Read Pashto Bible (Yusufzai) — د پښتو مقدس کتاب زبور 17 Bible Online

زبور 17 - Pashto Bible (Yusufzai) — د پښتو مقدس کتاب bible

زبور 17

¹اے مالِکه خُدايه، زما د اِنصاف درخواستونه واوره، زما د مدد کولو فريادونه واوره. زما دعا ته ورکړه پاملرنه، په صادِقه شونډو چې کړمه سوالونه.

²ما بې ګناه ثابت کړه، ځکه ټول تا ته څرګند دی چې ښهٔ کوی کارونه.

³تا په شپه کښې زما د خيالونو او د زړۀ وکړل امتحانونه، پس د امتحان نه دې په ما کښې پیدا نۀ کړل غلط کارونه، اِراده زما پخه ده په ژبه نۀ کړم ګناهُونه.

⁴ما منلی دی ټول ستا حُکمونه کوم چې ما ساتی د ظالمانو د لارو.

⁵زۀ همېشه ستا په لاره يم روان، زۀ ستا نه نهٔ یم اوړېدلے يم دې پیروان.

⁶زۀ دعا کومه تا ته، اے خُدایه، تهٔ به راکړې جوابونه، کله چې دعا کوم غوږ ونيسه ما ته قبول مې کړه سوالونه.

⁷ما ته د خپلې لوئې مينې خواږۀ راوښایه، په خپل قُدرت دو‎ئ بچ کوې تۀ له دشمنه څوک چې پناه غواړى له تا نه.

⁸وساته ما داسې لکه ستا د سترګو تور په شان، د خپل وزرونو په سوری ما پټ کړه.

⁹د بدعملو خلقو نه ما وساته چې په ما کوى حملې، ما وساته د بې رحمه دشمنانو نه چې يې واچولې ګیرې.

¹⁰کلک کړى دی هغوئ خپل بې رحمه زړونه، واوره په خپله د هغوئ د لافو ډک کلامونه.

¹¹زما نه ګېرچاپېره شوی دی، زۀ يې نيولے يم، کوی دوئ د دې انتظار چې زمکې ته مې راوولى.

¹²زما د وژلو په تلاش کښې دی دوئ لکه د اوږی ازمرى په شان، لکه د خپل ښکار په طمع پټ ناست چې وی زمرے ځوان.

¹³اے مالِکه، راپاڅه، اودریږه د دوئ خلاف، په ګوډو کړه شريران، ما د خپلې تُورې په زور له بدعملو نه بچ کړه.

¹⁴اے مالِکه خُدایه، د خپل لاس په طاقت دې تباه کړه هغه خلق، څوک چې په دې دنيا لټوی خپل اجرونه. خو په خیټه ماړهٔ کړه خپل غوره شوی بنيادمان، د دوئ اولاد سره دې وی ډیر مالونه، په میراث کښې دې پاتې شی ورته مال او دولتونه.

¹⁵ځکه زۀ يمه صادِق ستا مخ به ووينم، زۀ چې کله راپاڅم ستا ديدن به وکړم په ليدو ستا به مطمئن شم.