Read Pashto Bible (Yusufzai) — د پښتو مقدس کتاب زبور 22 Bible Online

زبور 22 - Pashto Bible (Yusufzai) — د پښتو مقدس کتاب bible

زبور 22

¹اَے زما خُدايه! اَے زما خُدايه! زۀ دې ولې پريښودلم؟ تهٔ ولې رانه لرې شوے یې او د مدد فرياد مې نهٔ اورې؟

²په ورځ کښې تا ته فرياد کوم زما خُدایه خو تهٔ جواب نهٔ راکوې، هره شپه تهٔ زما آواز اورې، خو ما ته هیڅ آرام رانۀ شی.

³خو ستا پاکه هستی پاس په تخت، اِسرائيليان کوى ستا ثناء صِفت.

⁴زمونږ پلار‌نيکۀ په تا لرلو ايمان، او تهٔ شوې د هغوئ نګهبان.

⁵دوئ تا ته فريادونه وکړل تا خلاصون ورکړو، هغوئ مایوسه نۀ شول په تا چې چا اطمینان وکړو.

⁶خو زۀ چينجے يم او اِنسان نهٔ یم، سپک راته ګوری د ټولو د خندا یم.

⁷څوک چې راته ګورى خندا راپورې کوی، دوئ سرونه ښوزوى راته سپک ګوری.

⁸دوئ وايی چې، ”لرلو يې په مالِک خُدائ اطمینان آیا دا هغه څوک دے، خو مالِک خُدائ دې اوس دے بچ کړی. ځکه چې مالِک خُدائ بې شانه مینه ورسره کوی.“

⁹تا د مور د خيټې نه په سلامتۍ رابهر کړم، ما له دې باور راکړو زهٔ دې د مور په سينه لوئ کړم.

¹⁰د پیدایښت نه ستا لاسونو ته وسپارلے شوم، تهٔ زما خُدائ وې د کوم وخت نه چې پیدا شوم.

¹¹زما نه لرې مه اودرېږه چې مصيبت مې په در دے، او ستا نه علاوه بل څوک نشته چې وی زما مدد ګار.

¹²د ډيرو غویانو په شان دشمنانو را ګیر کړے یم، لکه د باشان د ویرَوونکو غوايانو غوندې يې ګټ ته کړے یم.

¹³زما خلاف يې د زمرو په شان خپلې خولې وازې کړی دی په غړمبار سره ما څیريوی.

¹⁴توئ شوے يم زۀ لکه اوبو په شان، هډوکى د جوړونو نه مې شوى دی بې ځایه. زړۀ زما ویلې شو د موم په شان،

¹⁵ټول زور مې خُشک شو د خاورین لوښی په شان، ژبه مې تالو پورې شوه چسپان، په خاورو کښې تا پریښے یم د مړی په شان.

¹⁶د سپو په شان دشمنانو راګیر کړے یم، د بدکارانو ډلې راګیر کړے یم، دوئ ‎په خپو لاسو زخمی کړے یم.

¹⁷ټول هډوکى خپل شمېرلے شم، دشمنان راته راګورى او په ما خوشحالېږی.

¹⁸هغوئ په خپلو کښې تقسيموى جامې زما په خپلو کښې خسڼی پرې وباسی په جامو زما.

¹⁹اے مالِکه خُدايه زما نه لرې مۀ اودریږه، تهٔ زما زور او طاقت يې زر زما مدد دپاره راشه.

²⁰ما د تُورې د خولې نه بچ کړه، د دغه سپو نه زما قيمتى ژوند بچ کړه.

²¹د زمرو د خولې نه ما راوباسه، او ما د ځنګلى غوايانو د ښکرو په امان کړه.

²²زهٔ به خپلو خلقو ته ستا د نوم لوئى بيان کړم، ستا ثنا‎ء صفت به زهٔ د جماعت په مينځ کښې وکړم.

²³تاسو څوک چې د خُدائ نه يریږئ د مالِک خُدائ ستائنه وکړئ، اے د يعقوب اولاده، تاسو هغۀ له عِزت ورکړئ، اے بنی اِسرائيلو تاسو ټول د هغۀ عِزت وکړئ.

²⁴ځکه هغۀ نۀ د حاجتمندانو درد ته سپک وکتل، او نۀ هغه د هغوئ ضرورتونو ته شا کوی نو هغه د هغوئ فريادونه اوری.

²⁵زۀ به په لویه ډله کښې ستا ثناء صِفت وکړم، د مومینانو په وړاندې به زۀ خپل نذرونه پیش کړم.

²⁶غریبانان به ماړهٔ او مطمئن شی، د مالِک خُدائ ټول لټوونکی به ثناء خوان شی د هغوئ زړونه دې د تل دپاره خوشحاله وی.

²⁷ټوله دنيا به مالِک خُدائ یاد کړی او هغۀ ته به راوګرځی، د دنيا ټول قومونه او هر خاندان به هغهٔ ته سجده وکړی.

²⁸ځکه چې مالِک خُدائ بادشاه دے او د هغهٔ په قومونو حکومت دے.

²⁹د دنيا ټول کبرژن به هغۀ ته په تعظیم شی، څوک چې فانی دی هغه ټول به ورته په سجده شی هغوئ به خپل ځانونه ژوندی ساتلے نهٔ شی.

³⁰راتلونکے نسل به يې خدمت کوی، د مالِک خُدائ بيان به راتلونکى نسل ته کوی.

³¹هغه څوک چې لا پېدا نۀ دى د هغۀ د خلاصُون نه به خبر شی دوئ به د هغۀ د ټولو کارنامو نه خبر شی.