Read Pashto Bible (Yusufzai) — د پښتو مقدس کتاب زبور 16 Bible Online

زبور 16 - Pashto Bible (Yusufzai) — د پښتو مقدس کتاب bible

زبور 16

¹اے پاکه خُدايه، ما وساته په خپل امان، پناه مې راوړه تا ته او شه مې نګهبان.

²ما ووئيل مالِک خُدائ ته، ”تهٔ زما مالِک يې، زما دغه ټول برکتونه او ښېګړې له تا نه دی.“

³په زمکه باندې ټول مؤمنان رښتينې شريفان دی، په دوئ کښې زما خوشحالى ده.

⁴خو اخته به شی هغه خلق په خفګان چې د خُدائ نه غیر منی نور خُدايان. نه به اخلم برخه د هغوئ په قُربانیانو نۀ به واخلم د هغوئ د معبودانو نومونه په زبان.

⁵تهٔ یې اے مالِکه خُدايه زما ټول نصيب او برکتونه، او زما د هر څيز ساتونکے يې تهٔ په خپله.

⁶تا ما له په برخه کښې راکړى دى ښۀ ځايُونه، بې شکه چې عجيبه دی ستا ميراثونه.

⁷زهٔ به د هغه مالِک خُدائ ادا کړم ثناء او صفتونه څوک چې ما له کوی هدایتونه، خپل زړۀ راته د شپې هم کوی لار ښوونه.

⁸مالِک خُدائ همېشه راسره دے زۀ په دې پوهېږم. هغه په خوا کښې را سره دے نو زهٔ به نهٔ غورزیږم.

⁹نو ځکه مې زړۀ خوشحاله دے خوشحالیږم، ژوند کوم او په امان کښې اوسیږم،

¹⁰زما روح به تۀ پرې نهٔ ږدې په عالمِ ارواح کښې، خاورې کيدو ته به پرې نهٔ ږدې تهٔ خپل وفادار بنده ګان.

¹¹تهٔ به ما ته ‎د ژوندون لارښونه وکړې، د خپل حضُور خوند به ما له راکړې، ستا سره د تل ژوندون خوشحالی به ما له راکړې.