرې وکړی، او زۀ به ستا د لويو کارنامو بيان وکړمه.

⁷هغوئ به ستا د بې اندازې ښۀ والى جشن کوی، او په خوشحالۍ سره به ستا د صداقت سندرې غږوی.

⁸مالِک خُدائ رحیم او مهربان دے، زر نهٔ په غصه کیږی او ډیره مینه کوی.

⁹مالِک خُدائ د هر چا سره ښهٔ دے، او هر څهٔ چې هغهٔ پیدا کړی دی په هغه ټولو مهربانه دے.

¹⁰اے مالِکه خُدایه، ستا مخلوق دې ستا شکر وکړی، ستا مؤمينان دې ستا ثنا‎ء صفت وکړی.

¹¹دوئ به ستا د بادشاهت د جلال خبرې وکړی، او دوئ به ستا د قدرت خبرې وکړی،

¹²نو چې ستا په طاقتمند کارونو ټول خلق پوهه شی، او ستا د بادشاهت د جلالى شان او شوکت نه خبر شی.

¹³ستا بادشاهى د تل بادشاهی ده، ستا حکومت په ټولو نسلونو کښې پاتې کېدونکے دے. مالِک خُدائ په خپلو ټولو وعدو وفادار دے، او هغه په خپلو ټولو پیدا کوونکو مِهربانه دے.

¹⁴مالِک خُدائ هغوئ ټول اوچتوی څوک چې را‎پريوزی، او هغه ټول راکونټی شوی راوچته وی.

¹⁵او د ټولو سترګې تا ته دی، او تهٔ ټولو ته په صحیح وخت کښې خوراک ورکوې.

¹⁶مالِک خُدائ چې خپل لاس پرانيزې، په خپله د هر يو ژوندى څيز لوږه تنده ختموې.

¹⁷مالِک خُدائ په خپلو ټولو کارونو کښې صادِق دے، او هغه په خپلو ټولو پیدا کوونکو مِهربانه دے.

¹⁸مالِک خُدائ هغه ټولو ته نزدې دے څوک چې ورته آواز کوی، هغوئ ټولو ته نزدې دے څوک چې په رښتيا ورته آواز کوی.

¹⁹څوک چې د هغهٔ نه یریږی د هغوئ ټولو آرمانونه پوره کوی، او هغه د دوئ ژړا اوری او خلاصُون ورکوی.

²⁰مالِک خُدائ د هغوئ خيال ساتى څوک چې د هغۀ سره مینه کوی، خو هغه به ټول شريران تباه کړی.

²¹زما خولهٔ به د مالِک خُدائ ثناء صفت کوی، او ټول مخلوق به د هغهٔ د مقدس نوم د تل دپاره ثناه صفت کوی.