Read Pashto Bible (Yusufzai) — د پښتو مقدس کتاب زبور 21 Bible Online

زبور 21 - Pashto Bible (Yusufzai) — د پښتو مقدس کتاب bible

زبور 21

¹مالِکه خُدايه، بادشاه ستا په طاقت څنګه خوشحالى کوی. ځکه چې هغه ستا په فتح ورکولو څومره لويه خوشحالى کوی.

²تا دے ورکړے د هغۀ د زړۀ آرمان تا نۀ دے رد کړے د هغۀ د خولې بيان.

³تا هغه په ډېرو کامیابو او برکتُونو معمور کړے دے تاج دې د خالص سرو زرو ور په سر کړے دے.

⁴چې د ژوند سوال يې له تا کړے دے نو تا يې سوال قبول کړے دے نو د تل دپاره تا د هغۀ ژوند اوږد کړے دے.

⁵ستا په خلاصُون او مدد هغۀ وموندو عِزت، تا هغۀ له ورکړو شهرت، شان او شوکت.

⁶هغۀ له دې ورکړے برکت نۀ ختمېدونکے ورکړے خپل ديدار دې ورته زړۀ خوشحالوُونکے.

⁷ځکه چې بادشاه په مالِک خُدائ باندې ايمان لرى، د خُدائ تعالىٰ په مينه هغه به تل د تيندکونو نه بچ وی.

⁸نو تۀ به خپل ټول دشمنان راګېر کړې، څوک چې درنه نفرت کوی نو هغه هر يو به په خپل ښى لاس راګېر کړې.

⁹کله چې تهٔ راښکاره شې په هغوئ به د بټۍ په شان اور بل کړې. مالِکه خُدایه ستا د غضب اور به دوئ تیر کړى او ستا اور به يې تباه کړی.

¹⁰تۀ به د هغوئ اولاد د زمکې نه جارو کړې، تهٔ به هغوئ له نسل ورنهٔ کړې.

¹¹کۀ څهٔ هم بدې ارادې لرى تا ته او نېتُونه يې خراب شی خو کاميابه به هیڅکله د هغوئ منصُوبې نۀ شی.

¹²تۀ به کړې هغوئ دې ته جوړ چې په شا شی دوئ چې کله ستا د ليندې غشو ته مخامخ شی.

¹³راپاڅه اے مالِکه خُدایه، په خپل ټول قدرت، مونږ به ووایُو سندرې او ثناء ستا د زور او طاقت.