Read Pashto Bible (Yusufzai) — د پښتو مقدس کتاب زبور 19 Bible Online

زبور 19 - Pashto Bible (Yusufzai) — د پښتو مقدس کتاب bible

زبور 19

¹آسمانونه د خُدائ پاک جلال څومره ښۀ بيانوی، خلا یې د لاس کارنامې صفا بيانوی.

²هره ورځ بلې ورځ پسې متواتر وېنا کوى، هره شپه بلې شپې پسې د هغهٔ مشهورتیا کوى.

³نۀ کوى خبرې خو په چپه خولهٔ وینا کوی هيڅ کله چا نۀ دے اورېدلے آواز يې.

⁴خو سره د دې يې پېغام ټولې دنيا ته ورسېږی، او د دنيا په بل سر کښې خبرې اورېدلے کیږی. نمر دپاره خُدائ کور جوړ کړے دے پاس په آسمان،

⁵لکه زلمے چې د خپلې کمرې نه بهر راوځی، لکه څنګه چې یو پهلوان په خوشحالئ د منډې دپاره ليواله وی.

⁶خپله لاره جوړوى په آسمانونو د يو سر نه تر بله. د ګرمئ نه يې هیڅ څیز پټيدے نۀ شى.

⁷قانون د مالِک خُدائ کامل دے، روح تازه کوی. هدایت د مالِک خُدائ باوری دے، د ساده نه هوښیار جوړوی.

⁸حُکمونه د مالِک خُدائ رښتيا دی زړۀ خوشحالوی. د مالِک خُدائ حُکمونه پاک دی د ژوند پوهه ورکوی.

⁹د مالِک خُدائ یره پاکه ده او تل به وى. حُکمونه د مالِک خُدائ درست دی هر یو په اِنصاف وی.

¹⁰خواهش يې د زرو نه زیات دے، د سوچه زرو نه هم زیات دے، دا د شاتو نه هم ډیر خوږ دے، د هغه شاتو نه چې د ګبین نه راڅاڅی.

¹¹دا ما ستا خِدمتګار ته خبرتیا راکوى، هغه څوک يې چې منى لوئ اجر ورکوى.

¹²څوک څنګه د خپل زړهٔ په ګناه پوهیدلے شی؟ ما پاک کړه د پټو خطاګانو نه.

¹³د قصداً ګناهونو نه خپل خِدمت‌ګار بچ کړه، چې راباندې غالب نۀ شى ما ترې خلاص کړه. نو داسې زۀ به بچ شمه د جرمونو نه، او بچ به شمه زۀ د لويو ګناهونو نه.

¹⁴زما خبرې او زما د زړهٔ خيالونه دې منظُور شی تا ته، اے مالِکه خُدايه تهٔ یې زما پناه ګاه او زما خلاصُونکے يې.